沙田
沙田

【18區掃食】沙田踩單車 蜜汁龍鬚+糯米糍

飲食

廣告

呢排天氣咁涼爽,重唔約班Friend出來踩單車?上車前建議你先到大圍開餐,懷舊油渣麵+油沙煎麵包、豬頸肉芝士撈麵+蜜汁龍鬚,甜品來個榴槤糯米糍!如果在 沙田 中央公園租車,可先在河畔花園開餐,幾十蚊大大份的刺身飯、茶餐價的韓式石窩飯,梗有一樣滿足到你!

啖啖都係心機 懷舊油渣麵+油沙包

大圍人心愛的小店,懷舊油渣麵、老薑豬潤麵、油沙煎麵包、銀針粉等,食過你會成日想再來大圍囉。提提你,小店屬家庭式經營,即叫即製,想食就要耐心等下,唔好催!同埋星期一及二都唔開門。

爆脆油渣麵 $28

爆脆油渣是豬頸部附近的肥膏,間有一層瘦肉,炸過後非常香口,一碗有數十條。配料還有蝦米、冬菜、冬菇絲等配料,好豐富!辣菜甫超爽口惹味,don’t skip!麵底是上海粗麵,配埋熬足4小時的豬骨湯底,啖啖精華,D湯飲到盡照鏡!

 

牛油沙糖煎厚切麵包 $14 濃香咖啡 $17

煎麵包已經是上世紀的產物,呢度都食得到!厚切麵包塗上鮮牛油煎到微焦,再灑上砂糖。麵包外皮脆,裡面仍然keep住軟綿綿,甜甜地,想食燶啲記住落order講聲。咖啡奶香味濃,好正~~~~

 

老薑湯鮮豬潤配出前一丁 $29

想暖下個身,要食呢個。湯底用連皮老薑和薑蓉煲足4小時,薑辣慢慢擴散入喉,好爽!豬潤有5-6塊,已挑好筋,較腍身又唔腥。連平時不吃豬潤的我都忍不住吃了兩片。麵底可以揀銀針粉、福麵或上海粗麵等。

 

美味溏心鮮鴨蛋 $11

呢隻溏心蛋真係做得好靚,見到流心的蛋黃已經流晒口水,而且長期都keep到水準。溏心蛋並非用雞蛋,而是用蛋香味更濃郁的鴨蛋!店主以豉油和紹興油浸幾小時而成,食落有微微酒香,真係好好味~~~~

 

 

品記麵食

地址:大圍大圍村第十街6號地下(顯示地圖
電話:6283 2378
平均消費:$50
營業時間: 星期三至日11am-6pm (星期一及二休息)

長洲名物 榴槤芒果糯米糍

出大圍馬鐵站過條馬路就見到,非常易搵。小店在深水埗有分店,糯米糍一共有3款口味,榴槤、芒果和紅豆,糯米糍每日在葵涌工場新鮮即製,每天開舖和5pm補貨,特別多街坊幫襯。雖然Size唔算超巨型,但啱晒放落袋,踩單車踩到攰拎出嚟甜一甜。

 

糯米糍每個用膠袋獨立裝著,Size適中。

榴槤糯米糍 $12

咬一啖榴槤果肉爆漿而出,而且好夠「臭」!榴槤迷必食!

 

芒果糯米糍 $12

糯米皮薄到隱約見到芒果果肉,食落有嚼勁,芒果多汁又甜,好食!

 

芒果汁 $12

小店還有賣芒果汁和芒果布甸。芒果汁飲得出無落糖,細細樽,好啱放背包。

 

長洲糯米糍華欣店(第二店)

地址: 沙田 大圍道泰安樓地下(顯示地圖
電話:66270089
平均消費:$25
營業時間:12nn-10pm

又平又好食 豬頸肉芝士撈+蜜汁龍鬚

雖然店名Highlight車仔麵,但店內最好食的是招牌豬頸肉芝士撈麵!大大塊豬頸肉以蜜汁煎香,加埋芝士撈麵,惹味到一個點!蜜汁龍鬚見到個樣包你會點,重有超抵食車仔麵, 四餸連豆漿$34,改汽水或熱飲加$3,改凍飲加$5,$40有找,咁平邊到搵。

豬頸肉芝士撈麵 $38 (豆漿加$3,汽水加$5、熱飲加$6,凍飲加$8)

有5-6大塊豬頸肉,煎得焦香,軟腍入口,配埋芝士一齊撈麵,極邪惡!

