十大中文金曲︱重溫7大尷尬位 十優歌手唔夠一半出席 老歌表演被嘲似睇春晚
尷尬位 1︱ 十優歌手得4位歌手到場
今年《十大中文金曲》喺舉辦之前已經傳出唔少歌手帶頭杯葛，令原本應該星光熠熠嘅頒獎典禮失色不少。由頒第一個「優秀流行歌手大獎」就出曬事，原本有十位歌手得到「優秀流行歌手大獎」，但最後就只有Gin Lee 李幸倪、馮允謙、泳兒同王灝兒等4位歌手到場領獎，人氣王姜濤同Jer柳應廷則未有到場領獎。
尷尬位 2︱老歌串燒超尷尬 網民：以為睇流行經典50年
唔知係唔係因為唔夠藝人出席今次頒獎典禮，第一個表演嘉賓就令人大跌眼鏡，由「靚聲天后」陳潔麗一連唱出明月千里寄相思、月亮代表我的心和每天愛你多一些等多首老歌。唔少網民都話唔知演唱者係邊個之餘，仲話覺得似睇緊內地春晚表演同《流行經典50年》。
尷尬位 3︱大部分歌手缺席
今日頒獎典禮聽得最多嘅一句一定就係：「今日有事在身無法到場領獎，但我地會轉交獎項俾佢」，差唔多每個獎項都一定有一位歌手無法到現場領獎，布志綸、洪嘉豪、姜濤甚至五月天等單位都事前錄好得獎感言現場播，最終獲優秀女歌手大奬的鄭欣宜亦未見預錄任何得獎感言。
相關文章：十大中文金曲頒獎音樂會｜一文重溫缺席/遲到得獎者名單
尷尬位 4︱李志剛講錯嘢又唔做功課
主持之一的李志剛喺頒發第二首「十大中文金曲獎」時，介紹馮允謙上台時懶神秘，介紹馮允謙話佢有個孖生細佬，點知之後驚講錯，即刻戴頭盔話：「會唔會係孖生阿哥嚟」，被網民狠批「講錯嘢又唔做功課」！
尷尬位 5︱多位新人表現失準
今年一班新人為多首張國榮和梅艷芳的經典作品重新編曲，並聯同多位樂壇新晉演繹歌曲。不過多位新人嘅表現都失準，唱歌走音、甩歌詞樣樣有，睇到觀眾們都非常尷尬！
尷尬位 6︱頒獎嘉賓橫跨多個行列 醫生都有份頒獎
今年雖然出席歌手少得可憐，但頒獎嘉賓就非常多元化，運動員、醫生、護士都有份頒獎。其中王姑娘非常搶Fo，當被問到平時有冇聽開港台嘅時候，王姑娘竟然帶骨回應話收唔到。此外，喺宣佈Ian陳卓賢憑《留一天與你喘息》奪得「十大中文金曲獎」時候，王姑娘即時心心眼話「自己都好鐘意呢首歌」，自爆係Hellosss！
尷尬位 7︱兩位男女主持口水多過茶 狂搞爛Gag
今年由李志剛、黃天頤擔大旗做主持，不過兩人為咗揼波鐘，不停大搞爛gag、口水多過茶。李志剛於點評新人時拿歌手名字開玩笑，嘲笑 「雲浩影」變「雲無影」，立即被拍檔指正 「唔好拎人個名嚟玩 」。
網民全晚總結： 老派約會之必要、給缺席的人唱首歌
頒獎禮最後由開場未有現身的MC張天賦奪得優秀男歌手大獎，他的作品《老派約會之必要》亦得到十大中文金曲首位，有看畢整個頒獎禮的網民認為這首歌絕對配合香港電台的風格，老歌唱不停！另外，由於缺席歌手眾多，加上馮允謙的得獎歌《給缺席的人唱首歌》可以總結這個頒獎禮的風格。
將來還有什麼演唱會值得留意？
有不少歌手宣布舉辦演唱會，小編為你整合了香港演唱會+搶飛攻略一覽，包含各演唱會優先購票日期、公開售票日期、門票價錢、座位表等，想搶飛粉絲必定要留意！
