袁詠儀舊訪問出土暢談張智霖另類關係 「模範夫妻」只係人設？！

袁詠儀認橫刀奪愛張智霖

近日有內地網民翻出張智霖的情史以及袁詠儀的舊訪問，發現呢對「恩愛夫妻」真係只係「人設」？！張智霖同袁詠儀一齊之前女友係許秋怡，2人當時都有另一半，因1993年合作陳勳奇電影《邊城浪子》而撻著。袁詠儀15年前於《志雲飯局》訪問表示，自己當時立即「解決」咗自己的感情關係，然後再話俾張智霖知，等對方再作考慮，而被問到係咪橫刀奪愛，袁詠儀就回應「見仁見智」，只係知道「自己鍾意嘅嘢就要去表達」。

「恩愛夫妻」只係隻眼開隻眼閉？！

張智霖同袁詠儀於內地經常被視為模範夫妻，張智霖更被譽為「教科書式好老公」，不過呢位好老公，原來只係因為袁詠儀「護夫有道」而成？

根據佢《志雲飯局》中提到，2004年時，張智霖同曾志偉曾於泰國拍攝《戰虎》時，去過一啲「特殊場所」，袁詠儀無嬲之餘，仲話男人就應該去見識下，好過老咗先嚟去。而佢喺另一個節目的言論都被翻出，指佢同張智霖講「玩歸玩，最好別讓我看見，遠一點吧」「記得做一些安全措施，知道嗎」被內地網民質疑，呢對模範夫妻的相處之道都不過係隻眼開隻眼閉！

袁詠儀自爆懷孕時張智霖仍堅持要出去玩

而且袁詠儀當年仲自爆過，懷孕時因為反應比較大，足足嘔咗成4個月，搞到街都唔敢出，而張智霖因為本來就好喜歡周圍玩，一個星期要玩足7日，佢想張智霖陪佢唔好出街，但張智霖的反應竟然係：「我在這裡幹什麼？你吐，我也不能替你吐，你不舒服，我也不能不舒服，你不能出去，但我要出去」結果出足7日改為隔日出。呢啲舊訪問一翻出，即成為微博熱話，內地網民「無語了，人設立得飛起，以後再也不覺得甜了」「看那個披荊斬棘，一群人被感動哭。我只能笑一笑讓我想起他老婆懷孕，他還要出去一周玩7天」「毀三觀了」「我擦…我還以為模範夫妻」「原來他是這種人」不過有網民都力撐指已經係當年的事，同埋現代夫妻大都數都係咁樣維持婚姻，無咩咁出奇。