愛回家｜周嘉洛吳偉豪參加《單身落地獄》中伏！幻想與美女拍拖慘變中年配對 網民：笑到抽筋！

城安凌凌被嫌棄 決心參加真人騷增經驗

故事開端源於凌凌（吳偉豪飾）為城安（周嘉洛飾）拍攝一場表白戲，但女演員竟然當場質疑點解表白後冇接吻戲，更一針見血指出兩人單身太耐，完全冇戀愛經驗，搞到成場戲勁唔自然！為咗搵返真實嘅戀愛感，增進演技，佢哋聽從阿壯嘅建議，決定鼓起勇氣報名參加城中大熱嘅戀愛綜藝節目《單身落地獄》，希望可以喺節目中學返一招半式，順便脫單！

周嘉洛吳偉豪幻想與美女擦出火花

成功入選後，城安同凌凌簡直係開心到彈起，仲開始幻想節目中嘅美好畫面！佢哋以為自己會好似《單身即地獄》嘅男主角一樣，被一眾年輕貌美嘅女嘉賓包圍，日日都可以談情說愛，大玩浪漫遊戲，喺鏡頭前盡情揮灑男性魅力。兩人仲互相打氣，期待可以喺節目中搵到真愛，擦出激烈火花，點知呢個美夢好快就變成一場估你唔到嘅噩夢。

《單身落地獄》驚變《夕陽西下說愛你》

當城安同凌凌興奮地到達拍攝現場，先發現個節目名唔係《單身落地獄》，而係叫《夕陽西下說愛你》！更震撼嘅係，現場嘅嘉賓全部都係中年人，當中仲有「著名惡人」陳法拉（角色名），完全唔係佢哋幻想中嘅陽光與海灘同青春美女。呢個驚天大反轉令兩人當場嚇到呆咗，意識到自己似乎上錯賊船，由脫單天堂跌咗落地獄，場面極度尷尬又搞笑！

巨額賠償嚇窒二人 焗住留低玩殘局

正當城安同凌凌想即刻抽身走人時，先發現已經太遲！節目組拎出合約，表明如果中途離場，將會被索取巨額賠償金，嚇到佢哋即刻腳軟。無可奈何之下，兩人唯有「焗住」留低，打算用「食花生」嘅態度hea爆完成拍攝。不過，喺冷眼旁觀其他參加者嘅過程中，佢哋發現有人為咗贏而出陰招，但背後竟然另有內情，事件嘅發展更令佢哋對愛情同人生有咗一番新嘅反思。

網民激讚劇情爆笑 抽水抽著火水

今集播出後即刻引起網民熱烈討論，大家對《愛回家》再次「抽水」成功表示激讚！唔少網民留言話「今集真係笑到我肚痛」、「周嘉洛同吳偉豪個樣勁絕望，好好笑」、「編劇真係好嘢，咁都諗到」、「完全係夢想與現實嘅殘酷對比」。更有網民笑指呢個情節好寫實，「好似平時啲交友app中伏經歷」、「期待佢哋點樣喺中年配對節目生存落去」，大讚劇情夠貼地又充滿驚喜！