傳電視城吵大鑊觸怒高層 馮盈盈急撇鄭洐峰保前途
文：東方新地 ｜ 圖：TVB截圖、江嘉敏IG、新傳媒圖庫
馮盈盈堅拒將戀情浮面為導火線
馮盈盈與鄭洐峰拍拖無耐已被踢爆在深水埗築愛巢，新聞多多的盈盈，每次都獲鄭衍峰出力護花，二人地下情一直穩打穩紮更懶理高層愈戀愈高調，不過至去年尾二人再為是否公開戀情有拗撬，一向希望事業上揚的盈盈以照顧家人為由，決心搬離愛巢遷往將軍澳區千呎海景寓所，事後雖然未完全斷纜但女方已經有分手之念，有傳他們在電視城化妝間吵架被多人目擊，傳至高層耳邊，被急召照肺，最終盈盈決定狠斬情絲分手收場。
馮盈盈把鄭洐峰降呢為同事
對於被傳在電視城內吵大鑊致被無綫高層樂易玲照肺，馮盈盈回應報章時否認事件，稱應該當時是練習《後生仔傾吓偈》的講稿，而對於與鄭洐峰分手一事，她則笑住回應「哪來的分手？」更強調與鄭從來只是同事同朋友的關係，而鄭衍峰則謂二人從來都是朋友及拍檔，更大方為盈盈台慶頒獎禮視后提名拉票：「記得頒獎禮投票畀佢啦。」
分手前馮鄭節目齊暗寸「偽人」雙面人
早前一集《#後生仔傾吓偈》以雙面人做主題，馮盈盈同江嘉敏曾是好姊妹，但去年因一場「船P」而擘面，兩人由昔日閨蜜關係變成陌路人。馮盈盈趁機在節目中連珠炮發：「雙面人我就最清楚，對住你一個樣，對住其他人係另一個樣，仲會無形之間害到你好慘！」矛頭直指死敵江嘉敏。之後主持陸浩明要求大家寫低遇過點樣嘅雙面人，盈盈只簡單寫下「偽人」2字，再繼續閙爆雙面「偽人」：「有利益嘅時候就熱情，冇利益就好冷酷，自然有一日佢會為做過嘅事帶嚟惡果！」
澄清冇黐富二代
節目中馮盈盈透露曾聽過一句名言：「事事都批評嘅人，一定係自己有嗰種衰嘢嘅特質，例如話人哋貪錢，佢自己一定係貪錢。」醒目的盈盈男友兼主持鄭衍峰即接住問：「即係話你黐富二代嘅人，自己一定係想黐富二代？」盈盈亦順道澄清：「本身有咁嘅特質嘅人，先會特別提起，我從來都冇咁嘅諗法，反正我冇做呢樣嘢。」至於江嘉敏對於盈盈所講雙面人將來會承受自己種的惡果，她回覆傳媒時表示十分同意，稱：「講得好啱！」
