中年好聲音2海選︱3位重量級參賽者大起底！

中年好聲音2海選第2輪︱1. 蔡美蘭 ︱52歲艷星亞姐跳唱走曬音

今年52歲艷星亞姐出身嘅蔡美蘭於《中年好聲音2》第二輪海選又唱又跳《漫步人生路》，雖然唱得非常投入，但奈何唱到走曬音，拍子又甩曬，搞到曾志偉都聽到苦笑，連評判之一嘅張佳添都話：「呢個我唔係好識評，交畀你啦肥媽。」

選亞姐入行 曾與李嘉欣選港姐

蔡美蘭曾經參加過1993年《亞洲小姐競選》，因為身材姣好加上外貌甜美，一度被視為大熱門，不過最後都三甲不入，只獲得「最上鏡小姐」。不過原來早在1988年時，她已經參選過港姐，仲同大美人李嘉欣同屆，不過最後就連決賽都未能成功打入。

拍三級片一脫成名

入行之後，蔡美蘭曾經拍過《精武門》、《有房出租之前世今生》及《碧血青天楊家將》等劇集，不過直到她在1995年約滿離開亞視後，就改戲路轉拍三級片。其中最令人印象深刻嘅就係1996年演出的兩部三級片《南洋第一邪降》和《藝壇照妖鏡之96應召名冊》。蔡美蘭於《藝壇照妖鏡之96應召名冊》更以全裸上陣，非常大膽。

中年好聲音2海選第2輪︱ 2. 鄧兆榮︱鄧兆尊細佬眼濕濕謝父母

鄧兆尊細佬鄧兆榮以譚詠麟《孩兒》參賽，雖然唱得好有感情，但就被張佳添嫌唔夠氣。鄧兆榮一出場就被問到為何參加比賽，鄧兆榮就表示：「因為想起早幾年媽媽過身，想有機會有幸可以喺舞台上獻呢首歌俾父親同母親。」之後仲眼濕濕咁多謝父母：「希望有機會感激父母，因為到中年有好多感受同回憶，希望有機會鼓勵吓自己兩個仔，要對父母感恩。」

曾因爭產頻現身與祥嫂和好做孝子

鄧兆榮早年在爸爸新馬師曾（鄧永祥）離世時，曾與其餘三兄弟姐妹因爭產而同媽媽祥嫂（洪金梅）鬧翻，更多次同家姐鄧小艾上庭作證。不過最後一家都和好如初，四兄弟姐妹喺祥嫂過身時候都有出心出力為母親辦喪事。

中年好聲音2海選第2輪︱ 3. 方俊︱張偉文經理人表現獲肥媽大讚

張偉文經理人方俊今日以譚詠麟《愛的根源》一曲參賽，一出場肥媽就認得佢係張偉文經理人，仲同張偉文開過多場演唱會。雖然今日方俊有少許走音，但肥媽同張佳添都開口大讚他唱得好。

張偉文百病纏身 方俊有情有義承諾照顧一生

張偉文自2015年開始已經出現健康問題，受腰患、糖尿病、腳痛等病痛纏身，更曾經先後動過兩次大手術，體重一度由260磅跌至160磅。不過當方俊知道張偉文有事之後，他都義不容辭咁去幫佢，仲承諾會照顧張偉文到最後一日。

中年好聲音2海選第2輪丨鄧兆尊細佬、孫耀威胞妹瑞士返港參賽

TVB選秀節目《中年好聲音》第二季反應熱烈，至今已有超過四千人報名參加，成就一班追夢者踏上舞台嘅機會，仲唔快啲嚟參加，節目將會喺6月28日截止報名。而喺6月24號就吸引過千人湧嚟電視城參加第二輪海選面試，參賽者施展渾身解數上陣，各類型嘅曲目都隨手可見。 除咗素人之外，亦吸引咗孫耀威妹妹孫美賢、現職藝人馬嘉均、張偉文好友方俊，以及已故新馬師曾兒子鄧兆榮等都嚟追夢。

當中兆榮演唱《孩兒》送畀喺天上嘅爸爸媽媽，佢話希望有幸真正踏上舞台演出作為禮物獻給父母，不過首次參賽嘅佢就對自己表現麻麻地，方俊就話得到恩師張偉文嘅支持，令佢鼓起最大勇氣踏出人生呢一步。孫美賢就專登從外地返港參加比賽。

評審方面繼續由周國豐、張佳添同肥媽（Maria Cordero）肩負，而向來大力支持節目嘅曾志偉亦親自現身鼓勵參賽者們，更大讚今年水準比去年更高，志偉話可能有咗第一屆經驗，大家都清晰知自己想要咩。不過喺面試中有眾多藝人親友報名參賽，志偉話：「可能舊年有李玟家姐參加，覺得原來冇乜障礙，今年反而好多家人都鼓勵佢哋參加，支持佢哋嘅夢想。」 除咗追夢之外，每個人都帶著唔同嘅故事嚟面試，有唔少洋蔥同寫實嘅勵志故事。曾經年少時因誤入歧途而失去自自由兩年嘅胡光駿亦帶住另一種心情嚟應戰，希望透過比賽鼓勵年青人；而欣賞咗眾多唔同風格嘅參賽者表演之後，評審之一周國豐亦大讚呢班追萬者高質素。