【18區掃食】即叫即焗火山石爐雞! 銅鑼灣6大新店

銅鑼灣最近新店一間接一間,今次就同大家介紹返來自不同地方的新店,包括韓國過江龍烤雞、台灣人氣High Tea、貴陽地道牛肉粉以及西式街頭小食,今個復活節有4日連假,絕對夠時間食勻咁多間食肆!

酒店級街頭小食 邪惡炸Mozzarella芝士

銅鑼灣小食來來去去都是魚蛋、燒賣、雞蛋仔,上月新開的美味港,主打西式小食,炸Mozzarella芝士、白酒青口、墨西哥Pizza等等都有,價錢大約30-50不等,超級親民,以後掃街又多個選擇!

炸Mozzarella芝士粒 $35

Mozzarella芝士即叫即炸,超級香口,而且拉芝拉到好長都得,好邪惡呀!味道雖然好味,不過食得多始終會熱氣,同朋友仔share就剛剛好!

墨西哥薄餅 $45/個

用上墨西哥餅皮,有別於一般Pizza的厚皮,餅皮又薄又脆,加埋超足料的芝士,辣辣哋好惹味。而且$45就有一整個Pizza,這個價錢於銅鑼灣,恐怕也找不到另一家了吧?

香草羊架配薯菜 $50

羊架以往只會出現在高級西餐廳,而且價錢亦有返咁上下,但今次連羊架都變成街頭小食,配埋薯菜都只係$50,性價比超高!不過羊架要等到4月初才有售。

美味港

地址:銅鑼灣景隆街5號地下B舖(顯示地圖
電話:92334373
營業時間:11:30am-10pm

又一韓國過江龍 噴火焗雞配菊花特飲

這條過江龍來頭非常猛,Sodam Chicken在韓國有70間分店,在當地風格偏向快餐店,但來到香港卻沒有快餐感覺。餐廳主打炸雞及焗雞,一共10款,所有醃料均由韓國總部直送,質素有保證。

Sodam韓式炸雞 $168

想知道炸雞好食與否,一試原味便知龍與鳳,這款原味的韓式炸雞,脆口得來炸粉不算太厚,又不會太乾,配埋酸辣醬,味道不錯。若果想惹味一點,可以一試蜜糖芥末或甜酸口味。

噴火焗雞 $188

職員不斷為我做足心理準備,說吃完這款焗雞真的會辣到噴火,但自問都是一個食得辣之人,譚仔小辣都係小兒科,本來諗住輕輕鬆鬆,食第一啖不覺得辣,但繼續食落去,就開始由喉嚨一直辣上來,辣味後勁超強!愛辣之人絕對值得挑戰一下!

提子特飲/菊花蜜特飲/蘋果特飲 $58

食完辣雞,是時候飲杯特飲解解辣,這3款特飲都比較大杯,杯面直徑有6吋,性價比高,記者個人最喜愛的是中間的菊花蜜特飲,話晒炸雞都是熱氣食物,飲杯清甜的菊花蜜就最好不過。

牛肉部隊鍋 $280

除了炸雞,食韓國菜又點少得部隊鍋,有美國牛肩胛肉、韓國菜肉餃子、紫菜卷、午餐肉、魚片、金菇、茄汁豆、泡菜、即食麵及大醬,大醬由韓國直送,不會一味得個辣字,有oppa的味道。

Sodam Chicken

地址:銅鑼灣耀華街 3 號百樂中心 7 樓(顯示地圖
電話:2728 0200
營業時間:星期日至四 12nn-11:30pm,星期五及六 12nn-12mn

Dazzling Café開過海 新增藍色莓樂蒂丹麥吐司

來自台灣的DazzlingCafé,尖沙咀分店一向大排長龍,粉絲們今次終於等到開分店,而且門外未有人龍,要幫襯就趁早。新店走田園風,一樣主打吐司,而且其中幾款新口味是銅鑼灣分店獨有。

藍色莓樂蒂丹麥吐司 $108

藍莓醬配蜜糖吐司及雪糕來吃,甜中帶酸特別開胃。加上士多啤梨、吉士及馬卡龍,配搭豐富,足二人分享。記者最欣賞的是吐司本身,有別於普通吐司,口感有點像酥皮麵包,層次分別。不過馬卡龍偏甜,而且比較硬身,是整個吐司唯一失色之處。

提拉米蘇丹麥吐司 $108

香滑的鮮奶油鋪在咖啡味雪糕及吐司上,唧上朱古力醬及可可粉,更有幾粒咖啡豆,口味十足Tiramisu甜品。不過與藍莓醬配蜜糖吐司缺點一樣,兩件迷你馬卡龍真的麻麻哋。

墨西哥辣椒豬肉薄餅 $75

除了吐司,Café亦有鹹點,薄餅中間夾著豬肉碎及辣椒,食落不算太辣,味道同份量都剛剛好。

Dazzling café Garden
地址:銅鑼灣告士打道311號皇室堡3樓313-314號舖(顯示地圖
電話:2881 5318
營業時間:2:30pm-10pm

兩杯就回本 $120任飲生啤

銅鑼灣潮店Gum Gum Gum,最近將店內其中一部分轉型成酒吧,更推出$120兩個半小時啤酒放題(不限時段),任飲紐西蘭Mac’s以及美國波士頓Samuel Adams手工啤,前者麥味比較重,後者則有果香味。平時一杯都要幾十蚊,今次放題飲兩杯就回本。

店內裝修結合Art Gallery,牆上油畫全是本地藝術家出品,加埋石油罐及木椅,vintage味十足!

