音樂劇
音樂劇

經典音樂劇作品重新演唱 香港首個原創音樂劇音樂會

影視娛樂

廣告

音樂劇同電影唔同,好少有得買碟慢慢「煲」,錯過咗入場機會,可能要等一段時間先會再公演,有啲經典作品甚至只能夠成為「回憶」。但而家有機會可以欣賞take two喇,由本地著名作曲家高世章策劃嘅《我們的音樂劇》音樂會,帶大家去一轉時光旅行,將70年代至今嘅經典音樂劇選段,由8位星級唱家班演員重新演唱《雪狼湖》、《2月14日》、《一屋寶貝》等作品。而且仲係香港首個音樂劇音樂會,100%本地原創,保證唔會令各位音樂劇迷失望!

著名作曲家高世章策劃 曾為《雪狼湖》、《如果.愛》配樂

《我們的音樂劇》取材自70年代以來嘅經典音樂劇作品,由本地著名作曲家高世章(Leon Ko)擔任音樂總監。對音樂劇唔熟悉嘅朋友,或者會對呢個名字有點陌生,但一定聽過《雪狼湖》、《如果.愛》、《杜老誌》呢啲耳熟能詳嘅音樂劇或者音樂電影,令呢啲作品生色不少,背後音樂功臣正正係Leon。但《我們的音樂劇》與以往作品唔同,由於係一場音樂劇巡禮的音樂會,劇情相對變成輔助。Leon接受訪問時表示:「一直希望將以往出色嘅作品帶畀更多人認識,畢竟本地音樂劇發展已經接近50年,香港絕對有能力擁有屬於自己嘅音樂劇音樂會,希望透過舉辦呢類型音樂會,令觀眾對香港音樂劇的未來有信心。」

經典音樂劇作品重新演唱 香港首個原創音樂劇音樂會
(左)指揮 – 葉詠詩、(中)導演 – 方俊杰、(右)策劃及音樂總監 – 高世章 (Leon Ko)

籌備2年 《我們的音樂劇》三大入場必睇位

《我們的音樂劇》原本計劃於2019年上演,但基於種種原因,音樂會終於今年10月公演,入場前當然要做吓功課,mark低有咩必睇位!

1 – 舊曲新唱 80年代經典重新呈現

好多上世紀嘅經典作品,因為當時科技限制,未能將場面詳細記錄,《我》就將呢啲作品重新包裝,讓更多人可以認識,甚至重溫。好似香港首部原創廣東話音樂劇《黃金屋》,1986年公演後,一直未有重演,對於年輕嘅音樂劇迷嚟講係一種損失,高世章就揀咗當中嘅曲目《四仔主義》重新演繹,向原創者潘光沛致敬。

2 – 玩味、深情作品 特色演繹

一啲比較近期或者熱門嘅音樂劇作品,例如《雪狼湖》、《頂頭鎚》等演出風格比較強烈,觀眾以往入場時可能會被當時大規模或者充滿特色嘅製作吸引,而忽略當中其他嘅優秀作品。《我》就會將部分選曲重新演繹,其中一個必睇位,係台上演員會一邊演唱,而大銀幕就會播放呢啲選曲嘅以往嘅精選片段,希望觀眾回味之餘,同時做到新舊對照嘅效果,讓觀眾發掘呢啲作品另一面嘅迷人之處。

(左起)演員林澤群、邵美君、王耀祖、張國穎
(左起)演員林澤群、邵美君、王耀祖、張國穎

3- 4男4女唱家班 x 香港小交響樂團

除咗選曲嚴謹,演出單位一樣唱功了得。今次参與《我》嘅演員,包括羅敏莊、林澤群、王耀祖、、鄭君熾、張國穎、劉榮豐、邵美君同陸嘉琪,全部都有豐富音樂劇演出經驗,喺葉詠詩指揮嘅香港小交響樂團配合下,重新演唱經典作品,絕對會令觀眾聽出耳油。

(左起)演員劉榮豐、羅敏莊、鄭君熾、陸嘉琪
(左起)演員劉榮豐、羅敏莊、鄭君熾、陸嘉琪

10月公演 門票現已發售

想睇百分百香港製造嘅音樂劇音樂會,同《我們的音樂劇》台前幕後班底一齊去一趟時光旅行,重溫本土音樂劇經典,就要把握機會喇:

經典音樂劇作品重新演唱 香港首個原創音樂劇音樂會

門票發售:

城市售票網:www.urbtix.hk

信用卡電話購票:2111 5999

節目查詢:2268 7325

節目詳情:www.lcsd.gov.hk/CE/CulturalService/Programme/tc/theatre/programs_1011.html

演出地點及日期:

香港文化中心大劇院;

10月9日(星期五) 晚上7:45

10月10日及11日(星期六及日) 下午2:45

加場演出:10月10日及11 日 (星期六及日)晚上7:45 (加場演出門票於9月 30日起公開發售)

門票售價:

$480/$380 /$280/$180

(Presented by LCSD)