全民造星6｜Ian Hannz排練壓力爆煲當場落淚 Gin Lee狠批參賽者後悔救回

Ian Hannz排練壓力爆煲當場落淚

A2組以Boy Band主題演出《開始倒數》，隊員包括87號Winter、22號Alvin Lai、11號Louis、21號牛牛、31號三金和43號Ian Hannz。由於全隊只有Ian Hannz能夠提供排舞意見，他承受的壓力可想而知。梁祖堯在排練時提醒Ian Hannz表情不要太兇狠，「你要練習relax少少，因為我都想觀眾鍾意你多啲。鏡頭capture落去嘅時候見到你好認真，然後好似一個人撐起成team，撐起個排舞，撐起所有嘢⋯⋯但係我就要係時候見到你enjoy。」
這番話刺中Ian Hannz內心深處，他頓時喊起上來。Ian Hannz事後解釋「喊嗰吓係好放鬆，始終都會著緊個表演好唔好睇，我覺得我哋6個可以做到嘅嘢，都好想呈現到畀觀眾睇。之後就開始對自己嘅要求愈嚟愈高，跟住同時都對個表演要求愈嚟愈高，跟住就feel到開始⋯⋯壓力囉。」

Gin Lee狠批Karry似夢遊坦言後悔救回

B1組以《B For Bomb》應戰，隊員包括49號Larry、92號Bosco Kwan、7號Karry、5號Kirs、84號Javi和72號Jack Lo。然而隊員間的合作問題嚴重，Karry被指缺席排練且敷衍了事，而Javi在溝通上也出現問題，不出席隊員活動，在家中也不看群組訊息。到驗收表演當日，B1組表現被彈到一文不值，Gin Lee更直斥Karry似夢遊，質問他「你記唔記得你係我喺復活區裡面救返出嚟㗎？我唔想咁講，但係我心裡面真係有少少後悔係救咗你返嚟嘅。我戥你嘅組員辛苦講真，你自己衰唔緊要呀，你自己負責任，你係會連累到其他好認真對待呢件事嘅人。」不過Gin Lee並沒有放棄，更以激將法大罵Karry是「廢柴」來激發他的潛能。

A2組壓力化為力量獲導師激讚

A2組在正式演出時成功將壓力化為力量，發揮出應有水準。伍詠薇讚賞他們「出嚟成個隊型同埋成個造型好好，成件事個rap，成個力水，隻歌嘅力量都好到位。」T-Ma更指他們演出大膽，「因為呢首歌係非常之難唱，再加上要跳埋舞，譬如好似去到尾，Alvin有啲ad-lib，我非常之appreciate。」
而B1組方面，Karry終於不負眾人期望唱出水準，整組演出獲吳林峰稱讚有如精英班，「每一個人都嘅角色都好signature。」伍詠薇亦表示感受到每個人的風格，更直指「成團㗎喇已經，已經係一團嚟㗎喇我覺得。」

強強對壘評判難決定A2組險勝晉級

兩組Dance battle同樣精彩，強強對壘之下評判也大嘆難下決定，梁祖堯在後台顯得非常緊張。最終A2組獲兩盞燈勝出，全組人即時跪地擁作一團痛哭，可見他們承受的壓力有多大。而落敗的B1組中，死亡名單的Javi和F grade的Karry則雙雙被淘汰出局。肥仔@ERROR早前已直指B1組的情況令人擔心，「我原本都想放開手畀你哋攪㗎，我覺得正常都應該攪得掂吖！但係真係呢，幾大鑊喎！所以我都盡抽時間同你哋攪，因為我都唔想你哋死呀！我希望你哋輸都輸得好好睇睇啦！」