油麻地發現 黃校巴小食車！$28 梳乎厘班戟 新出黑芝麻味 仲有足料雞蛋仔+格仔餅
記者：Joan 攝影：Fion
&feature=youtu.be
美國校巴造型 好搶眼！
小食店設計成黃色校巴，原來靈感來自美國的校巴，店主Ray小時候在美國讀過書，坐黃校巴返學，之後又在澳洲見過好多美式餐車，回港後很想在香港做架美食車，便索性把兩者合併，黃色外形加開放式廚房，Sharp到路人經過都停低望望。
梳乎厘班戟 + 港式小食
這架美食車「停泊」在油麻地，賣的是各款街頭小食，有最近好Hit的梳乎厘班戟，還有雞蛋仔、窩夫和雪糕。梳乎厘班戟的做法是Ray跟日本朋友學的，每件的份量、用料都不斷調校，班戟漿用美國蛋和日本蛋製成，蛋香特別濃郁，而班㦸漿做好後不能放多過一小時，在廚房內有店員不停預備。梳乎厘班戟亦以煎焗方法整成，即叫即製，賣相堅挺圓潤，入口有梳乎厘的空氣感，又有班戟綿密口感，一份不過是$28，好抵食。
即叫即製，可以在開放式廚房內見到店員不停煎，入口軟綿綿，有豐盈的空氣感，味道不會太甜，食得出蛋香，班戟內濕潤度剛好，$28兩件好抵食，難怪好多人排隊。
陸續推出新口味：黑芝麻梳乎厘班戟
最新推出的黑芝麻口味，黑芝麻粉自己炒自己磨，食落清香，淡淡的黑芝麻中帶甜味。想吃更濃味的，可以加黑芝麻雪糕，似食緊芝麻糊！
深灰色的梳乎厘班戟，賣相好特別，班戟漿除加了自家磨製的芝麻粉外，還加了竹炭粉提亮顏色，面頭再淋上黑芝麻醬、黑芝麻粒和糖粉，食落鬆軟，帶淡淡黑芝麻清香。
雞蛋仔 筲箕灣人氣小食店教路
街頭小食當然少不了雞蛋仔，Ray之前也向筲箕灣的低調高手大街小食取經，雞蛋仔用湖北蛋或泰國蛋製作，除原味外，還有芝士、朱古力、綠茶紅豆、士多啤梨和黑芝麻味，每款配料落得足料，製作時間經多次試驗，款款不同，做起後又會用吹風機待其變脆，紙袋亦選有透氣孔的。
記者手上的是招牌白朱古力味；另外還有原味、芝士、朱古力、綠茶紅豆、士多啤梨和黑芝麻味。
綠茶紅豆口味雞蛋仔，用了台灣和日本抹茶粉，茶味甘香帶甜，還加了少少菠菜汁提亮顏色。嫌單調的話，可以加$10要牛奶味或黑芝麻雪糕。
一份有兩件窩夫，不要以為份量少，窩夫機特別訂製，做出來的窩夫特別厚，裡面有好多朱古力粒，面頭塗滿牛油和朱古力醬，食兩件已經好飽肚。
黑芝麻雪糕好濃味，似食冰凍的芝麻糊，平時是用黑色的竹炭雪糕筒，不過記者去的當日無貨，另外亦可選牛奶味雪糕。