夜市

地址:銅鑼灣加寧街 8-10 號地舖(於Gum Gum Gum內)(顯示地圖
電話:3486 7307
營業時間:星期日至四 6pm-11pm,星期五及六 6pm-1pm

習大大點名讚! 貴州地道牛肉麵

香港出名有乾炒牛河,貴陽一樣有出名的牛肉粉,連習大大都話懷念當地風味。「十二味」新店專賣牛肉粉,由貴洲大媽郭師傅主理,16歲開始便在家鄉煮牛肉粉的她,堅持事事親力親為,牛肉、湯頭、泡菜皆由她主理,絕對有貴州風味:「香港做家鄉菜,好辛苦,好貴,用料不新鮮,騙得了香港人,也騙不了鄉里!」郭師傅話,正宗牛肉粉,牛一定要新鮮,沒有雪牛的腥臊,湯底才能清鮮味正!

貴州牛肉粉湯底只用骨頭熬成,味甜偏清,上枱前還要加一小勺蒜泥、牛肉滷汁、花椒碎,還有絕不可少的「泡酸蓮白」。

(上) 紅油牛肉粉 $58
在清湯之上,加了自家拌炒的香辣油, 配上濃香的紅燒牛肉, 吃完齒頰留香,滿口牛味!
(下)全家福牛肉粉 $98
齊集清燉牛肉、牛𦟌、牛筋和牛肚,以及紅燒牛肉, 清燉者,細嫩鮮味,而紅燒則表現濃郁醬香。 湯頭甜美,盡是牛骨與豬骨的甘香,伴隨一陣花椒香, 層次十足,喝來且順喉舒服,沒有口渴感覺。

郭師傅提醒,要吃得像貴州人,「先拌勻,後嘗湯。再加上人手搓碎的乾辣椒碎,添少許豉油,再趁熱大口吃!」果然,辣椒碎和豉油的味道,並沒有預期中的霸道。反之,牛骨湯的鮮香,馬上濃集起來,惹味非常。

十二味貴陽牛肉粉

地址:銅鑼灣謝斐道379-389號特麗樓地下9號舖(顯示地圖
電話:6768 4643
營業時間:12pm-11pm

即叫即焗 火山石爐焗雞

韓國炸雞開到成行成市,這間新開的The Hwaduk,在韓國創立短短3年,便有超過30間分店,香港菜單與韓國一樣,大部分材料由韓國直送,連果汁亦從當地入口,確保質素與韓國總店一樣。餐廳 最特別的便是從意大利入口的火山石焗爐,溫度高達350℃,客人隔著玻璃,可以看著師傅把雞及Pizza放入爐中。

原味烤雞 $168

烤雞選用鮮雞,每隻1kg左右,保證皮脆肉嫩,配上三款韓式醬汁如忌廉汁、辣汁及蜜糖芥末,味道非常出色。建議先食原味,再蘸醬汁,更能吃出鮮雞味。而且有別於炸雞,烤雞感覺上無咁油膩。

藍芝士Gorgonzola Pizza $118/12吋

Pizza 餅底從韓國入口,搓得薄薄的即焗21分鐘,做到餅邊焦脆,中間煙韌,四種口味尤以三種芝士製成的Gorgonzola Pizza最惹味,鋪滿Gorgonzola藍芝士、Mozzarella及經認證的巴馬臣芝士Grana Padano,芝士仲厚過餅底!記者作為芝士控,表示食得好開心。

The Hwaduk

地址:銅鑼灣開平道1號CUBUS 21樓(顯示地圖
營業時間:12nn-3pm,6pm-12mn
查詢:2811 8821
備註:接受信用卡,須加一服務費
延伸閱讀
正宗意式田園風快餐! 必食流心蛋Pizza |銅鑼灣有咩好食|
Miffy登陸銅鑼灣! 8款得意精品+2大影相位逐個睇|銅鑼灣好去處|
新假期周刊 電子書:
ios:https://itunes.apple.com/hk/app/xin-jia-qi-zhou-kan/id722179449?mt=8
Android:https://play.google.com/store/apps/details?id=com.weekendhk.newsstand2&hl=zh_HK

新假期食玩報料:[email protected]
歡迎Instagram / facebook 使用#weekendhk 報料,資料一經選中會為你公告天下!
想最快接收第一手的旅遊飲食資訊?Easy
1.
先分別讚好「新假期周刊」及「新假期Jetso 」兩個Facebook專頁
2.
在「讚好」按鈕下揀選「搶先看」,搞掂!

最新吃喝玩樂資訊