杜琪峯鬧速遞員被cap圖放上網 網民反指「受害人」看圖作文
杜琪峯 被指爆粗鬧速遞員撞崩樓梯
近日有網民在社交網上一個觀塘群組討論區中,貼出了一張杜琪峯與一名速遞員在大廈樓梯間中的照片,稱拍照地點是在杜Sir位於觀塘鴻圖道的甲級寫字樓,並指當時杜Sir因不滿該名速遞員推車仔送貨上樓,指其車仔會「撞崩佢啲樓梯」,因而爆粗鬧人,網民對這個post反應兩極,更為各撐一方而掀起罵戰!
![杜琪峯 杜Sir同速遞員在樓梯口﹗](https://imgs.nmplus.hk/wp-content/uploads/2022/07/b314216e-65be-44e1-b7f1-015a22d31bae_97024386262ccf6c27f2fb-588x1024.jpeg)
網民鬧杜Sir:樓梯豆腐做咩,咁易撞崩!
有網民留言指杜Sir出名經常在片場爆粗鬧人:「連劉華都被佢鬧過,我信佢會去虎個速遞員囉!」,亦有網民指杜Sir過份緊張:「豆腐做咩?咁都撞得崩!唔通將部車仔托上膊咩,阿導演」、「人哋派件已經好辛苦」、「呢位師兄真好EQ,硬食冇出聲」、「送貨車仔會包膠唔會撞崩佢嘅樓梯嘅!」、「以後叫佢自己落樓攞件啦!」等,同時有網民焦點落在杜Sir冇戴口罩上,留言:「戴番口罩先啦杜Sir!」、「楝嘢係佢嘅當喺屋企所以唔戴啩,吹咩」、「可以鬧番佢冇戴口罩罰佢五千!」等等。
![杜琪峯 杜琪峯身兼導演及監製《七人樂隊》即將上映﹗](https://imgs.nmplus.hk/wp-content/uploads/2022/07/johnnie-to_8171042962cceeb231236-1024x683.jpg)
網民撐杜琪峯:看圖作文﹗杜Sir對基層好客氣
同時有不少網民力撐杜琪峯指「似係看圖作文」、「張圖杜Sir笑笑口喎」等,樓主即回覆反駁「我先冇咁得閒作嘢,或者我忽然間幻聽囉」,其後有網民指速遞員唔啱規矩:「樓梯唔係畀車仔用㗎喎!」、「唔好同我講咩辛苦嗰啲呀!」、「我之前都係做呢間速遞公司,係唔可以推部車仔上落樓梯喎!」,有網民即反駁:「成棟樓係杜Sir,業主係佢,但佢又當劏房咁租咗出去,叫人點逐次拎上去呀?」。有網民就撐杜Sir一向好人,指佢雖然有脾氣,但對基層好客氣!亦有網民指信杜Sir唔係咁嘅人,但就指杜Sir個仔先鍾意鬧人,仲出埋片以作證,亦有網民指有其父必有其子!各有支持者!仲有幾日就係電影金像獎頒獎禮,有網民話可能係宣傳技俩喎,唔知杜Sir會唔會回應吓呢單嘢呢?
杜琪峯成焦點:成日都講Mirror多咗啲!
杜琪峯有江湖地位,行內人人尊重,出名有性格又敢言,之前出席MakerVille發佈會,被主持谷德昭問到熟唔熟悉ViuTV男團Mirror時,杜琪峯即表示:「又嚟?好似多咗啲,成日都提佢哋。閃嚟閃去通街都係,成日見都幾討厭㗎,個時代又要轉一轉喇。」其後講到現時電影圈問題時,杜琪峯還指現時戲院像「試映室」,返屋企睇仲好,錯口指「屋企食得煙」,谷德昭即幫手兜圓埸說「係錯嘅呢個行為」,即惹笑埸。
![杜琪峯 MakerVille](https://imgs.nmplus.hk/wp-content/uploads/2022/04/-2022-04-27-4.48.43_139173763962690fce242ae-1024x530.png)
將來還有什麼演唱會值得留意?
有不少歌手宣布舉辦演唱會,小編為你整合了香港演唱會+搶飛攻略一覽,包含各演唱會優先購票日期、公開售票日期、門票價錢、座位表等,想搶飛粉絲必定要留意!