不斷更新！散場必讀！《復仇者聯盟3》劇透、彩蛋、死亡名單、Captain Marvel 續集上映時序 FAQ 大合集！
撰文：對白Cap圖王｜圖片：劇照｜編輯：素岐@Central
MARVEL 發布《Avengers: Infinity War》「劇透死全家（Say No to Spoilers）」最新彩蛋預告：
唔好話冇提醒大家啊！「劇透、彩蛋」只供已經入場但記性唔好嘅巴打回味欣賞！你唔碌落去無人迫你睇呀：
以下開始準備劇透啦！！！！
方便巴打討論劇情，想傾番今集彩蛋、邊幾個角色死咗、戲入點死，直接睇最尾 FAQ11 》
低級劇透（不含劇情彩蛋）FAQ
Q1 | 套戲有幾長？
149 分鐘！ 睇埋廣告及片尾彩蛋接近兩個半小時！記得屙淨尿先好入場！
據報不同場次都有急尿觀眾行出行入，如果想搵小便位，建議你喺銀河守護隊初出場未遇到障礙物時先去屙尿，損失會比較少！
Q2 |應唔應該睇 3D 版？
今集有好多大戰場面（比Civil War起碼打多四場！），若你追求體驗有如置身於現場的感覺，推介大家搵間音響好啲嘅戲院，相信會震撼得多。
Q3 | 有冇 End Credits 片尾彩蛋？
係有嘅！End Credits 彩蛋只有一條影片，唔算好長，要等所有工作人員字幕出晒先至睇到！記得坐到尾，不過中間可以小個便先！（入咗場嘅你如果唔記得睇片尾彩蛋，不妨留意下面文字描述⋯⋯）
Q4 | Stan Lee有冇客串 ？
無咗 Stan Lee 就唔係Marvel啦！至於喺邊一場，就唔講住，反正今次無《雷神3》咁驚喜，普通亂入咋！
Q5 | 《復仇者聯盟4》幾時上？
暫定係2019年5月3日！想睇《復仇者聯盟4》如何打殘 Thanos 起碼等一年！不過第4集大部分拍攝已經完成，說不定會好似 《復仇者3》咁提前上映！（ 本來排喺今年5月上畫，結果提早咗個幾星期！）
Q6 | 《復仇者聯盟4》會叫咩名？
未知！睇完第 3 集《 Infinity War 》，片尾彩蛋都無公布第4集戲嘅戲名！
導演曾經預告 「第 4 集戲名勁到爆炸 」！又由於盛傳第4集將會有穿梭時空、扭轉今集戰局的劇情，有網民戲稱「可能叫做《 Avengers 4 : Back to the Future 》！」
Q7 | 好攰呀！喺《復仇者聯盟3》同《復仇者聯盟4》之間仲有咩戲？
2018年7月將會有《蟻俠2 》 ⋯⋯
2019年3月8日婦女節上映《Captain Marvel 》⋯⋯
一望佢個心口，有入場睇到尾你就知咩事⋯⋯
Q8 |《蟻俠2 》到底發生喺Infinity War之前定之後？
《蟻俠2 》預告早在《Infinity War》上映前已推出，劇情主要係交代 Antman 在 美國隊長 幫忙逃獄後回到家中，卻再度淪為逃犯、帶上電子腳鐐，居家監禁，眼看刑期終於快服滿，彭博士和可兒「黃蜂女」又帶著危急的任務找上門，Antman 再次穿上蟻俠裝束打擊黑暗勢力⋯⋯估計彩蛋將會遇上《Infinity War 》的毁滅性結局！
Q9 | 今集有冇景甜？
香港版係無嘅，大陸版就唔知。
Q10 |《驚奇女俠》到底係咩人？《Captain Marvel》會講啲乜？
作為漫威首位女英雄，《Captain Marvel》會交代佢嘅身世，時空背景將設定於 90 年代，「粗口達人」Samuel L. Jackson飾演嘅神盾局領導人 Nick Fury 都會參演，盛傳電影會交代 Nick 如何變單眼佬！
講番《Captain Marvel》本人，根據漫畫係「超級屈機」角色，設定相當於「Marvel的神奇女俠」！唔止識飛天穿梭宇宙咁簡單，因為繼承咗外星人 Kree 族的能力，擁有超人的力量、速度、耐力、防禦力、感官和恢復力！有傳佢喺電影尾段會離開地球，所以MCU嘅世界呢十年嚟都唔見佢嘅蹤影，直至⋯⋯
警告：未睇唔好碌落去！
未睇唔好碌落去！
未睇唔好碌落去！（重要所以要講3次）
超級劇透 散場必問FAQ
Q11 | 今集 End Credits 片尾彩蛋講啲乜 ？
話說片尾講到 Thanos 滅霸得逞，Avengers死得人多，神盾局長搵唔到 Tony Stark，發現情況危急，口頭指揮手下搵鷹眼幫手嘅同時，自己撳機搵幫手，對白無交代佢搵邊個，但部 call 機就顯示咗下一個女英雄 「 Captain Marvel」嘅 logo 出嚟，又要睇多套獨立角色電影，問你怕未？！
