Anson Lo
Anson Lo

MIRROR演唱會|Anson Lo自認唱歌難聽需努力 妙計解決「唔夠飛」慘況

影視娛樂

廣告

MIRROR成員Anson Lo(盧瀚霆)日前接受Do姐(鄭裕玲)主持的電台節目《口水多過浪花》訪問,講到MIRROR演唱會掀起全城搶飛潮,他直言自己都係到臨開騷前兩、三日,才會知道可以攞到幾多張飛,但根據以往經驗,最多每場都係得10張,他又講到MIRROR能夠在出道4年的時間就登上紅館開騷,已經超額完成了花姐對他們的期望!

盧瀚霆 Anson Lo上電台接受Do姐訪問,當然唔少得講到被追演唱會飛的問題。
Anson Lo上電台接受Do姐訪問,當然唔少得講到被追演唱會飛的問題。(圖片來源:[email protected]_do_cheng)

盧瀚霆Anson Lo 開紅館騷達到里程碑

Anson Lo直言今次MIRROR上到紅館開騷,是一件好開心的事:「我記得我哋第一次上紅館係做坤哥(吳業坤)嘅嘉賓,之後又做過鄭秀文前輩嘅嘉賓,都係上紅館,我哋嗰時都諗過如果自己上紅館開演唱會,究竟會係幾多年之後嘅事?嗰時花姐就叫我哋唔好諗啦!話呢樣嘢喺5年之內都唔好諗住會發生。所以嗰陣我哋都覺得呢個係一個遙不可及嘅夢想,到依家終於可以開啦,嗰種感覺就好似作為我哋12個MIRROR兄弟望咗好耐嘅里程碑,好似真係達到咗。而且冇花姐講咁耐,只係4年時間,所以係超額完成咗。」

Anson Lo 盧瀚霆 原來MIRROR曾被花姐指5年內唔使諗去紅館開騷,結果他們出道4年就達成了這個夢想。
原來MIRROR曾被花姐指5年內唔使諗去紅館開騷,結果他們出道4年就達成了這個夢想。(圖片來源:[email protected]

根據易唔易嬲嚟畀飛朋友

被Do姐問到係咪經常被人追問演唱會門票的問題?Anson Lo就話:「我媽咪都成日問我,因為有好多親戚都有追問我媽咪,但我都承諾唔到大家,因為我都唔知我可以幫到大家攞到幾多張。以往我哋MIRROR開過兩次演唱會,每一次都係臨開騷前2、3日,我哋MIRROR成員先會知道自己每一場可以攞到幾多張飛,上次都係10張以內,唔理你畀邊個,我父母都係計埋喺入面,我會自己揀邊個朋友冇咁易嬲,嚟決定畀唔畀飛佢,不過都係盡咗力,盡咗力就OK啦!」

Anson Lo又講到現在已經加開了兩場演唱會:「嗰兩場有九成嘅飛都係賣畀MIRO,同埋實名嘅公開發售,希望可以畀多啲FANS入到場,因為見到大家都撲飛撲得好辛苦,撲到同撲唔到都經歷咗一段好煎熬嘅過程,有好大壓力。我工作時都有好多人問我幫唔幫到手買飛,大家都問得好尷尬,怕麻煩到我,我都會答如果幫到會再話你知。當然可以揀嘅話我一定會幫咗我爹嗲媽咪先,有餘力先會再去幫其他人。」

盧瀚霆 Anson Lo指其媽咪亦被親戚們追飛。
Anson Lo指其媽咪亦被親戚們追飛。(圖片來源:[email protected]

花姐睇實演唱會Rundown

Anson Lo指暫時都未約到12個MIRROR成員齊人去排練演唱會:「依家只得抽到時間排練嘅成員可以開始排咗先,未抽到時間嘅,例如我依家拍緊劇,就要用自己嘅休息時間,去同監製傾究竟啲歌會點安排,例如我自己就做住編曲先,同埋傾住每隻歌之間點樣連接、主題點樣掛勾等等。不過成個演唱會Rundown已經Confirm晒,大家都知道大家會唱咩歌,小組嘅合作係點樣進行,都已經Confirm晒,呢啲都係由演唱會監製同花姐一齊開會傾出嚟嘅。花姐對我哋每次演出都好concern,例如會擔心我哋每次唱完一首歌之後,會唔會唔夠氣唱下一首,同埋擔心我哋體能上或者能力上能唔能夠做到呢個Rundown等等,會建議吓點樣去調整。」

