戀愛等高線｜ViuTV推與世隔絕戀綜 Marco被笑稱可以再戰 呢位受情傷女星自薦參加

戀愛等高線｜Mike導重磅回歸推與世隔絕戀綜

《戀愛等高線》以「與世隔絕」概念為賣點，參加者將踩入沒有手機訊號覆蓋嘅山林，並展開一段尋找真愛嘅旅程。除咗宣布將於8-9月開拍新戀綜之外，ViuTV亦同步招募參加者，並指只要符合以下條件即可參加：「條件一：真心想拍拖、條件二：年齡介乎18至40歲」。

不過當中最引網民熱議的，就莫過於文中落款「Mike」嘅字眼。現年30歲的Mike導（劉諾衡）以「格仔導演」聞名，因其在節目中以打格方式處理樣貌而得名，不過佢於2023年完成《無制限探險隊》後，就沉寂長達2年，因此今次重磅回歸拍攝心節目，就獲唔少網民直言超期待！

Mike導曾於去年年頭在社交平台發文剖白入行8年「進入瓶頸」：「唔知幾時開始，發現熱愛嘅事物單純地變咗做唔想失去嘅事物」，並直言「開始有啲驚，驚有一日唔再鍾意做呢件事」，兼無預警宣布將會唞唞，未知何時重回工作崗位。

戀愛等高線｜網民爆笑力推戀綜常客Marco參加

《戀愛等高線》即將開拍嘅消息一出，唔少網民都紛紛在留言區推薦心水人選，當中更有唔少網民爆笑指戀綜常客Marco可以參加：「Marco又有機會嚟啦！」、「咁Marco要參加哦」、「Marco絕對係不二人選啦」、「呢啲戀愛綜藝點少得常客Marco！」

戀愛等高線｜呢位受情傷女星自薦參加

除咗Marco獲網民力推參加節目外，現年29歲嘅楊安妮（WinWin）亦留言自薦：「我可以玩嗎？」兼獲網民鼓勵：「機會來了！安妮！」

WinWin去年底與拍拖多年嘅男友KC（黃家灝）分手，WinWin隨後更於網台節目中透露與舊愛分手的傷痛經歷，更透露男方更曾帶新女友一起到WinWin最喜歡嘅餐廳吃飯，兼連環口出狂言hurt爆WinWin！