【長命百二歲2】方東昇孝順又愛妻 老婆仲要係初戀女友

編輯：CC｜圖片：新傳媒、節目截圖、Facebook｜撰文：Louis

方東昇「中大才子」一級榮譽畢業

1976出世的方東昇現年42歲，98年加入無線新聞部任實習記者，99年畢業於香港中文大學新聞及傳播學系，並以一級榮譽畢業，更獲得新亞書院獎學金最高榮譽誠明獎，故有「中大才子」之稱！為人不但風趣幽默，而且又有內涵，難怪在《世界零距離》中咁出位！

初戀女友變老婆

方東昇曾在《世界零距離》中講過「抱得美人龜」呢個食字Gag，而佢本人早在2006年已經「抱得美人歸」！另一半係舊同事吳先瑩的妹妹吳先玲，仲係方東昇的初戀情人！據知方東昇26歲先開始初戀，一個條件咁好的人，之前竟然從未拍過拖，連身邊朋友都難以相信。

話說早年前無綫主播吳先瑩結婚，中大同學兼同事的方東昇為婚禮擔任司儀，結果就遇上為姐姐做伴娘的吳先玲。方東昇對吳先玲一見傾心，展開猛烈的追求攻勢，例如參加女方的教會聚會，爭取見面機會。拍拖四年後成功「抱得美人歸」，亦成為了基督徒。

外母早認定方東昇做女婿

作為「才子」方東昇的另一半，外表斯文的吳先玲係一位運動健將，小六時已加入香港乒乓球代表隊，為港爭光。不過因順從爸爸的意願，所以在中文大學英文系畢業後，就成為了中學老師，任教英文。而吳先玲與方東昇未認識之前，有日吳媽媽在電視上睇到方東昇報道新聞之後，大讚：「這小伙子真不錯，我有這樣的女婿就好了！」結果吳媽媽的願望竟能成真撞正口卦，相信佢一定好鐘意呢個女婿。

方媽媽係才女徵文比賽奪冠

方東昇除了對老婆好，仲係一名孝順仔。方東昇2000年時與媽媽聯名買樓，以268萬買入青衣海欣花園一個單位，婚後仍堅持與母親一齊住。兒子係「才子」，原來方媽媽都係一名「才女」，同方東昇一樣文筆極好，仲曾經在公開徵文比賽中贏得冠軍，果然係「有其母必有其子」！

方東昇係兩婆媳「共同敵人」

雖然方東昇經常都要周圍飛，做採訪工作。但老婆同媽媽相處非常融洽，冇乜拗撬，令佢非常放心。方媽媽在一篇名為「方老太寫給方太的信」中透露，兩婆媳有共同興趣，鐘意一齊下棋打乒乓波，亦有共同敵人 — 方東昇！方媽媽話方東昇經常掛住工作，唔肯休息，所以兩婆媳就會夾計迫佢唞，好有默契！「才子」方東昇有個好老婆之餘，又有個咁叻咁有才華的媽媽，真係令人羨慕。最緊要係一家人可以相處融洽，無婆媳糾紛，好幸福！