黎明演唱會
黎明演唱會

黎明演唱會|黎明與林海峰精彩對話足本睇 黎明講家事 爆屋企XX好重?

影視娛樂

廣告

一連九場《Leon黎明Talk & Sing 2021紅館演唱會》昨晚假紅磡香港體育館開鑼,寰亞娛樂老闆林建岳博士、「大劉」劉鑾雄與太太陳凱韻(甘比)、陳慧嫻、蔡一智、胡定欣、胡蓓蔚、DJ Donald等捧場。林海峰(Jan)擔任首場表演嘉賓,大爆黎明(Leon)全新金句「噏 To U」,令全場爆笑!

文:東方新地|圖:演唱會發相

黎明介紹Talk Show大師:有一個洗咗手

天王黎明(Leon)首次在演唱會開設Talk Show環節,在介紹嘉賓出場時亦與眾不同,他說:「香港做Talk Show有幾個大師,有一個大師就洗咗手,另外仲有一個今日嚟咗。所以見到大師,大師講嘢我哋唔好出聲,呀,你哋可以出聲,但我唔好出聲。大師叫我出聲,我先至出聲。大師今晚準備咗啲點畀我,令我更明嘅,高人點路。『嘉賓』通常係『請』嘅,升上嚟嗰啲叫『等嘉賓』,我示範一次咩叫『請嘉賓』,我落去。」語畢Leon降到台底,親自陪林海峰上台,全場尖叫。

Leon介紹嘉賓林海峰係香港其中一個Talk Show大師。(圖片來源:演唱會發相)
Leon介紹嘉賓林海峰係香港其中一個Talk Show大師。(圖片來源:演唱會發相)
林海峰尚未現身,Leon就先拋出金句:「大師今晚準備咗啲點畀我,令我更明嘅,高人點路。」(圖片來源:演唱會發相)
林海峰尚未現身,Leon就先拋出金句:「大師今晚準備咗啲點畀我,令我更明嘅,高人點路。」(圖片來源:演唱會發相)
Leon話要示範「請嘉賓」,所以親自降到台底,陪林海峰上台。(圖片來源:演唱會發相)
Leon話要示範「請嘉賓」,所以親自降到台底,陪林海峰上台。(圖片來源:演唱會發相)

林海峰 闊別紅館兩年

林海峰上台叫Fans歡呼,說:「畀啲聲聽吓先,我好耐無嚟紅館,兩年啦!大聲啲歡呼聲,噓聲都得架,兩年都冇聽過。」全場起哄。他對Leon說:「你邀請我嚟,我好大壓力。(點解呢?)因為第一場嘛,我驚令大家失望。(觀眾大叫『唔會』)聽落好似有少少失望,不過唔緊要,少少失望,喺今日嚟講已經係好有希望㗎啦!」

林海峰話已經兩年無嚟紅館。(圖片來源:演唱會發相)
林海峰話已經兩年無嚟紅館。(圖片來源:演唱會發相)

「實不相瞞,Leon邀請我嘅時候,我第一時間推,因為『金句王』面前,叫我嚟真係獻醜。但無辦法,Leon直情打電話嚟,等我畀啲證據大家聽吓。」然後林海峰拿出手機,播出Leon給他的Whatsapp語音留言:「阿Jan,Leon呀,方唔方便同我通個電話講兩句?」林海峰說:「我收到呢個電話嗰陣,仲以為銀行打嚟,我話我唔使借錢。」

林海峰講嘢時,Leon借機休息狂飲水。(圖片來源:演唱會影片截圖)
林海峰講嘢時,Leon借機休息狂飲水。(圖片來源:演唱會影片截圖)

噏咩?Leon:Up To You

林海峰坦言與Leon私下不相熟,他說:「記唔記得我哋通電話,我唔知同你講乜,因為其實我同Leon係唔熟,我話:『Leon,噏乜嘢?』Leon同我講:『Jan,噏咩?Up To You啦!』佢係九秒九彈嚟!『噏咩呀?Up To You!』呢句嘢,我諗吓都真係幾好用㗎喎!」

林海峰話初時收到Leon電話,以為係銀行打嚟問佢使唔使借錢。(圖片來源:演唱會影片截圖)
林海峰話初時收到Leon電話,以為係銀行打嚟問佢使唔使借錢。(圖片來源:演唱會影片截圖)