 

任選四餸車仔麵(柚皮、薰鴨片、鮮蝦雲吞、辣魚蛋)配油麵連特飲 $41

點餐紙超過50款餸,落單都有排諗。招牌辣魚蛋好彈牙,唔好比佢個樣呃到,入口爆辣。竟然有柚皮!鬆化又入味!

 

雲吞自家包製,非常足料,有三粒蝦粒及豬肉,大滿足!

 

車仔麵配埋特飲咸檸七都喺$41,好大杯。

 

蜜汁龍鬚 $30

小食都好吸引,魷魚鬚爽口彈牙,蜜汁甜甜哋好惹味,食多幾條更有辣味慢慢滲出。

 

 

康和車仔麵茶餐廳

地址:大圍積富街40號(顯示地圖
電話:2604 4455
平均消費:$40
營業時間:12nn-12mn

$68刺身丼 $10追加蒸蛋+炸雞

百物騰貴,一個刺身丼飯閒閒地都要過百元先落到樓,但呢間日式餐廳,午市套餐一大碗刺身丼飯連咖啡/茶,只需$68!加$10仲可選2款小食如茶碗蒸、炸雞、手卷等,仲要勁足料,真係抵到喊,難怪中午時都要排隊。午市由11:30至3點,mark實時間去食啦!

三色三文魚刺身丼 $68

有三文魚、咖喱鹽燒三文魚及三文魚碎,都幾厚身,更有一大匙飛魚籽,好足料啊!絕對能滿足大胃的你!

+$10可以追加2款自選小食例如日式蒸蛋、唐揚炸雞及手卷等。

幾十蚊有湯、有飯、有小食,還有奶茶/咖啡飲,抵呀!

 

+$8可轉特飲,可以揀巨峰乳酸梳打、沖繩海鹽咖啡。

 

蔥花拖羅碎海膽刺身飯 $88

其他刺身飯亦都好吸引!成大片拖羅碎,上面放滿鮮甜十足的海膽,睇見都流晒口水~~~~~

和氣火山石手打烏冬

地址:沙田 河畔花園35號地舖(顯示地圖
電話:2637 1800
平均消費:$100
營業時間:11:30am-3pm,6pm-11:30pm

茶餐價韓食 免加一烤肉放題

開了數個月的韓烤店,午市韓食超抵,主食如石窩飯$40幾蚊包泡菜及汽水仲免加一,窮人恩物。晚市食烤肉,今個星期日(1/11)仲推出100分鐘任食放題,豬牛雞海鮮蔬菜任燒,泡菜海鮮鍋和韓式炒粉絲亦是任添!收費每位$168,星期五至日及公眾假期加$10,星期六日午市都有得食(平日只限晚市),汽水任飲,堅持免加一。

 

石窩雜錦飯$48

雖然不是用石窩盛著,但勝在配料豐富,有齊豬、牛、雞肉、五色菜及荷包蛋,撈埋蛋黃一齊食,好味。

 

牛肉炒粉絲$42

真心好食,粉絲口感Q彈,配埋牛肉好惹味。

 

海鮮湯粉絲$48

嗜辣推介!辣湯底用上海鮮及牛肉等熬足7小時,夠鮮味而且辣度高,還有蜆及海鮮雜碎。

 

韓國星星炸雞 (套餐加$12)

午市套餐加$12就可以配小食一款,炸雞夠大件,酸酸甜甜好滋味。

 

 

姐姐烤肉

地址:沙田 沙田圍路1-7號勵城花園地下1號舖(顯示地圖)
電話:2637 2628
平均消費:$70
營業時間:11:30am-4pm,5pm-12mn

延伸閲讀:
【掃街王】荃灣5大邪惡新食事!7重7彩芝士吐司!
【養生食療】秋日手作 DIY薄荷柚子蜜+低卡鬆餅

最新吃喝玩樂資訊