萬千星輝頒獎典禮2021
萬千星輝頒獎典禮2021

萬千星輝頒獎典禮2021|狄龍直播中途硬入教訓譚俊彥 嚴父曾用狗籠教仔法

影視娛樂

《萬千星輝頒獎典禮2021》 譚俊彥憑《換命真相》首奪最佳男主角,更擸埋馬來西亞視帝獎,當晚更攞埋最佳衣著男藝人獎,旺到爆﹗譚俊彥父母狄龍及陶敏明親身到場見證兒子攞獎,陶敏明直言開心過自己及龍哥攞獎﹗不過甚有威嚴的狄龍一直表現冷靜,更在譚俊彥接受訪問期間,突然插入教訓兒子,鏡頭前訓誨譚俊彥足五分鐘﹗狄龍曾在譚俊彥五、六歲的時候,因兒子頑皮而鎖他入狗籠懲罰﹗是真正的嚴父﹗

文:東方新地|圖:無綫娛樂新聞台截圖

萬千星輝頒獎典禮2021|譚俊彥含淚講感言

譚俊彥獲獎一刻,母親陶敏明興奮在觀眾席上站起拍手,譚俊彥含淚話:「媽咪對唔住,呢幾年我少咗打電話畀你,唔係我唔愛你,係姓譚習慣將愛放喺心,我好愛你﹗我要多謝太太,你係我嘅全部,冇你我唔會拎到呢個獎,love you,我唔會忘記初心﹗」譚俊彥頒獎禮後接受娛樂新聞台訪問時依然激動,哽咽話:「我事前冇準備講乜,原來上到台係會唔記得晒講咩,我仲有好多人要多謝,要多謝戴耀明、經理人…」此時父親狄龍突然硬入教訓兒子﹗

萬千星輝頒獎典禮2021|狄龍直播中途硬入教訓譚俊彥 嚴父曾用狗籠教仔法
譚俊彥從歐陽震華和林保怡手上接過最佳男主角獎項,講感言時激動落淚﹗(圖片來源:無綫娛樂新聞台截圖)
萬千星輝頒獎典禮2021|狄龍直播中途硬入教訓譚俊彥 嚴父曾用狗籠教仔法
譚俊彥母親陶敏明興奮得在觀眾度上站起拍手,在旁的狄龍表現冷靜﹗(圖片來源:無綫娛樂新聞台截圖)
萬千星輝頒獎典禮2021|狄龍直播中途硬入教訓譚俊彥 嚴父曾用狗籠教仔法
狄龍一直鼓起泡腮,跟太太陶敏明的興奮形成強烈對比﹗(圖片來源:無綫娛樂新聞台截圖)

狄龍教仔:你只係幸運﹗

狄龍一臉嚴肅對住譚俊彥話:「 我知道我個仔因為我做呢行,唔想衰畀我睇,呢樣我都贊成﹗我鍾意用理性,多過感情角度去睇件事﹗我想話你知,你要感激過去、努力當下、放眼未來,你有幾大嘅能力就有幾大嘅責任,當然要用行為用工作去報答支持你嘅人,今日你好幸運,但同你一齊競爭嘅人嘅技巧,唔一定輸過你,只不過輸咗個運氣畀你﹗」

萬千星輝頒獎典禮2021 譚俊彥成雙料視帝,頒獎禮後接受訪問時仍然表現激動﹗
譚俊彥成雙料視帝,頒獎禮後接受訪問時仍然表現激動﹗(圖片來源:無綫娛樂新聞台截圖)
萬千星輝頒獎典禮2021 呢個時候,狄龍突然硬入教訓兒子﹗
呢個時候,狄龍突然硬入教訓兒子﹗(圖片來源:無綫娛樂新聞台截圖)

狄龍:我都付出咗好多

「如果你有你嘅初心,你要對你屋企人,對你嘅小朋友,對太太對媽咪努力﹗因為時間係有限, 我哋七十幾歲人,唔知睇得幾多時間,但我好感激你,為咗你嘅工作唔使令我難過,而付出咁大嘅努力,去追求你嘅成功,但你要知道你付出咗好多,我都付出咗好多﹗」一直在旁細心聆聽父親教誨的譚俊彥即和應:「當然啦」。狄龍繼續講:「但我唔想睇你難過,我唔想睇到你失敗後嘅失落,我認為人生應該仲有一樣嘢,你要了解點解失敗,失敗喺邊?」譚俊彥好不容易插嘴:「老竇,所以我咪唔敢叫你嚟囉﹗」狄龍冇理個仔繼續話:「點解我圈你呢?我驚你過度咗,但媽咪呢就係衷心支持你,我都係衷心支持你,OK?你以後要謙虛啲,(譚俊彥受教不停點頭),你煮啲嘢係好食嘅﹗ 」

