周潤發傳授復康秘技 64歲金燕玲抗癌成功精靈打麻雀

影視娛樂

廣告

患難見真情!64歲實力派演員金燕玲,去年二月確診患上子宮癌第一期,要接受手術切除淋巴、子宮、卵巢及盲腸,並要接受六次化療及四次電療,抗癌路艱辛難捱,幸好身邊一直有密友蘇施黃陪她打這場硬仗,令她積極面對病 情,阿蘇除衣不解帶照顧外,更為怕傳細菌給枕邊人,寧願在客廳睡氣墊吹氣床,同癌魔搏鬥大半年,金燕玲四個月前終完成所有療程,康復進度理想,身邊好友亦紛紛送上強身偏方,當中發哥更傳授復康秘技,有發哥教路,金燕玲健康狀態回勇,日前更精靈出關約友人打麻雀,打足七小時仍精 神抖擻,重拾健康指日可待!

撰文、圖片:東方新地

金燕玲患子宮癌 怕女兒擔心選擇隱瞞

天意難違!患病無法控制,冥冥中可能亦有安排,年初在女兒 Emma建議下做子宮頸抹片檢查,金燕玲不幸驗出患上子宮癌第一期,不過,當時醫生就表示,如果再遲發現,可能好大件事。由於是惡性腫瘤USPC(腫瘤名稱),未能做微創手術,金燕玲要接受手術將淋巴、子宮、卵巢及盲腸一併切除,之後還接受了六次化療及 四次電療;面對突如其來的惡疾,金燕玲除咗憂心自己病情,更最怕是女兒Emma知道後擔心,直至手術完成後才敢將患癌一事告知親妹及女兒。金燕玲坦言:「佢(女兒)知道一定會喊,令我仲擔 心,會令我情緒波動,所以冇同佢講,做完手術之後,仲死頂扮精神同佢傾視像,不過,佢成日問點解我咁早瞓,都知瞞唔得耐,最後都話咗畀佢知!」

0
女兒 Emma 是金燕玲的命根,為怕女兒擔心,金燕玲在手術後才將患癌一事告知女兒,治療期間更由阿蘇每日向女兒報告她的精神狀況,好讓女兒安心。
0
化療期間,金燕玲大部分時間留家養病,台灣導演楊德昌太太便曾到她家探她。

做化療面形身形有變化 曾患輕度抑鬱

同癌魔搏鬥半年,金燕玲七月終於完成所有抗癌療程,身體狀態開始好轉,她亦頻密出關會友,九月底更陪老友關之琳慶祝57歲生日,還親自入廚為老友炮製生日飯。不過抗癌辛酸不足為外人道,完成第一次化療,金燕玲已大量甩髮,看見浴缸三大堆掉下來的頭髮,即使早有心理準備,情景亦令她相當難受,之後她索性剃光頭,包頭巾遮掩病容,受化療影響,副作用亦接踵而來,就連味覺和嗅覺亦被影響,做完第二次化療,更骨痛劇烈,骨頭神經痛即使手指輕輕一掂,都已經痛得厲害,除咗化療帶來身體上的痛楚,身體虛弱亦令她情緒波動,因化療藥導致面形和身形有所變化,她更透露因此有過輕度抑鬱。

0
今年七月完成所有抗癌療程,身體逐漸康復的金燕玲,日前精靈出關打麻雀,悉心打扮下亦明顯精神飽滿,她聽從醫生吩咐外出時戴上口罩防菌,之前因化療脫髮, 她亦戴帽保暖!

體會人間有情 密友蘇施黃無間斷陪伴

抗癌吃盡苦頭,但亦令她體會人間有情,這段最難捱日子,一直有密友蘇施黃陪伴支持,令她堅強去打這場硬仗。今年三月接受完手術及第一次化療,金燕玲親身上阿蘇節目《大玩派》承認患癌,當時就大讚阿蘇對她照顧無微不至,更試過在情人節,她突然想吃栗子蛋糕,阿蘇即緊張為她張羅,令她吃了患癌後最好胃口的一餐。據知情者透露:「化療嘅副作用好多,過程真係好痛苦,阿蘇知道呢場仗唔易捱,除咗畀好多鼓勵 Elaine(金燕玲),Elaine想食咩都會諗方法做到,知佢唔開心,亦會任由 佢發洩,畀佢可以抒發情緒!每次Elaine做完化療,等佢休息足夠,阿蘇就會安排飯局同雀局,等Elaine可以食鍾意嘅嘢,又可以多啲朋友陪,分散注意力可以唔覺咁辛苦!」

0
金燕玲抗癌路相當辛苦,幸有密友蘇施黃陪伴打這場硬仗,接受抗癌療程期間,亦不時上阿蘇節目,分享抗癌歷程。
0
化療令金燕玲吃盡苦頭,阿蘇安排一班好友輪著陪她飯局傾偈為她打氣,令她樂觀面對病情,早前同黃子華、蔡一智夫婦及容祖兒飯局。
0
完成抗癌療程,金燕玲亦頻密出關會友,九月底同阿蘇一齊為老友關之琳慶生,精神飽滿的她還親自下廚炮製美食賀好友。

發哥傳授復康秘技金燕玲狀態回勇

除了密友悉心照料,好友亦給金燕玲無比正能量,這段期間更得發哥傳授復康秘技,令她狀態回勇,據知情者透露:「發哥好注重健康,呢十幾年都鑽研咗一套養生方法,因為同阿蘇好老友,發哥都好關心Elaine嘅康復進度,見Elaine完成晒抗癌療程,身體冇之前咁虛弱,亦鼓勵佢多啲做運動,雖然暫時未可以外出行山,但發哥都建議Elaine喺屋企附近慢行同拉筋,每日循序漸進,等狀態再好啲,亦可以去行山,飲食方面亦要食清啲,儘量以魚同菜為主,仲有朝早要食飯,咁先有能量維持 一日,不過一個星期都可以放肆一次,嗰日可盡情食自己鍾意嘅嘢!」

0
同阿蘇老友鬼鬼的發哥,對金燕玲抗癌復康路表現關心,經常透過阿蘇問候Elaine(金燕玲)健康情況!
0
有發哥傳授復康秘技,金燕玲精神愈來愈好,早前發哥約阿蘇晨早去行山,之後一齊去咗大埔吃地道美食,阿蘇更在社交網開心share。

抗癌成功精靈打麻雀 玩足7小時仍精神飽滿

日前金燕玲便精靈出關約好友打牌,當日她親自駕車,接埋一位女性朋友到達九龍塘,曾經講過自己好貪靚,即使患病亦唔會畀自己一個病樣,必定會悉心打扮才外出,當日就見她一身粉紅上衣配牛仔褲,攞住一個Christian Dior手袋,精神飽滿相當醒神,她亦聽從醫生吩咐,戴 上口罩外出預防細菌,同友人一齊行去九龍仔業主會,會合其餘兩位友 人打牌,更一打就七個鐘,到凌晨才離開,精力果然充沛!得好友集氣祝福,金燕玲成功捱過逆境,明天定會更好!

0
當日金燕玲自己駕車外出,泊好車後先同友人入咪錶。
0
由下午五點打到凌晨,玩得盡興的金燕玲離開九龍仔業主會時,已急不及待打電話,相信是打畀阿蘇報告行蹤。
0
打足七小時,離開時身旁好友都一臉倦容,反而金燕玲睇落仲好精神,看來狀態相當不俗。
0
唔知係咪之前掛住打牌, Miss咗好多短訊,金燕玲邊行邊撳電話回覆,打咗成晚牌,仲 係好精神!