日限100個!諾亞即食熱辣辣 半熟蛋糕

飲食

廣告

過江龍諾亞 半熟蛋糕 專門店又有新招!今次係新鮮即製熱食 半熟蛋糕 !店方搵嚟台灣總店甜品師駐場,蛋糕每隔半個鐘出爐一次!仲要係每日限定100個,大坑店先有!到底熱辣辣食會唔會好食啲?記者即刻試食話你知!

記者:蜂蜜味、蛋味都濃好多!

記者今次試嘅係蜂蜜原味,即製版聞落好香,而蛋糕亦比普通版厚少少,半熟流心位置比較多氣泡,無凍食版咁軟滑,但食落去蜂蜜味同蛋味都濃好多,口感有啲黏黏地,又好綿密,同埋味道比較甜,食完會想飲水。

仲有3款口味都可以熱辣辣食

今次一共有4款口味嘅 半熟蛋糕 會有新鮮即製版,包括係蜂蜜原味、朱古力味、伯爵紅茶味同檸檬味,價錢同普通版一樣,每日限量100個,每半個鐘頭出爐一次,每次有8個,如果你咁啱係第9個,Sorry,咁就要等半個鐘啦!另一個問題係,100個裡面4種味道嘅比例點分?會唔會每個口味25個呢?再次Sorry,每日出產的100個 半熟蛋糕 嘅比例不定,出邊款味由甜品師決定,如果你特別想食其中之一款味道,就睇下撞唔撞得啱時間喇!祝你好運!

翻叮無咁正?

呢款即製版半熟蛋糕其實可以帶返屋企叮熱嚟食,如果係即日食,蛋糕只需放室溫,叮30秒就食得,如果係隔日食,就放入冰箱,第二日拎出嚟叮1分鐘,記得買完3日內食晒。但食落似唔似即製版呢?記者試叮過1分鐘後嘅伯爵紅茶味蛋糕,叮完聞落好香紅茶味,食落係微暖,軟心部份得返少少,其他位置都熟咗,相比新鮮即製版係有啲差距,所以有得揀,一定要揀新鮮熱辣辣咁食!

台灣總店甜品師親授!完美焗製秘方

見到特登喺台灣總店過嚟駐場嘅甜品師Emily,就梗係問下有無獨門秘方開心share啦!佢俾咗兩個貼士:

一. 留意焗爐溫度:要將個蛋糕焗得鬆軟,一定要密密留意焗爐溫度同埋時間,避免蛋糕過熟。

二. 識揀食材:選用日本麵粉同海藻糖製作蛋糕,蛋糕質地會較軟身,同埋無咁甜,卡路里較低,食落無咁大罪惡感。

其實除咗材料同爐火之外,最重要都係要有Heart!係!係好老土架!但見Emily堅持要焗好啲蛋糕先至接受訪問,仲密密check住個焗爐,視線離唔開啲蛋糕,就知道蛋糕好味係有原因嘅。

呢個新鮮即製 半熟蛋糕 活動,今個月已經開始咗,依家已經有得食!但暫定推廣兩個月左右,仲有Emily逢星期一放假,所以就無即製版半熟蛋糕賣。如果想試下佢嘅手藝,就要留意時間啦!

諾亞 半熟蛋糕 專門店(大坑分店)
地址:大坑京街17號地舖
電話:2327 2187
Facebook Page:https://www.facebook.com/cakenoahcastella

延伸閱讀
一窩蜂賣芝士撻 最平$8有交易!
香港 Running Man 主題餐廳!無限芝士菜式+偷襲Oppa
新假期周刊 電子書:

ios:https://itunes.apple.com/hk/app/xin-jia-qi-zhou-kan/id722179449?mt=8
Android:https://play.google.com/store/apps/details?id=com.weekendhk.newsstand2&hl=zh_HK
新假期食玩報料:[email protected]
歡迎Instagram / facebook 使用#weekendhk 報料,資料一經選中會為你公告天下!
想最快接收第一手的旅遊飲食資訊?Easy!

1. 先分別讚好「新假期周刊」及「新假期Jetso 」兩個Facebook專頁
2. 在「讚好」按鈕下揀選「搶先看」,搞掂!

香港18區美食有甚麼推介?

新假期編輯已經為你整合了香港18區美食指,其中包括尖沙咀、旺角、銅鑼灣等……即睇更多詳情。

香港有甚麼週末好去處推介?

香港18區都非常值得花時間好好探索,一家大細去暢玩的親子好去處、拍拖推介32大情侶好去處、落雨必去的室內好去處、慶生推薦20大生日好去處、新手必備19大靚景行山好去處、秋天戶外露營好去處…..