攞架嚟丟！吳啟華上《Tiger’s Talk》炫富 惹來全場恥笑與質疑

原文刊於《東方新地》

彈出彈入冇guts

吳啟華最近忙於為新劇《飛虎之雷霆極戰》做宣傳，喺劇中飾演警隊一哥嘅佢，現實中其實係個口水佬。早前同馬國明拍住接受訪問，近年長駐內地拍劇嘅佢忍不住爆料，話有位「萬人迷」女演員向劇組人員派發自己嘅房間號碼，當時仲實牙實齒話︰「連攝影師都有呀，呢啲壞女人可以壞到咁，仲要晚晚派。」點知搞出個大頭佛，外界紛紛猜猜女星是誰，吳啟華知道自己衰多口，好快就喺微博公開道歉，反口話只係聽返嚟，仲話以後唔會再犯。

講人壞話闖禍，咁講番自己啦！日前再有一段訪問片段播出，吳啟華被伍詠薇問及會花幾多錢置裝，佢眼都唔眨話會花過百萬買衫，此言一出即被質疑男人老狗竟然花咁多錢，吳卓羲仲大反應到問隔籬嘅陳山聰佢哋係咪要坐開啲。

炒價買錶笑到噴飯

之後伍詠薇再問吳啟華擁有幾多架車，佢好大口氣咁答：「係咪全世界計？」阿Bob笑指佢咁樣答好寸，吳啟華即反駁自己喺多處地方都有車，例如深圳、北京同日本；最爆都係答買過最貴嘅手錶，吳啟華話最貴買過一隻炒價80萬，身旁嘅吳卓羲同陳山聰搶住問係咪炒價時買，吳啟華食咗誠實豆沙包話：「係呀！」兩個衰仔即笑到噴飯。

喺潮人陳山聰同吳卓羲面前，吳啟華大講fashion的而且確係班門弄斧嘅，不過話晒都係前輩，即場恥笑真係唔畀面囉！