他立即以Leon全新「金句」套用於日常生活中,說:「例如情侶,另一半問你:『噏咩?』咁你點答?『Up To You啦!』如果同人嗌霎,車厘子你嘅時候,你話:『你噏咩呀?』『Up To You啦!』你即刻收聲。即係呢一個回應,既賓賓有禮、大方得體得嚟,有啲浪漫不羈,同埋有啲挑釁性。直情有啲似小學嗰啲『反彈閘住』。咁佢話『Up To Me』咁我話OK 返去諗吓啦,到時綵排再話俾你聽點樣啦!」

林海峰話可以將Leon新金句「Up To You」套用喺日常生活中。(圖片來源:演唱會影片截圖)
林海峰話可以將Leon新金句「Up To You」套用喺日常生活中。(圖片來源:演唱會影片截圖)

「綵排綵排,都不及天意安排」

然後林海峰爆出Leon另一金句:「綵排綵排,都不及天意安排」全場掌聲,他說:「呢次係九秒八。即係黎明開Talk Show嘅話呢,佢一場噏咩呀?Up To You啦!個Show可以即刻完,然後啲笑聲由八點半一路笑到十年之後,我呢啲度幾個月,噏咗兩個鐘頭,啲笑聲呢度講呢度散。『綵排綵排,都不及天意安排』真係金中之金,畀啲掌聲!所以話『金句王』面前我無辦法可以發揮到好大,但無辦法啦,天意安排咗我嚟⋯⋯其實係黎明安排我嚟。上次好多謝Leon邀請我參與《顧家》MV拍攝,上次Hit rate係咪好高?唔關我事。」

林海峰爆出Leon另一金句:「綵排綵排,都不及天意安排」(圖片來源:演唱會影片截圖)
林海峰爆出Leon另一金句:「綵排綵排,都不及天意安排」(圖片來源:演唱會影片截圖)

指屋企姐姐煮餸麻

話題一轉到家事,林海峰說:「上次拍MV我哋冇乜機會同你傾吓啲屋企嘢,依家可唔可以傾吓?」Leon大方地說:「得,你講呀!」林海峰說:「Up To Me呀嘛!點呀,屋企好嗎?(大家都好)細蚊仔好嗎?(都好)太太好嗎?(好呀)屋企姐姐好嗎?(OK啦)同我一樣,我完全明白。(煮餸麻麻⋯⋯)唔係呀,係全屋企都女人,屋企陰氣好重。」Leon點頭。

黎明罕有講家事,認同林海峰話全屋企都女人,屋企陰氣好重!(圖片來源:演唱會發相)
黎明罕有講家事,認同林海峰話全屋企都女人,屋企陰氣好重!(圖片來源:演唱會發相)

三歲女拒搵Leon影相

林海峰笑說:「有日我諗,天王全部都生女?(暫時見到係)有趣嘅係:天王生女,佢個女係唔會成為天王嘅Fans,雖然我唔係天王,我都係過來人,可以同你分享吓。舉例,劉德華千金大概十歲左右,我諗佢唔會唱《一起走過的日子》!舞台皇者嘅小朋友好似得幾歲?(好似同我嗰個差唔多大)幾歲應該係聽《Baby Shark》,如果老竇日日Generation X,真係唔知做乜X㗎嘛!(無錯)你個小朋友幾多歲?(三歲)你返屋企佢會唔會對住你大叫『LeonLeon』?(唔會)有冇搵你影相?(唔會)會唔會搵你簽名?(唔會)會,遲啲會簽喺家課冊!佢唔會成為你嘅Fans,但黎明會成為佢嘅Fans!」

問到屋企三歲女兒有冇搵過Leon影相?Leon答冇。(圖片來源:演唱會發相)
問到屋企三歲女兒有冇搵過Leon影相?Leon答冇。(圖片來源:演唱會發相)

他對台下觀眾說:「舊時你哋喺阿Mark嘅Studio、電視台、電台門口等Leon,有一日你就會見到Leon喺幼稚園門口等緊佢個女,每一日好似你哋舊陣時等佢咁樣『出嚟未呀?』『等咗好耐啦喎!』『出嚟啦,出嚟啦,哎呀上咗車,跟咗媬母走咗!』然後到佢開騷,你就好似Fans咁撲飛,嗰個騷就係幼稚園畢業禮,即係雜錦騷,你炒飛都會買,坐家長位,個小朋友台上表演,唱快歌跳舞,隻手揈吓揈吓,好熟面口?口擘擘咁!」

