劉馬車突襲ViuTV搵花姐 怒轟淨係捧MIRROR！

劉馬車突襲ViuTV搵花姐 怒轟：令我明白娛樂圈幾黑暗！

昨日（22日）劉馬車頭戴紅色頭帶，手持Cam去到ViuTV位於九龍灣的總部訴苦，他先聲明「自己唔係嚟搞事」，又一路在自白中提及「如果花姐喺入面可以叫佢出一出嚟」。劉馬車更邀請到一班傳媒朋友以及Fans支持，希望將自己的心中情可以話畀全香港人知！

劉馬車：入娛樂圈有好多潛規則

劉馬車提及係花姐令到他明白「娛樂圈幾黑暗」，以及原來進入娛樂圈有十分多的潛規則，他再次提及如果自己要入選《全民造星5》，花姐就要求他「扮傻扮癲去鬧佢哋」，但劉馬車話自己已經長大了，唔會再扮傻扮癲，而係做返一個真正的人。他又提及自己幾年前已經來過ViuTV拍節目，但就批當時的節目相當「垃圾」，「完全唔知有咩意義」，又指節目單位都有叫劉馬車畀意見開咩節目，劉馬車就話想整個「詩詞大會」去宣揚中華文化。

插花姐淨係識捧MIRROR

劉馬車直斥ViuTV口中有說給機會年輕人追夢，但為了收視、要求他扮傻，他怒轟：「咁你哋繼續捧你哋嘅姜濤和MIRROR囉，根本唔係真正接納有心、有夢想參加節目嘅年輕人」。他暗指花姐淨係識攬實MIRROR呢棵「搖錢樹」，卻放棄了給其他年輕人機會，相信該言論一出，又會掀起鏡粉大軍去怒罵劉馬車。

睇下佢點講！

預告星期日跑均全香港

最後劉馬車指自己決定放棄參加《全民造星5》，因為被ViuTV高層及花姐深深傷害過，而他為了證明自己渣馬並非中途亂入，所以決定在今個星期日舉行「跑均全香港」，由天水圍出發，去證明自己。而他亦表示自己將轉戰《全民林寶》，該節目是由香港的一個加密貨幣平台去舉行，目的為求送出林寶跑車。最後劉馬車都在頻道上傳一則唱歌影片「劉馬車送給花姐：《黑色幽默》」，去暗諷花姐的所作所為。

相關文章：劉馬車崩潰大哭 控訴花姐要求自己做癲佬

早前劉馬車在個人Youtube頻道上傳一條名為「馬車崩潰了」的影片，劉馬車在影片中聲淚齊下地指：「我去《全民造星5》特登走到去電視台嗰度，即係自己去毛遂自薦，希望話畀機會我呀。咁但係ViuTV嗰度，阿花姐嗰啲，導演高層啦，就喺度笑我話『你算啦，嘩你真人幾正常㗎喎，你咁樣咁正常無意思啦，係咪呀。你如果痴線啲我哋或者都會考慮畀你（入圍)）， 係咪呀？即係你上吓嚟，喂我哋電視有啲gimmick呀，即係可以吸引多啲人，如果你正正常常上嚟唱歌跳舞呀，使鬼要你咩！你又唔係靚仔，你白卡嘅，你就係一個痴線佬，你就應該做返人哋想你做嘅嘢！」

一度情緒崩潰 慨歎自己做正常人冇利用價值

隨後，劉馬車繼續邊哭邊說：「原來我想正正常常去做啲嘢，係唔得㗎，人哋就係好似ViuTV呢啲，就係話想睇我痴線呀，要我痴線先有人睇。你地係咪真係好可憐好可悲呀？覺得自己要去癲，要去痴線，要去鬧人哋，要去糟質自己，要做呢啲嘢人哋先會想去睇我，先會肯畀機會我上個電視節目。咁我依家唔想做呢啲嘢吖嘛，我想做一個正路嘅人，做返啲自己真心想做嘅嘢，但原來就係唔得，人哋想睇你癲、睇你癡咗。想你行返回頭路，最好睇你又坐監喇，又畀人打喇，死咗去咁啲人就開心。」

網民認同花姐看法 劉馬車喊曬都唔收貨：又博同情

雖然劉馬車喊到眼淚鼻水都出曬嚟，有部分網民都有留言支持鼓勵劉馬車，但大部分網民都話唔收貨，認為劉馬車又再用同樣技倆來搏同情。同時亦有網民留言表示認同花姐和ViuTV高層的看法：「認真覺得你繼續拍番癲野比較好，起碼呢條路線你係最top，受眾一定係睇你，你拍其他野，例如唱歌，大把專業唱歌youtuber啦，好多自己出埋歌，有音樂團隊，人地點解要睇你」、「拍返依D味幾好，學咩人唱歌」、「就係鍾意睇呢d」等。