福祿壽訓練學院｜炎明熹「家族成員」到場支持 限定組合出場勁爆笑

炎三炎四限定組合現身

在介紹自己的時候，阮兆祥先稱呼炎明熹為妹妹，向大家打招呼。接著炎明熹介紹完後，阮兆祥接過話頭說：「我是她的家姐…炎命祥」。而王祖藍則說：「我是她的表姨媽，炎命短。」最後輪到李思捷時，他表示自己叫：「你好，我是炎命硬。」隨後王祖藍接著說：「我們三個平時被稱為炎三，再加上你，我們就是炎三炎四。」

本集 Professor Fuk（阮兆祥）、Professor Luk（王祖藍）及 Professor Sau（李思捷）三隊繼續接受第三輪訓練主題 -「生死對決」。本集內容是第二回合「１對１扮嘢對決」，三組輪流自行挑選一名藝人作為扮嘢主題，然後向指定組別下戰書進行 1 對 1PK 賽，本回合繼續保留導師或學員助演部分。負責第二回合評分的是現場觀眾及專業評審伍仲衡。由於祖藍在上一集的第一回合對決贏到開巷，節目一開始即遭祥師兄抵死寸爆：「我睇你好得幾耐。」祖藍聞言亦爆笑指自己「贏分數失民心」，並謂就連化妝姐姐亦認為他「贏得冇道理」。

思捷力撐彭建豪扮足 20 年郭富城唔係技窮：扮得似就係扮得似

第二回合由 Team Fuk 先行自定「扮嘢對象」，為了收復失地，祥師兄派出最強武器、有 20 年扮演郭富城經驗的彭建豪出戰；而祥師兄選擇的 PK 組別，則是全隊零郭富城模仿經驗的 Team Luk。在二十年扮演生涯中以跳唱為主的彭建豪，是次轉型挑戰深情慢歌《我為何讓你走》，順道獻給三位陪伴了自己 20 年的「天王」拍檔—嘉傑（黎明模仿者）、楊彥偉（張學友模仿者）及梁德華（劉德華模仿者）。建豪感性地說：「以前我哋係四個人一齊去內地好多電視台錄節目，可能大家都有一定年紀，有自己各自嘅家庭同工作，依家我自己一個人嚟 TVB，心裏面好感觸。」與郭富城有 90%相似的建豪深情獻唱完畢後，還大派勵志熱血 bite：「希望大家會記住我個名，我係歌手彭建豪。」場面感人。

伍仲衡對彭建豪表演亦讚不絕口：「我喺電視睇完你，就好想睇呢個節目，你比郭富城更加郭富城，我相信得一個人可以 PK 到你，就係郭富城。」思捷聞言亦力撐建豪：「可能有人話：『唓，佢扮咗二十年啦，扮嚟扮去郭富城。』扮得似就係扮得似，你扮嚟睇吓吖，你係最似嗰個。」

祖藍傳授「致勝錦囊」：要用明星停頓位面對強敵，祖藍派出外形及聲線均與郭富城爭一截的吳兆麟（Alan）應戰，而Alan 唯一模仿郭富城信心位，就是自己的「狂野之城冬菇頭」。不過經過祖藍連日來用心調教，逐個動作細節執到足之外，更向 Alan 大派「致勝錦囊」：「唔好加太多嘢，加太多你變得好忙。大家搏係搏你個樣似過另外嗰邊嗰位郭富城，咁你嗰啲位一定要畀個空間佢出嚟（要畀鏡頭影到個樣），你要有個明星停頓位。」 自摸＋震波＋扭腰擰臀震撼全場

不過 Alan 的殺食位豈止如此，跟足城城《第四晚心情》經典裝束出場的他，大晒超強胸肌及「朱古力腹肌」，加上一對超結實兼壯健的大髀，還未開跳已經震撼全場。本身有拉丁舞底子的 Alan，雖然跳唱流行曲經驗欠奉，但配以地獄式日練夜練，成功憑超強「舞」功及 body 一鳴驚人，加上大量自摸、單眼、震胸及扭腰擰臀動作，全場尖叫及歡呼聲不絕於耳，絕對有能力與「扮郭富城專業戶」彭建豪一決高下。就連出名閹尖的伍仲衡亦讚不絕口：「你真係跳得好好，我略嫌有少少似鴨，好輕微架啫，尤其是你嗰幾吓（邊說邊扭腰擰臀），好似想人塞錢落你個褲咁，郭富城唔會咁架嘛。如果你能夠再收番嗰少少哩，就係舞台王者，依家就鴨店王者喇。」爆笑全場。

本集另一個對決題目為 Team Luk 自選的「劉德華」，應戰組別為 Team Sau，出戰學員分別為撞樣九十年代劉德華的陳柏曦，及撞樣八十年代劉德華的蔡景行，二人分別表演《天若有情》及《鹿鼎記》，當中 Team Sau 更出動「人海戰術」增加勝算。想知「兩代華仔」戰況，密切留意明晚播出的新一集《福祿壽訓練學院》。