林海峰分享了黎明演唱會的後台花絮。(圖片來源:林海峰IG)
林海峰分享了黎明演唱會的後台花絮。(圖片來源:林海峰IG)

林海峰扮Leon唱快歌

林海峰扮Leon唱快歌時台風,全場爆笑,又說:「你成為Fans就會讚佢:『哎呀,跳得好好呀,好型呀!』Fans嘛,然後幫佢影相,實Q阻住就同實Q開拖,跟住追車,追校巴啦,送花俾佢、送公仔、送湯呀,送佢返學、送佢去公園玩。然後有一日會見到Leon騎住架單車喺公園走嚟走去追佢個女,就好似《甜蜜蜜》黎小軍咁樣傻痴痴。」

黎明首場嘉賓找來林海峰,「林狗」與LEON合唱姜濤的《蒙著嘴說愛你》現場旋即盛傳姜B有機會於尾場壓軸嘉賓!(圖片來源:Donald IG)
黎明首場嘉賓找來林海峰合唱姜濤的《蒙著嘴說愛你》,令現場氣氛High爆!(圖片來源:Donald IG)

林海峰續說:「然後小朋友開始長大,進入青春期,化妝、梳頭、日日匿埋喺房、玩手機,呢個時候你知道:有咗第二個⋯⋯『豹哥』,於是乎黎小軍就喺房門口『行近 我又怕驚動你 我又怕心難死』⋯⋯」林海峰突然走音,觀眾爆笑,他解釋:「點解走音?佢喝我下次叩門先可以開門呀!『立定決心以後分離 一生裡頭 誰是我的心中最美⋯⋯』對住佢個女唱『往日的你』!」又說:「天王生女,最吊詭佢唔會成為天王Fans,佢個女最終會成為另一個男人嘅Fans。塵世間最痛苦莫過於此!就好似將『最受歡迎男歌手獎』畀咗嗰條仔咁,攞去啦,同埋個女一齊攞去呀,呢啲叫做『樂壇傳承』呀!」林海峰妙語連珠,令全場爆笑。

姜濤在IG連出兩個Story表示感激黎明與林海峰的合唱,其後再轉發當奴拍攝到的角度。(圖片來源:姜濤IG)
姜濤在IG連出兩個Story表示感激黎明與林海峰的合唱,其後再轉發當奴拍攝到的角度。(圖片來源:姜濤IG)
陳慧嫻等人都有到場欣賞黎明Talk Show加演唱會。(圖片來源:演唱會發相)
陳慧嫻等人都有到場欣賞黎明Talk Show加演唱會。(圖片來源:演唱會發相)
胡定欣和「豹嫂」胡蓓蔚結伴捧場。(圖片來源:演唱會發相)
胡定欣和「豹嫂」胡蓓蔚結伴捧場。(圖片來源:演唱會發相)
「大劉」劉鑾雄與太太陳凱韻(甘比)一同現身。(圖片來源:演唱會發相)
「大劉」劉鑾雄與太太陳凱韻(甘比)一同現身。(圖片來源:演唱會發相)
仲有蔡一智等人。(圖片來源:演唱會發相)
仲有蔡一智等人。(圖片來源:演唱會發相)
寰亞娛樂老闆林建岳博士。(圖片來源:演唱會發相)
寰亞娛樂老闆林建岳博士。(圖片來源:演唱會發相)
除了親臨現場,陳慧嫻亦有致送花牌。(圖片來源:演唱會發相)
除了親臨現場,陳慧嫻亦有致送花牌。(圖片來源:演唱會發相)
仲有郭富城、張學友等。(圖片來源:演唱會發相)
仲有郭富城、張學友等。(圖片來源:演唱會發相)
以及劉德華。(圖片來源:演唱會發相)
以及劉德華。(圖片來源:演唱會發相)

將來還有什麼演唱會值得留意?

有不少歌手宣布舉辦演唱會,小編為你整合了香港演唱會+搶飛攻略一覽,包含各演唱會優先購票日期、公開售票日期、門票價錢、座位表等,想搶飛粉絲必定要留意!

香港有甚麼週末好去處推介?

香港18區都非常值得花時間好好探索,一家大細去暢玩的親子好去處、拍拖推介32大情侶好去處、落雨必去的室內好去處、慶生推薦20大生日好去處、新手必備19大靚景行山好去處、秋天戶外露營好去處…..