石硤尾
石硤尾

【18區掃食】石硤尾小確幸 台式飯盒+周六限定Café

飲食

廣告

石硤尾 絕對係香港文青嘅集散地,相信一眾文青都係呢頭留下唔少腳毛!小編今日決定放棄呢條不食人間煙火嘅路線,帶大家折返人間,遊走於充滿懷舊風情嘅南山村與 石硤尾 邨之間,係呢個老地方搵親民好野食,尋找小確幸。

撰文、攝影: 很想很想食玩訓

無門檻自助燒烤 平民日本料理

唔講唔知,石硤尾街市天台有個城市綠洲,除了兒童遊樂場還有兩間街坊食肆。這間學生至愛的日菜,貌似平平無奇,但原來內有乾坤。餐廳牆上全部都係學生寫寫畫畫嘅句子圖畫,頓時覺得好有校園Feel。呢度主打平民化日本料理,唔單止平靚正,每樣菜式仲好花心機。老闆仲經常會同食客吹下水,俾啲自助燒烤貼士大家,超nice,仲有隻好痴人嘅貓貓,會係客人枱底走黎走去!

原野日本料理

地址:石硤尾邨商場平台6號舖 (顯示地圖)
電話: 6909 8345
營業時間:星期一至五11am-12pm (3:30pm-6:30pm休息) ,星期六、日及公眾假期6:30pm-12pm

小確幸台式飯盒 儲印花換小食

呢間外賣小店主打台式便當小食及飲品,同喺台灣食嘅便當一樣係用紙盒裝住,忽然間有一陣小確幸嘅感覺散發出嚟。可惜小編個人飛唔到去台灣,唯有買個台式便當幻想下自己身處台灣頂下癮啦。除咗便當外,佢地仲有賣鹽酥雞,夜市小香腸等經典台式小食,仲有創意爆燈嘅酥炸Oreo。此店仲身體力行支持環保,推行環保回收計劃,客人可將該店嘅杯套同橡筋拎返去回收,就可以換印花,儲夠印花就可以換店內小食。

 

九龍堂

地址:石硤尾偉智里2號金玉大廈228號地鋪(顯示地圖)
電話:6372 9913
營業時間: 11:30am-9pm

星期六限定 石硤尾YMCA社企Café

一去到仲以為自己搵錯地方,原來間Café位於石硤尾YMCA裡面。呢間Café已經開咗約一年,係十幾個熱血嘅年輕人一起開嘅社企。佢哋透過匯豐社區夥伴計劃資助,學習料理製作及餐廳營運等知識,以自負盈虧方式開咗呢間Café。Café裏面嘅大小事務全部由呢班年輕人一手包辦。唔好以為由年輕人主理,又打住社企嘅光環食物就會揸流攤,佢哋嘅食物唔單止有姿勢,仲有實際,色香味俱全,真係忍唔住要影返幾廿張相嚟呃like!店員全部都係義務性質,所以淨係得星期六營業,Café扣除收益後會用嚟購買愛心飯券,至今已經幫手派過兩次飯喇。咦!咁咪姐係連食野都係做緊善事囉!提提大家佢哋去到5月就唔做喇,姐係重有4月23號、30號、5月21號、28號可以去食咋!想試就要把握最後機會!

好!由於餐廳有啲隱蔽,而家再教埋你點樣去!

時光機 TiMachinE

地址:九龍窩仔街100號石硤尾邨第二期服務設施大樓6樓A室 (顯示地圖)
電話:2778 2727(YMCA石硤尾電話)
營業時間: 逢星期六2pm-9pm (每月首個星期六及公眾假期除外)

學生哥最愛 8吋長熱狗店

呢間鋪在南山邨來說算是生力軍,以8吋長熱狗做招徠,大眾化嘅價錢吸引咗一班學生哥嘅捧場。以學生飯堂嘅價錢嚟講,水準算高。街坊價美式熱狗和漢堡,絕對係之下午茶寵兒,可惜食物選擇太少。不過食厭咗城大canteen 嘅同學仔,不妨行多兩步過嚟試下新野。

Grab n Go

地址:石硤尾南山邨平台212號(顯示地圖)
電話:2713 7003
營業時間: 11am-5:30pm

大件夾抵食 親民老餅店

嚟開南山村,就順便探下這間巨型麵包店。巨型,不是說間店,而是D麵包。呢間麵包店一睇就知有返咁上下歷史,一盤盤麵包全部用透明膠蓋蓋上。店裏面仲有賣好多懷舊麵包添;有小編細個好鍾意食嘅蛋糕仔,蝴蝶酥,老婆餅,紅豆包等等。麵包店大走親民路線,D麵包大件夾抵食,實屬抗通脹之選。希望呢類小店可以繼續長做長有,唔好被消失啦。

安樂麵飽公司

地址:南山村南樂樓110號地下(顯示地圖)
電話:2778 9350
營業時間: 6:30am-8:30pm

 

延伸閱讀:

【18區掃食】牛頭角搵食 邪惡芝士火鍋+棉花糖吐司

【18區掃食】禾輋街市搵食 冬蔭功炸蛋 +B仔翼尖

最新吃喝玩樂資訊