梁敏巧晒合照放閃竟出意外！參賽者Eddie唔記得女神叫咩名超尷尬

梁敏巧IG晒相放閃 阿matt手信勁Sweet

《女神配對計劃》令梁敏巧與葉蒨文、李芷晴、關嘉敏和羅毓儀等結緣成為好姊妹，感情深厚。梁敏巧今日就喺IG分享多張節目花絮相，並寫道：「原來真係無乜時間影相～」

相中可見佢同葉蒨文頭貼頭合照，更特別標註呢張相係由Eddie親自操刀，可見當時眾人關係融洽。最閃嘅一張，莫過於梁敏巧大方晒出佢嘅配對對象阿matt送贈嘅日本手信，睇嚟二人關係喺節目後依然有進展，認真Sweet爆！好姊妹葉蒨文亦留言回覆，印證二人好感情：「除咗group Photo我都係淨係同咗你影😂 我連同男仔影都冇」。

Eddie唔記得梁敏巧個名 尷尬自嘲老人癡呆

網民又在留言區講返昨晚（11日）參賽者Eddie參與互動直播時，似乎對梁敏巧相當唔熟，唔記得女神個名，引發網民瘋狂留言取笑：「sophie個朋友 叫咩名」、「Eddie話唔記得你咩名笑死我」。

面對網民狙擊，主角Eddie亦親自現身留言區解畫，佢極力澄清自己只係一時精神唔好，尷尬回應：「嗰兩日瞓得少..有啲間歇性老人癡呆..記性差咗少少唔好意思🥹我而家好清醒！我記得嫁啦」、「我呢啲係有眼無珠！入camp第一日冇戴眼鏡，所以睇唔清楚！之後睇返清楚而家好記得！」。呢次「失憶」事件，意外為《女神配對計劃》帶嚟新嘅話題，唔少人都話估唔到節目完咗仲有咁精彩嘅後續！