欣宜
欣宜

鄭欣宜演唱會|許廷鏗手拖手作狀咀欣宜放笑彈 張敬軒台下寸咀大嗌成焦點

影視娛樂

廣告

鄭欣宜(Joyce)一連三場紅館唱《Between Us 鄭欣宜演唱會2022》昨晚(6月12日)圓滿結束!尾場欣宜毫不保留獻唱,激動得又喊又笑,最後更四度Encore先完場。嘉賓許廷鏗現身,二人相擁淚灑紅館超感人!

欣宜孖許廷鏗台上咀嘴失敗:真係搞唔掂!

欣宜紅館演唱會昨晚舉行尾場,與欣宜有「異父異母低能巨孖寶」之稱的許廷鏗(Alfred)擔任壓軸表演嘉賓,欣宜介紹他出場說:「我同佢識於微時、兩小無猜,經常頭貼頭手牽手,仲傳過緋聞,其實我都有諗過我哋究竟係友情?定係愛情?」然後響起「經典MK合唱情歌」《好好戀愛》,二人仲深情對望兼作狀咀嘴,不過只係唱咗半首,二人就破功笑場,許廷鏗問:「點解咁多年我哋呢啲嘢都係做唔好?我冇一次可以好好地同你唱一次深情嘅歌!」欣宜老實不客氣回應:「唔夠專業囉我哋,呢台戲真係做唔到呢……」見欣宜唱到成頭汗,Alfred稱她為「脫水界KOL」。欣宜又說:「不如我哋俾大家睇下,當初我哋點樣頭貼頭、手牽手啦。住拖,我高踭鞋好易跌呀!」然後合唱《半份關心》。

鄭欣宜演唱會 許廷鏗與欣宜合唱《好好戀愛》深情對望。
許廷鏗與欣宜合唱《好好戀愛》深情對望。(圖片來源:影片截圖)
鄭欣宜演唱會 深情對望完下秒即刻破功,欣宜仲話自己唔夠專業,演唔到台戲。
深情對望完下秒即刻破功,欣宜仲話自己唔夠專業,演唔到台戲。(圖片來源:大會提供相片)

許廷鏗延續紅館送禮傳統 張敬軒台下大叫:你又送黑膠

合唱《半份關心》後,Alfred說:「我哋睇住對方經歷高高低低,但無論邊個高邊個低,都會喺對方身邊。」然後送上一張特別版黑膠唱片,軒仔在台下大叫:「你又送黑膠!」令全場大笑。事關之前Alfred任軒仔演唱會嘉賓時,都是送黑膠碟,不過他送上親手畫二人合照作唱片封套的被本,他又激動說Alfred說:「呢張相係2015年影,當時我哋仲係傻更更,未踏足過紅館,我哋約定將來邊個登上紅館舞台,對方都要在場。」二人台上相擁爆喊。欣宜回後台補妝,到Alfred獨唱《面具》,他說:「今日下午我哋綵排時,Joyce突然攬住我喊。我知佢為咗今次演唱會付出200%努力,要搞一個紅館演唱會並唔簡單,希望大家以熱烈嘅歡呼聲和掌聲,話畀Joyce知,佢係一位值得被愛嘅香港歌手!」全場掌聲和歡呼聲。

鄭欣宜演唱會 許廷鏗送上親身繪製封套的黑膠畀欣宜,場面感動。
許廷鏗送上親身繪製封套的黑膠畀欣宜,場面感動。(圖片來源:大會提供相片)
鄭欣宜演唱會 許廷鏗根據呢張2015年的二人合照畫黑膠封套。
許廷鏗根據呢張2015年的二人合照畫黑膠封套。(圖片來源:IG@princejoyce)
鄭欣宜演唱會 軒仔喺台下大叫:「你又送黑膠!」
軒仔喺台下大叫:「你又送黑膠!」(圖片來源:許廷鏗IG story)

欣宜感動剖白:自小覺得自己唔值得被愛

欣宜在演唱會上獻唱新歌《仍會等》前分享愛情觀,她說:「我喺愛情路上並無得到過多少鼓勵,甚至自小被寫成一個唔值得被愛嘅人,喺脆弱嘅時候,覺得自己係一個愛情失敗者,懷疑自己係咪值得被愛?但我仍然相信愛情,相信喺我搵緊真命天子嘅同時,可能佢都搵緊我呢!」Alfred表演後返回觀眾席,坐在軒仔旁繼續睇騷﹐他們更齊齊熱情大嗌encore。欣宜向觀眾席的軒仔笑說:「我今晚真係好難專心,因為『皇上駕到』,如果唔係防疫條例,我一定拉埋佢上台!」軒仔立即高舉雙手姆指兼提高一隻腳,以示舉腳支持,還向她送飛吻。全場反應熱烈,四度encore,欣宜感動落淚,瞓地手腳並用做心心動作答謝觀眾愛戴,向觀眾承諾:「我哋勾手指尾,約定下次再見,一定有下一次,仲會好快,只要大家繼續愛我!」最後她一邊飛吻一邊退場,一連三場紅館演唱會完美落幕。

鄭欣宜演唱會 軒仔喺台下畀Like支持。
軒仔喺台下畀Like支持。(圖片來源:大會提供相片)
鄭欣宜演唱會 一連三場欣宜紅館個唱圓滿結束。
一連三場欣宜紅館個唱圓滿結束。(圖片來源:大會提供相片)

撰文:東方新地圖片來源:大會提供相片、許廷鏗IG、影片截圖資料或影片來源:YouTube@橫間道

最新吃喝玩樂資訊