廟街
廟街

【18區掃食】狂掃 廟街 $7.7無骨炸雞翼+老字號渣咋

飲食

廣告

廟街 真係行得好前囉,早幾日商會自己搞了個美食節,自創五架美食車,免費派了一千份小食俾街坊和遊客。其實 廟街 一向係草根搵食重地,由油麻地延伸至佐敦柯士甸道,開得晏收得晏,啱晒夜鬼,今次我哋一於由街頭掃到去街尾!

巴士小店 自創無骨炸雞翼

廟街 有架巴士小店,主打自創小食,即叫即炸的無骨炸翼雞最吸引,蘸三種粉炸成,超級香脆,除起每隻$7.7,起骨手工都要啦,而且啖啖肉不用吐骨,企街食都可以保持儀態;乒乓波咁大的葱炸魚蛋,每日自家手打,用九棍、門鱔、䱛仔三種魚,加入葱和洋葱打成,炸得香口,一食就唔停口。此店在筲箕灣東大街打響名堂,依家殺到去 廟街 ,而雞蛋仔就係得 廟街 店先有得食,雞蛋仔跟足古方整,加入椰漿充滿椰香,同平時食開嘅唔同。小店另外還有串燒、鹵味和果汁等選擇!

外型扮巴士,又紅又黃,夠晒搶眼!

無骨炸雞 $54/份
一份共7隻,即叫即炸,咬落去有少少似韓式炸雞,但由於用的是雞翼,所以肉質特別嫰滑,又有 Juicy 的雞皮,好好味呀!

炸魚蛋 $12/4粒
乒乓波咁大粒,入面有葱和洋葱,脹卜卜,幾有咬口又有魚味,仲食到洋葱的甜味。

雞蛋仔 $16                                          外面脆口,入面鬆軟,除蛋味之外仲食到椰漿香味。


小食皇

地址:佐敦九龍佐敦 廟街 134號(顯示地圖)
電話:5628 8062
營業時間:星期一至日 12nn-12mn

90年老字號 葡式渣咋

天氣凍凍地,食碗暖笠笠糖水就就啱!鵞記渣咋在 廟街 開業超過90年,由街邊車仔檔做到入舖,糖水款式多,差不多每枱麵都點的招牌渣咋,做法跟足葡式煮法,入面有紅豆、綠豆、紅腰豆和西米等,再倒加入椰漿和花奶,有凍有熱,超級足料。店內大部份糖水廿幾蚊有交易,抵食!

渣咋$24
所有豆煲到入口即溶,淋上花奶令渣咋更香更滑,味道少甜。

陳皮海帶綠豆糖水 $20
又陳皮又海帶,好足料!一上枱便聞到好香豆味,有陳皮的香,不是一味死甜。

麻蓉湯圓 $19
一碗有成8粒,湯圓皮煙靭,芝麻蓉香濃,薑湯微辣,食完成個人暖晒。


鵞記渣咋

地址:佐敦 廟街 226號地下(顯示地圖)
電話:2782 0508
營業時間:星期一至日1pm-12am

尼泊爾小店 重口味三層架

除了煲仔飯和蠔餅,去 廟街 ,其實還有一種菜式很值得食,就是尼泊爾菜!這一帶住了很多尼泊爾人,尼泊爾餐廳也有很多,這間就開業快2年的小店,主打尼泊爾和印度菜,每晚都人氣爆燈,個個都話又平又抵食。最吸睛的是扮三層架下午茶的開胃菜拼盤,精緻甜品變巨量重口味小食,頂層的青木瓜沙律有別於泰式做法,以麻油、辣酒油、芝麻、青檸、蒜和洋葱調味,三層架整體份量勁多,兩個人齋食呢個都夠飽。人多的話叫埋香辣餃子和香蒜薄餅,好味!老闆娘超 Nice,唔收加一,人均唔使$100,飽到爆!