盧瀚霆 Anson Lo話因為各成員太忙,到現在都未能齊聚去排練演唱會,多得花姐一路跟實,幫手同演唱會監製一齊商量,去安排演唱會Rundowm。
Anson Lo話因為各成員太忙,到現在都未能齊聚去排練演唱會,多得花姐一路跟實,幫手同演唱會監製一齊商量,去安排演唱會Rundowm。(圖片來源:[email protected]

自認唱歌難聽 需要時間改善

Anson Lo又講到爆紅後得到好多Fans的關注,但亦會擔心自己做得到唔夠好,他直言:「我會驚我唱歌唔夠好,坦白講我唱歌一定係會遜色過其他歌手,可能好難聽,同埋有一啲好不足嘅地方,一定要用時間去改善,但要做能力上嘅訓練,就同我本身其他嘅工作有衝突。好坦白講係好貪心嘅,因為依家我係冇得全神貫注去做歌手嘅工作,而係又要拍戲、拍劇,又要接廣告,呢個係好貪心嘅多元身份,惟有用我自己最大嘅努力去平衡呢4個身份,最驚就係平衡唔到,是旦有一個範疇做得唔好,都會令一部分Fans覺得失望。」

盧瀚霆 雖然工作忙碌,但Anson Lo都有抽空操練肌肉,獲Do姐大讚身形厚實了不少。
雖然工作忙碌,但Anson Lo都有抽空操練肌肉,獲Do姐大讚身形厚實了不少。(圖片來源:[email protected]

劇透新角色賺錢至上

而講到正在拍攝的ViuTV新劇《百萬同居計劃》,Anson Lo笑言拍到剩返4日都未見到Edan(呂爵安)客串,希望大家不要抱太大期望,因為Edan工作比較忙,除了拍電影外,還正在籌備下一個音樂Project。他又透露今次劇集的故事結構,與上次《大叔的愛》完全不同,今次他的角色叫燈仔,性格和阿牧相反,他說:「燈仔做所有嘢都係為賺錢,咩都話OK,唔會有PLANNING,完全唔似我,所以一開始我都要用啲時間去投入呢個角色。」

盧瀚霆 Anson Lo指Edan近日忙住拍戲同籌備新歌,未必能抽空客串由《大叔的愛》原班人馬製作的新劇《百萬同居計劃》。
Anson Lo指Edan近日忙住拍戲同籌備新歌,未必能抽空客串由《大叔的愛》原班人馬製作的新劇《百萬同居計劃》。(圖片來源:[email protected]

做導演拍MV令花姐變燥底

Anson Lo又提到新歌《King Kong》MV首次做導演的經歷,他笑言:「今次係一次好煎熬嘅經驗,要處理非常多嘅嘢,當初我想像嘅係諗STORY LINE、分配工作、揀美術指導、揀衫,但原來連逐個鏡頭幾點拍、幾點轉場景都要諗,但我又因為要就燈光,唔可以成日轉SET、轉衫,所以變咗要跟SET、跟衫去拍,而唔係跟劇情去拍,但我又要就埋其他主演同DANCERS嘅配合,真係好難!同埋有好多阻滯,因為今次MV我用咗好多CG做BACKGROUND,拍攝時9成都係綠背景,最驚就係好假,同埋光線唔夠真實。花姐嗰兩日都在場,仲全程都好燥底,因為我嘅原意係想拍啲逼真啲、有電影感嘅嘢,佢好驚我最後拍咗啲好似卡通片嘅嘢出嚟,好彩最後拍咗出嚟,我自己係滿意嘅,當然有啲好似沙漠嘅位置,逼真度可以高啲,但撫心自問喺有限嘅時間內我已經盡咗力!」

盧瀚霆 Anson Lo直言為了首次做導演,犧牲了不少睡眠時間。
Anson Lo直言為了首次做導演,犧牲了不少睡眠時間。(圖片來源:[email protected]
盧瀚霆 Anson Lo指拍攝MV時9成都係綠背景,令花姐一度好擔心出來的效果會變成卡通片!
Anson Lo指拍攝MV時9成都係綠背景,令花姐一度好擔心出來的效果會變成卡通片!(圖片來源:[email protected]

即睇Anson Lo謙虛直認唱歌較遜色:要啲時間改善!

教主自認唱歌難聽,好謙虛!

撰文:東方新地圖片來源:[email protected]_do_cheng、[email protected][email protected][email protected]資料或影片來源:[email protected]商業電台

最新吃喝玩樂資訊