重溫51歲鄭伊健90年代靚相 古惑仔「陳浩南」瀟灑不羈25年！

撰文：東方新地｜圖片：東方新地（原文刊自《東方新地》）｜編輯：eunice

重溫51歲鄭伊健90年代靚相

93年 陽光男孩

93年初26歲嘅鄭伊健已作歌影視三棲發展，依然以88年出道以嚟嘅短髮 look示人，短頭髮嘅伊健予人清爽健康充滿陽光氣息嘅感覺。

93年 因病留長髮

93年尾鄭伊健拍劇集《射鵰英雄傳之南帝北丐 》時因病休假，因懶打理令頭髮愈嚟愈長，伊健覺得幾好睇就 keep住留唔剪短，呢個長髮襯一身三件頭孭西裝動作，份外瀟灑有型。

94年 長髮旺事業

94年初鄭伊健憑第三張專輯《 On Stage 》大賣而爆紅，令伊健深信長髮為佢帶嚟好運兼有利事業，一留就留咗廿五年成為佢嘅標誌，相中嘅佢西裝褸鈕只扣一粒，放蕩又不羈。

95年 出首本寫真集

95年鄭伊健出版首本寫真集《 natural 》，由朱祖兒擔任美術總監，全書喺日本取景，充滿田園氣息，加上精裝厚皮製作，相當揼本。

96年 演古惑仔爆紅

鄭伊健96年迎嚟事業大突破，憑改編漫畫嘅電影《古惑仔 》黑幫洪興銅鑼灣揸 fit人陳浩南一角爆紅，一身紋身有型有格、有情有義，成為伊健最經典代表作。

98年 《風雲》飄逸聶風

鄭伊健98健接演改編自馬榮成經典漫畫《風雲》，扮演英俊瀟灑、玉樹臨風、剛正不阿嘅「風中之神」聶風，飄逸feel形神俱似，至今冇人能夠超越佢。

99年 《中華英雄》華英雄

馬榮成經典漫畫《中華英雄》99年搬上大銀幕，搵嚟鄭伊健演繹命格天煞孤星嘅主角華英雄，片中一頭白髮，嗰份滄桑孤獨cool爆感比起何家勁版有過之而無不及。

熒幕情侶陳松伶

鄭伊健嘅最佳熒幕情侶絕對係陳松伶，91年至 95年間兩人合作了七部電視劇，大部分都係演情侶，成為當時最受歡迎熒幕情侶，睇番《92 鍾無艷 》嘅劇照，兩人相當合襯。