開胃菜拼盤 $168                                    青木瓜沙律、印度 Tandoori 無骨燒雞、香料免治羊肉卷、雜菜咖哩角和雜菜天婦羅。

鐵板燒香辣餃子(雞肉) $45/6隻  
上枱時出晒煙,雖然紅卜卜,但食落唔辣,惹味。

 

尼泊爾雞肉咖喱 $75,香蒜薄餅$22
咖喱跟足傳統尼泊爾方式炮製,香而不辣;薄餅即叫即製,香蒜味重。
Asian Fusion

地址:油麻地 廟街 115號地下(顯示地圖)
電話:3542 5575
營業時間:星期一6pm-11:30pm,星期二至日:3pm-11:30pm

呃like必選 份子雪糕心太軟
廟街 近柯士甸道有一間主打分子料理的café,早前推出梳乎厘焗飯,引來一陣哄動。其實店內的甜品才是主角!紅白心太軟一上枱出晒煙,當然要相機食先,紅白份子雪糕,原是將紅莓雪芭和雲呢嗱雪糕漿加入-197度的液化氮急凍,變成一粒粒,配朱古力心太軟同吃,一凍一熱,又軟又硬,好得意!最近仲有兩款新推出的爆炸糖甜品,點可以唔試?

紅白心太軟 $78                          一放低就煙霧瀰漫,賣相夠殺食,食落仲好有口感添!

 

野菇森林 $68
有開心果分子蛋糕、法式焦糖燉蛋泡泡、蛋白脆糖和爆炸糖,賣相好有童話feel,爆炸糖係咁爆,好過癮!

 

梳乎厘焗飯配龍蝦尾$188
梳乎厘不會太甜,蛋白味道突出,啖啖飯都有濃郁的蛋白香。


SensedessertCafe

地址:佐敦 廟街 286-294號華至大廈地下6-8號舖(顯示地圖)
電話:2886 0949
營業時間:星期日至四12nn-11:30pm,星期五至六:12nn-1am
備注:設加一,收信用卡

餃子名店 分店首度過九龍

在港島區有多間分店的北京餃子源,是蔡瀾的愛店之一,最近終於過了九龍,在油麻地開分店,水準亦keep得到喎!短短開業近兩星期已吸納不少熟客,午市時段坐滿人。餐牌上有近百款選擇,餃子有12款,仲有素餃添,餡多之餘仲有好多肉汁,正呀!

煎鮮肉白菜餃 $29/5隻                      餃子煎得香脆,肉餡十分 Juicy,配辣椒醬食更惹味。

 

山東手撕雞肉菜飯 $40                    山東老闆拿手作,嫰滑雞肉淋上秘製醬汁,見到有豉油、葱和蒜,咸咸地好惹味,撈飯食就啱晒。
北京餃子源

地址:油麻地佐敦道26E號寶輝閣地下D舖(顯示地圖)

電話:2861 0688

營業時間:星期二至日12nn-11:30pm ,星期一休息

傳統煲仔飯+懷舊豬骨粥

去到 廟街 不得不食煲仔飯,但次次都食四季和興記,的確有點悶。附近的宏興一樣是老字號,除了煲仔飯,還有現在買少見少的豬骨粥,食蠔餅食得多,想轉轉花樣,這裡連煎蝦餅都有!

豬骨粥 $16
豬骨粥又綿又滑又香,食完即刻成個人暖晒!

臘腸排骨煲仔飯 $40    
粒粒飯香,夠乾身又有飯焦,排骨份量好多。

 

豆豉鯪魚煲仔飯 $40
煲仔飯餸愈出愈多款,連豆豉鯪魚都有。

煎蝦餅 $35
好香蛋味,豆瓣醬係精髓,但蝦餅唔夠香脆。
宏興美食館

地址:油麻地 廟街 10號(顯示地圖)
電話:2384 6372
營業時間:星期一至日5pm-12mn

延伸閱讀

【掃街王】 筲箕灣東大街!必食黑松露海鮮烏冬!燒蠔飯團 !

必試新品!愛文芒窩夫彩虹梳打太陽花【尖沙咀食乜好】

香港18區美食有甚麼推介?

新假期編輯已經為你整合了香港18區美食指,其中包括尖沙咀、旺角、銅鑼灣等……即睇更多詳情。

香港有甚麼週末好去處推介?

香港18區都非常值得花時間好好探索,一家大細去暢玩的親子好去處、拍拖推介32大情侶好去處、落雨必去的室內好去處、慶生推薦20大生日好去處、新手必備19大靚景行山好去處、秋天戶外露營好去處…..