69鹹片, 必屬佳品 @ 梁栢堅

梁栢堅講解：咩係「臠」

1969年嘅鹹片，第一樣入眼球反而係個英文名Forbidden Beauties，個名食緊紫禁城Forbidden City，再Google下，真係搵到，意大利導演Mino Loy1964年拍嘅。

好喇，明明係鹹片，身為文字人，都會先用上半身去研究下，究竟個「臠」字係乜? 照上文下理，有邊讀邊，應該係個「慾」字啩 ?《禁慾俱樂部》好合理呀。錯! 個「臠」字原來係讀「戀」，乜戀要禁臠?

每日一字上身：臠，係古字，解一小塊肉，二千年前漢朝已經用緊，「禁臠」者，即係「獨自佔有而唔同其他人分享」，鹹片，改名條友都可以咁古雅，六七十年代獨有文化，禁臠有型！

之但係，同時間又有好多市井抵死字眼「水火蕩女海上挑情」之類，又講明「電檢處交帶，唔啱細路睇，認真對唔住」，廣告用字咁活潑，用返傳神廣東話，一聽就有畫面。

當年報紙，有件鬼妹著住泳衣，已經令血氣方剛嘅年輕人興合合，喂唔爭在教多個，正寫應該係㷫熻熻，係囉呢個欄鹹得嚟又幾學術下。