7-Eleven
7-Eleven

7-Eleven首間型格Café 坐底食Mix & Match湯麵+窩夫雪糕 |金鐘食乜好|

飲食

廣告

適逢人人重視生活態度嘅世代,連便利店都要慢下來!最近7仔搞「大革新」,開立首間以「創意、健康」為主題的Café概念店,大洗以往只有「方便」、「速食」嘅形象。概念店以黑啡色簡約風格嘅設計,加木造餐桌營造悠閒氣氛外,仲引入「Create your own Noodle Bowl」自選麵檔、專業咖啡師即調咖啡、各款健康早餐同久違了嘅「七仔軟雪糕」!即刻同大家入去睇真D!

黑啡Café 設計 大玩悠閒風

率先睇吓店鋪設計,以黑、啡色為主調,並以黃燈配合,同平時只以白色、簡單設計嘅7-Eleven形象的確大有出入,仲連員工服都換上全黑制服,夠哂醒目!唔講真係未必知呢間係「7仔」,仲以為係另一間連鎖咖啡店。

店鋪內外均設有座位畀人慢慢坐、慢慢食。

自選麵檔 廿款配料任你揀

而家潮興「Create Your Own 」,畀人自行配搭食物嘅組合,唔駛再受套餐嘅規限。概念店亦有推出「Create your own Noodle Bowl」,畀客人由湯底同配料都可以自己揀。每個湯麵$28,提供4款麵同3種湯底畀你揀,另外仲可以隨自己喜愛揀唔同配料,每款配料由$5-$10不等,加$12蚊仲可以配湯或飲品,豐儉由人。屈指一算,3餸麵加杯咖啡就大約$5-60,一個午餐計抵唔抵呢……記者覺得係正常「金鐘價」囉。

獨家牛奶軟雪糕窩夫杯

以前嘅「七仔」總會有部雪糕機,記者仲係學生哥嘅年代,放學必會食一支軟雪糕,可惜而家已經無哂。而呢間概念店將重新引入軟雪糕,不過今次嘅軟雪糕就「升咗呢」,當中嘅牛奶味軟雪糕以日本特選3.5牛乳製造,配窩夫;而全港就只有呢間先有!

駐場咖啡師 即磨拉花咖啡

「7仔」有自磨咖啡賣非新鮮事,而概念店今次再加碼,聘請兩位駐場專業咖啡師即場調製咖啡、手打調味牛奶同即場拉花,而咖啡機亦引入專業級嘅半自動咖啡機磨咖啡豆,一杯廿幾蚊咖啡嚟講,有誠意!

概念店亦推出唔少早餐套餐畀上班一族,有地道創意腸粉外,亦有營養健康嘅麥皮餐,唔想食咁多亦有特色麵包可供選擇,而所有早餐套餐均由7am-11am,以後大家返工前又多個早餐聚腳點!

黑松露腸粉

平時早餐食腸粉都係加豉油、甜醬居多,加入黑松露件事即刻高級咗好多,不過兩樣嘢加埋唔知又夾唔夾呢?

紅棗能量燕麥

追求健康嘅朋友仔,不妨試吓呢款燕麥早餐。當中仲加入奇異籽(chia seed) 同藜麥(quiona),聽聞奇異籽有豐富抗氧化效用,愛美之士應該會啱食。

特色麵包

有別於其他便利店麵包,呢度嘅麵包以西式麵包為主,如圖所見,有各式麵包之外亦有各式果酥,買嚟做早餐外,做下午茶都唔錯!

 

概念店仲有咩食?嘩講唔哂喎!畀個餐牌你哋慢慢睇啦~

7-Eleven 概念店 Daily CAFé

地址: 金鐘力寶中心1樓2B舖 (顯示地圖
營業時間:
星期一至五: 7am-9pm
星期六: 7am-5pm
星期日及公眾假期:休息

延伸閱讀:

全球首間McDonald’s Next概念店 自選沙律+雜莓新地窩夫【金鐘食乜好】

Do姐推介!法國人氣閃電泡芙登陸【金鐘食乜好】
新假期周刊 電子書:
ios:https://itunes.apple.com/hk/app/xin-jia-qi-zhou-kan/id722179449?mt=8
Android:https://play.google.com/store/apps/details?id=com.weekendhk.newsstand2&hl=zh_HK

新假期食玩報料:[email protected]
歡迎Instagram / facebook 使用#weekendhk 報料,資料一經選中會為你公告天下!
想最快接收第一手的旅遊飲食資訊?Easy
1.
先分別讚好「新假期周刊」及「新假期Jetso 」兩個Facebook專頁
2.
在「讚好」按鈕下揀選「搶先看」,搞掂!

最新吃喝玩樂資訊