在《金》劇演技爆發被網民推為民間視后的李施嬅,去年在無綫台慶頒獎禮以零的突破吐氣揚眉,除與陳山聰一齊攞「最受歡迎電視拍檔」,更與楊千嬅平分秋色同時奪得「最受歡迎電視女角色」,氣勢之勁是十六年來前所未有。早前簽約美國經理人的她,二月又投入拍攝加拿大電視劇《 Blood and Water 》第三季,不過三月新冠肺炎在歐洲、美加疫情加劇,劇組全面停工,李施嬅餘下約兩星期戲份仍未埋尾,成為搶手貨的她,並落實今年八月回巢無綫拍《金宵2 》,再搭陳山聰續前緣,但今次回巢,她就霸氣開出三大條件。據知情者透露:「《金宵大廈》為Selena帶來好多榮耀,佢當然想再拍續集,呢幾個月一路都同無綫傾緊合作,不過珠玉在前,上次劇中主角Alex同阿蕭前世今生故事已非常完美,再拍Selena講明要先睇劇本,加上佢同一班同劇演員合作有晒默契,仲講明要原班人馬演出,佢反而唔睇重自己嘅酬勞,但就一定要今次劇集能投放更多嘅資源,佢話呢啲係好實在嘅要求,目標係希望新的更勝從前,無綫亦答應配合佢,仲特別遷就佢檔期,將套劇延至八月底先開!等佢可以幫加拿大套劇埋咗尾先!」