Q12 | 今集邊個會死？
戲入面死得人多，早前已經喺討論區有人放雷，發布死人名單：「Loki、黑豹、女巫、幻視、樹人、Dr.Strange、蜘蛛俠、局長，局長助手、星爵、嘉魔娜Gamora、螳螂女、德克斯Drax⋯⋯成個銀河守護隊死淨Rocket 浣熊！！」以上名單都幾準確。
Q13 | 今集 Avengers入面邊個未死？！
之前盛傳戰死的 Iron Man 同美國隊長，到最後竟然無死！有眼利Fans發現，電影世界的「第一代Avengers」全部無喺Thanos魔咒下化灰，全部生勾勾，不過 Iron Man 同 Captain 今集完全未碰面！基情仲有下文！
Q14 | 鷹眼死咗去邊？！
只係有對白交代佢喺 Civil War 之後為咗家人而匿埋咗，同蟻俠一樣，今集無出過場！
Q15 | 邊個死得最先最轟烈？
電影序幕無耐、戲名都未出，Loki就已遭 Thanos 滅霸徒手錬死！邪神 Loki 為保雷神而獻上宇宙魔方（藍色空間寶石）講出復仇者名句「We have a Hulk」之後仲徒手刺殺Thanos，可惜功敗垂成，Thanos錬死洛基後，仲講到明「今次無得復活」！唔怪得Loki宣傳時留晒鬚！終於可以拍第二啲造型嘅戲！
早在 2017 年中嘅ComicCon，Marvel的「秘密預告片」已經向忠實Fans流出蜘蛛仔對 Iron Man 道歉一幕，不過其後所有宣傳都刪走這一幕，結果亦成為電影中令人動容一幕，一直想保護蜘蛛仔嘅 Tony 眼見佢化灰，萬分內疚！
Q17 | Thanos 滅霸有冇儲齊 6 粒寶石？
有！今集一次搞掂！然後一啪手指，半個宇宙果然會死晒！
Q18 | 電影入面儲齊 6 粒寶石嘅搜集次序係⋯⋯？
按次序為「紫》藍》紅》橙》綠》黃」，即是：
1.「力量寶石」（由 Thanos 於 Xandar 星球被搶走 – 電影無交代）〉
2.「空間寶石」（由 Loki 為救 Thor 奉獻 ）〉
3.「現實寶石」（由 Thanos於收藏家手上搶走，順手搶走埋養女 Gamora）〉
4.「靈魂寶石」（ 詳見 Q19 ）〉
5.「時間寶石」（由 Doctor Strange 為救 Iron Man奉獻 ）〉
6.「心靈寶石」（由 Vision 額頭割出嚟！）
Q19 | 「靈魂寶石」喺邊個手上？
之前十幾套戲都無交代過嗰粒橙色嘢 —— 靈魂寶石（Soul Stone ）原來收埋喺一個唔知咩星球，Thanos 滅霸養女嘉魔娜Gamora為咗唔想Thanos統一宇宙，所以將藏寶圖燒咗，但最後Gamora都係因為衰心軟同救細妹Nebula而爆料；由於「靈魂寶石」要用「一命換一命」的去換取，向來被全宇宙視為無情的Thanos ，竟然流住眼淚將嘉魔娜Gamora推落山崖！
Q20 | 「靈魂寶石」竟然由呢個舊角色守護？
第一集《美國隊長》的奸角 Red Skull 向來是漫畫中人氣超強的奸角 級角色，但自第一集CA無厘頭畀「宇宙魔方」吸走後去向不明，來到 Infinity War 才揭曉原來未死，吸咗去收藏「靈魂寶石」嘅異域，喺今集無乜表現，到底Gamora攤喺山崖底下嘅死屍是否真死，今集亦無特別說明！
Q21 | Thanos 最後去咗「菲律賓」隱居？！
電影最後，「完成大業」的 Thanos 現身一個不知名星球，於貌似農村小茅屋的建築，坐低欣賞日落，這一幕意念來自漫畫《Infinity Gauntlet》，講 Thanos 自我放逐去做農夫；戲入面的梯田風景，原來唔係CG，而係位於菲律賓北部的「巴拿威梯田（Banaue Rice Terraces）」，參與提供航拍片段的製作公司 Indochina Productions 近日更於 fb 出帖感謝參與的工作人員。不過劇情未有交代那是否 Thanos 家鄉，想知後續發展就要等《Avengers 4》了！
將來還有什麼演唱會值得留意？
有不少歌手宣布舉辦演唱會，小編為你整合了香港演唱會+搶飛攻略一覽，包含各演唱會優先購票日期、公開售票日期、門票價錢、座位表等，想搶飛粉絲必定要留意！
