森美親自解話露「啷啷」事件 爆老婆嫌佢下面唔夠挺

影視娛樂

廣告

新一輯《森美旅行團》,森美再有突破, 孖另一主持丁子朗一齊打相撲,拍檔麥美恩就大爆有人拍攝時走「啷啷」,本刊向森美求證,對於走「啷啷」一事,他受訪時猶有餘悸:「始終係打相撲,會被揈嚟揈去,揈得最嚴重時,都驚走咗出嚟!」

撰文、圖片:東方新地

森美節目激罕露股被老婆嫌棄唔夠挺

對於走光一事,日前森美由電台收工,去土瓜灣車行,接受本刊訪問時坦言拍時的確好擔心:「始終係打相撲,打鬥時被揈嚟揈去,揈得最嚴重時,都驚走咗出嚟!」節目出街,森美坦言老婆睇後,大彈他個股唔夠靚!森美對本刊謂:「之前冇同太太講,不過佢睇完節目,就話我個籮柚唔夠挺,唔係優質股,聽佢咁講,我早知操埋個籮柚!」愛妻號森美聽到老婆對佢body咁唔滿意,立即謝晒,一再不甘心話操漏了pat pat!愛妻號森美,平日自信爆棚,老婆一句話就是他最大死穴!

足本訪問內容森美:為咗收視願意拋個身出嚟

記:節目上打相撲,拍之前有冇刻意操fit?

森:拍之前當然操吓唔可以太肥!激鬼死!如果操埋個股就Perfect!

記:係咪入行最激一次?
森:我覺得唔係好激,好普通啫!我都喺節目度話,我仔都生埋,朗朗(丁子朗)就慘啲,話晒小生嘛!大把前途,露出優質股,付出好大!

記:麥 美恩話,睇到露「啷啷」喎?有冇擔心?
森:唔擔心,睇相應該睇唔到,不過,朗朗拍時好大動作,導演又嗌出咗嚟,我聽到嗌「啷啷」!都驚咗一驚,其實係嗌朗朗「啷啷」!後尾佢都收正番!咁拍時都擔心嘅!始終係相撲手,打鬥時揈嚟揈去嘛!揈到最嚴重時,我都驚走咗出嚟!我都掩住,有啲擔心!

記: 拍時怕唔怕塊布遮唔晒?

森:唔會,好大條㗎!我哋睇前面,比起泳褲仲多 布,不過,後面嘅話,中間就睇唔到啦!但兜底嘅兩邊籮Pat仔就露咗出嚟!OK嘅,我嫌 自己唔夠壯啫!

記:會唔會好辛苦,係咪男人最痛?
森:唔會,佢唔係一條線,係一塊布,兜嘅時候分散咗力,都唔係好勁!

記:今次露咁多,下次會唔會再激啲?
森:上 次浸溫泉,都差唔多少布,打咗個「禁」 字,唔多覺啫!不過係有啲陰功嘅,好多旅遊節目都係靠女仔浸溫泉,唔知點解,我哋節目就靠我同朗朗!咁我哋都好錫住啲女團友,佢哋滑水都全身冚住,嗰日Ratings(收視 率)幾好,所以佢哋愈多布Ratings愈好,我哋男仔,布愈少Ratings愈好!無法啦!為咗收視,我哋要拋個身出嚟!

記:係咪你哋胸肌靚過佢哋?
森:靚就唔敢講,但係就一定大過佢哋!靚或者係佢哋靚啲!

記:滿唔滿意出嚟效果?
森:我係比上一輯大隻,上次冇專登操!因為知道有朗朗,大家睇佢就得,第一輯自己就有操,今次知道要打相撲,都操fit少少,減少啲脂肪,咁朗朗廿𡃁歲,操fit好易,我呢啲要塞睡袋、枕頭先整得大個胸。事前唔知相撲手咁肥,早知我就儲肥啲,依家似兩個大BB「押」 咗尿布!

記:拍之前有冇同老婆備案?
森:冇備案!不過佢睇到,都話我籮柚唔係好挺,我冇操到籮柚,聽佢咁講,我早知操埋籮柚,我女人得一個目的,等我出去拋頭露面,不過我好樂意嘅,囡囡就冇睇,第二朝要返學,太太都讚好睇,有嘢學到節目又好笑!

同丁子朗鬥大隻森美自操變成功型佬

同22歲丁子朗鬥大隻,身形線條依然贏盡正評,森美為演出 確實下了不少功夫。其實近年keep住六嚿腹肌同人魚線的他,減磅變大隻仔,全因17年接拍電視劇《誇世代》,為演活拳手角色,他便花了三個多月時間狂操,憑健康飲食、做gym同運動三管齊下。據知情者透露:「佢冇跟健身教練,靠上網搜尋資料及短片參考,每日又計準食量攝取嘅卡路里,佢好有自制能力,食嘢好健康,雖然依家森美46歲,要花嘅時間,體力比後生多,但可以拍
住廿幾歲丁子朗都冇比下去,老婆又鍾意,依家佢咁健碩,所以幾辛苦都keep住!」 得索賢內助背後支持鞭策,森美梗係有正能量變身成功型佬!

最新吃喝玩樂資訊