Minions搶戲才是王道！ 《 壞蛋獎門人3 》順民意夠大眾化 @方俊傑
撰文：方俊傑
《 壞蛋獎門人3 》主角矮化、配角上位
《 壞蛋獎門人3 》（Despicable Me 3）是完全被Minions化。第一集，Minions未出道未走紅，《壞蛋獎門人》還是正正常常地講一個正正常常的故事；來到第三集，很明白喧賓奪主，Minions的特質才是最受歡迎的元素。我不是說Minions的戲份比犀利哥還多，我是說整齣電影被Minions化。
就似傳統式我問你答的訪問，太正經，太缺乏娛樂性，太沒有新鮮感，太沉重，已經被淘汰，換成甚麼唔准諗即刻答，或者坐喺架車度傾偈，或者玩篤波波遊戲，或者叫個訪問者摸下個被訪者，總之內容不再重要，形式才重要，夠好笑夠短夠無聊才重要。《壞蛋獎門人3》簡直投其所好，根本是將不同角色拍成不同單元，單元與單元之間其實無乜關連，然後串埋一起就變成一齣人見人愛的好電影。Bravo！
犀利哥突然搵返個孖生細佬，然後，Minions會走咗去坐監又逃獄，然後，養女乙跟養女丙會突然走去搵獨角獸，然後，奸角會因為受到童年的屈辱，仿如《二十世紀少年》般，製造巨大機械人破壞荷里活，然後，以上所有角色喺唔知點解但係好巧合嘅情況之下聚首一堂。
睇完也一頭霧水。我覺得是特登的，這是新世代的思維模式，方便一路睇戲一路篤snapchat一路覆WhatsApp再一路諗其他嘢，專注力只夠三分鐘，如果個故事好連貫，邊有心機睇落去呀？做人要與時並進，你估個個係王晶咩？
好啦，如果你真係王晶，堅持《千王之王》是最出色的電視劇，咪唔啱睇《壞蛋獎門人3》？又唔係喎。電影一開場，刻意地出現一隻小丑魚，以為去了跟《海底奇兵》（Finding Nemo）crossover，原來真係有向迪士尼致敬。個奸角被設定到係一個沉醉於80年代輝煌歲月的loser，於是，一首首陳年經典金曲，甚至昔日的舞步、電視節目形式、打扮、美學、色彩，不斷湧現。
小朋友當然不知道Michael Jackson有首《Bad》，分分鐘連MJ係邊個都唔知啦，買埋飛買埋雪糕帶佢入場嘅老竇老母唔會唔識吖嘛。呢招，仲唔係抄《銀河守護隊》（Guardians of the Galaxy）？凡事可以用不同角度解讀，你可以話《壞蛋獎門人3》好濫，將漢堡包、壽司、蝦餃燒賣炒埋一碟；我就正面少少，我覺得《壞蛋獎門人3》好細心，無微不至地照顧埋一堆年老家長的需要，功德無量，thank you ！
將來還有什麼演唱會值得留意？
有不少歌手宣布舉辦演唱會，小編為你整合了香港演唱會+搶飛攻略一覽，包含各演唱會優先購票日期、公開售票日期、門票價錢、座位表等，想搶飛粉絲必定要留意！
