億萬喵星人
億萬喵星人

《 億萬喵星人 》中秋爆笑登場 霸氣富豪變寸咀貓咪

影視娛樂

廣告

中秋佳節又到,節日活動都不外乎食下月餅、賞下月、玩下燈籠蠟燭,最多出街捉下精靈,不過捉得多都悶,咁一家人仲可以做乜?唔使愁,今年有「闊少喵」陪你一家大細過中秋!( 億萬喵星人)

施展爆笑魔法《億萬喵星人》霸氣富豪變寸咀貓咪

《億萬喵星人》(Nine Lives)由艾美獎導演巴里辛尼菲(Barry Sonnenfeld)執導,佢曾經與荷里活金像級男星韋史密夫(Will Smith)及湯美李鍾斯(Tommy Lee Jones)合作,炮製出另類科幻經典喜劇《黑超特警組》(Men in Black)系列。呢個系列3部作品共橫掃全球票房超過16.5億美元,成為少數極賣座嘅電影系列之一,有外星人助陣果然係唔同啲!不過今次都唔例外,導演繼續施展爆笑魔法,變出萬人膜拜嘅「喵星人」助陣!一眾貓奴記得要留意返啦,電影入面嘅呢隻喵星人並唔係一般嘅貓咪,佢鍾意揸遊艇出海不特止,仲好識做生意搵大錢,不過就成日當屋企人冇到,高竇到死,但原來佢真正身份係一個霸氣富豪!

導演請嚟《紙牌屋》(House of Cards)金球視帝兼金像影帝奇雲史柏斯(Kevin Spacey)飾演呢隻古古怪怪嘅「闊少喵」,仲搵嚟《緣滿情人節》(Valentine’s Day)金球視后珍妮花嘉納(Jennifer Garner)同《捉智雙雄》(Catch Me If You Can)金像配角基斯杜化華堅(Christopher Walken)齊齊整治呢隻寸咀喵星人。呢個中秋,貓出沒注意喇!

毛神神黐貓筋 變形貓爸點樣變返人?

億萬富翁靶湯(奇雲史柏斯 飾)工作成狂,成日忽略屋企人。雖然佢好憎貓,但個女最想要嘅生日禮物就係貓,終於逼不得已去咗寵物店揀禮物。點知去生日派對途中發生嚴重意外,醒後發現自己竟然變咗屋企隻「闊少喵」!呢隻高竇貓古靈精怪,不過人見人愛,令成個屋企生猛晒。靈魂困喺隻貓度嘅靶湯被逼同老婆仔女相處,佢又能唔能夠從中領略到人變貓嘅秘密,變返一個稱職盡責嘅老公同爹哋呢?

編劇Ben Shiffrin表示,想個故仔幽默得嚟又有溫度,所以透過一個魔幻嘅轉變,要靶湯重新選擇生活嘅優先次序。同時,亦都想從呢個自大、控制狂人變寵物貓嘅故仔中,將豐富嘅喜劇元素發掘出嚟。「靶湯忽略屋企人嘅報應,就係聽到佢哋點講佢、聽到佢哋幾掛住佢、知道佢哋幾愛佢;仲有知道佢做得幾唔好、錯過幾多重要時刻。」佢仲話想拍得成熟啲,而唔係好似普通一條隨意嘅網上貓片。

《 億萬喵星人 》
上映日期:2016年9月15日
主演:奇雲史柏斯、珍妮花嘉納、基斯杜化華堅
導演:巴里辛尼菲

最新吃喝玩樂資訊