沈殷怡狂數陳欣妍有公主病 爆拍《美女郊遊遊》要當女友般呵護

沈殷怡和陳欣妍因為拍《美女郊遊遊》而人氣急升，工作不斷，成功締造成組合「Double S」，其後再雙雙在烹飪比賽《辣火頭》中參賽，呢對CP令觀眾相當受落。不過沈殷怡卻在《晚吹- 有酒今晚吹》連環爆料指二人非外界所見的合拍投契，更大數陳欣妍的難頂公主病，令沈殷怡拍攝時感到份外吃力。

沈殷怡覺得陳欣妍好麻煩

主持強尼首先問陳欣妍與女拍檔合作有冇困難？陳欣妍表示沒有，因為讀了十三年女校，習慣與女生相處，但沈殷怡卻唱反調：「坦白講，我其實唔係好習慣﹗」然後不吐不快爆seed：「喺《美女郊遊遊》裡面，我擺明係一個男朋友嘅角色，可能係咁造成。我有時會諗點解身邊嘅女人，可以真係咁女人，覺得佢哋好麻煩，搞到我要好似男朋友咁去處理佢（陳欣妍）。」然後手指住陳欣妍話：「佢都知㗎﹗我好似男朋友咁帶佢去行山﹗」

沈殷怡模仿陳欣妍娃娃聲

陳欣妍反擊：「嗱嗱嗱﹗上山嘅時候係我拉住你㗎OK？」沈殷怡冇理對方搶住話：「（嬌嗲聲模仿陳欣妍講話）你唔好放開我隻手，我要拖住你，都要繑住你，唔得﹗我要十指緊扣﹗」陳欣妍即自辯：「因為我好敏感，要有觸感掂到，我先有安全感﹗」

沈殷怡自爆怪癖愛捉曱甴

沈殷怡繼續冇停口：「可能我份人好逞強，又鍾意去捉曱甴，人哋覺得我唔得我都要做到，總之唔想畀人覺得我係軟弱嘅﹗但係呢位小姐（指住陳欣妍）呢everyday都喺度喊﹗」陳欣妍狀甚委屈話：「我已經用盡我畢生嘅勇氣去完成所有任務﹗」

強尼幫忙解圍：「你見到佢喺《美女郊遊遊》條鼻涕，唔係唔知呀？」沈殷怡再踩多腳話：「你唔係唔知佢每日都喊得好厲害呀﹗你知唔知我每日都要好似去呵護女朋友嘅心靈去對佢，『乖啦﹗冇事嘅﹗』去安撫佢﹗」

強尼又問兩個女仔拍節目可會有比較？陳欣妍話初時都會有這個想法，佢問沈殷怡：「不過拍到中段，你記唔記得，我哋係比較去到叢林有冇去廁所﹗」

沈殷怡爆陳欣妍尿頻

沈殷怡大聲以「呀」回應後，繼續爆料：「因為呢，唔知點解呢位小姐有尿頻習慣﹗呀﹗唔好意思，我爆咗出嚟，我講咗出嚟唔好意思﹗」講完繼續爆：「真係呢﹗就係唔知點解佢一去到深山度就想去廁所，每次roll機未話要去，次次爬到一半就話好想去﹗」

沈殷怡爆全隊crew跟拍陳欣妍叢林如廁

陳欣妍試圖為自己解圍：「咪住先﹗行山係消耗體力，要飲好多水，唔知點解呢位小姐可以全程唔使去廁所，為咗唔去廁所唔飲水﹗」沈殷怡話：「我唔知點解，可能人高大膀胱大啲啩﹗」笑到強尼趴喺度﹗陳欣妍無辜話：「唔知點解每日都想去一次﹗」沈殷怡反駁：「邊止一次﹗」強尼即話：「咁係正常㗎吓話﹗」

沈殷怡再話：「佢一緊張就會飲好多水﹗」強尼問陳欣妍上廁所，會對沈殷怡有何影響？沈殷怡話：「成隊crew開機一齊跟佢去廁所囉﹗」強尼反應極大問：「點解我冇睇到呢part嘅？」陳欣妍話：「拍就拍晒，但唔出得街﹗」

沈殷怡狂數拍檔陳欣妍後，突然話要講句唔好意思，因為當日拍攝《美女郊遊遊》時每一日都筋疲力盡，放工回家休息第二日再開工，根本沒有精神時間跟拍檔溝通，沈殷怡話：「有時會諗係咪拍完我哋就停頓落嚟呢，係咪其實有機會發展可以坐低飲番杯食廚師發辦嘅友誼呢？一路都諗再有冇機會呢？」強尼話：「所以今日就係一個好好嘅契機囉﹗」然後大家舉杯，鏡頭前好似無事發生一樣，開心歎靚酒﹗