萬千星輝頒獎典禮2021 狄龍開行turbo不停在鏡頭前教導兒子要謙虛﹗
狄龍開行turbo不停在鏡頭前教導兒子要謙虛﹗(圖片來源:無綫娛樂新聞台截圖)

狄龍叫譚俊彥退居幕後

無綫娛樂台主持好不容易問狄龍會否為有譚俊彥呢個兒子感到驕傲?狄龍就答:「我覺得佢如果有能力,可以諗吓退居幕後,例如做一個製作人、導演(譚俊彥嚇到O嘴),做到嗰啲位,你可以提拔到後輩,可以喺社會有正面嘅影響,可以影響人心,你見到志偉咁成功係因為佢可以影響人心,佢嘅成就同能力使人好開心,使人開心好難,悲劇容易啲,喜劇好難㗎﹗如果將來你能散播多啲歡樂,我會更加開心囉﹗」譚俊彥望住狄龍話:「我今日最開心就係你喺度﹗」狄龍聽完兒子的感動說話,突然轉話題:「你揸車返去要放慢啲,慢慢揸呀﹗」譚俊彥答完好就請狄龍翌日去探孫兒﹗

萬千星輝頒獎典禮2021 無綫娛樂台主持要求父子攬攬﹗
無綫娛樂台主持要求父子攬攬﹗(圖片來源:無綫娛樂新聞台截圖)

陶敏明坦言興奮過狄龍攞獎

譚俊彥母親陶敏明接受訪問時直言好開心興奮:「真係好開心,冇諗過會咁開心,以前都見過人攞過唔少獎啦,龍哥都攞好多啦,都唔夠今日開心﹗」即向旁邊的狄龍話:「龍哥你唔介意呵?」她又指一定要好好慶祝:「我仲要同晒所有朋友慶祝﹗」表現冷靜的狄龍就大讚新抱好識教小朋友,令兒子有個好好嘅家庭:「家庭嘅支持好重要﹗」

萬千星輝頒獎典禮2021 一家三口開心合影﹗
一家三口開心合影﹗(圖片來源:無綫娛樂新聞台截圖)
萬千星輝頒獎典禮2021 訪問期間,曾志偉出現,譚俊彥即過去多謝﹗
訪問期間,曾志偉出現,譚俊彥即過去多謝﹗(圖片來源:無綫娛樂新聞台截圖)
萬千星輝頒獎典禮2021 狄龍見到曾志偉亦過去握手致謝﹗
狄龍見到曾志偉亦過去握手致謝﹗(圖片來源:無綫娛樂新聞台截圖)
萬千星輝頒獎典禮2021 狄龍和曾志偉好好傾﹗
狄龍和曾志偉好好傾﹗(圖片來源:無綫娛樂新聞台截圖)
萬千星輝頒獎典禮2021 之後陶敏明亦有過去同曾志偉打招呼﹗
之後陶敏明亦有過去同曾志偉打招呼﹗(圖片來源:無綫娛樂新聞台截圖)

《萬千星輝頒獎典禮2021》FAQ
問:譚俊彥在《萬千星輝頒獎典禮2021》中奪得甚麼獎項?
答:譚俊彥在《萬千星輝頒獎典禮2021》中奪得「馬來西亞最喜愛TVB男主角」及「最佳男主角」成雙料視帝。得獎名單

問:譚俊彥得獎後父親狄龍有甚麼說話對兒子說?
答:狄龍在譚俊彥接受訪問期間,突然插入教訓兒子,鏡頭前訓誨譚俊彥足五分鐘﹗足本對話

常見問題

譚俊彥在《萬千星輝頒獎典禮2021》中奪得甚麼獎項?

譚俊彥在《萬千星輝頒獎典禮2021》中奪得「馬來西亞最喜愛TVB男主角」及「最佳男主角」成雙料視帝。得獎名單

譚俊彥得獎後父親狄龍有甚麼說話對兒子說?

狄龍在譚俊彥接受訪問期間,突然插入教訓兒子,鏡頭前訓誨譚俊彥足五分鐘﹗足本對話

圖片來源:無綫片段截圖

最新吃喝玩樂資訊