高質地道私房菜@Dining娜
最近有幾位台灣朋友仔嚟咗香港旅行,知道一般嘅小菜已經滿足唔到呢班妹豬架啦,想一班人圍威喂嗌餸食飯,但又想食得特別啲,非私房菜莫屬啦!不過大多數私房菜都位於工廈,搞到覓食好似尋寶一樣咁鬼難。好彩呢間係銅記嘅忠記咖啡屋.私房菜就非常就腳,啱晒行完街嘅我地。忠記喺飲食界已經打滾咗50年,馳名老字號深受一眾街坊歡迎,將唔同嘅材料演繹得出神入化,落足心機同創意炮製出多款惹味菜式,豐富食物嘅味道層次,重點係有家的味道,我班台灣朋友都一試難忘!
招牌小菜
小菜不嬲都係嗌餸食飯嘅指定動作,一碟好食嘅小炒,除咗料要夠鮮之外,大廚嘅功架都唔講得笑,呢度嘅出品就做到以上要求,仲多咗一分地道港味!
回味蜜桃咕嚕肉
咕嚕肉通常都係配菠蘿,大廚今次就用蜜桃炒,新口味夠晒特別又易入口。食落啖啖肉,外層脆口,內裡肉質夠嫩,酸甜適中,十分開胃。
海南雞(半隻)
大廚選用黃油雞,肉質嫩滑,經冰水浸過嘅雞皮爽口不油膩,配埋油飯真係無得輸!
私房手工菜
話明食私房菜,梗係要食店家特意炮製嘅拿手好菜。忠記私房菜本著貨真價實為原則,聽老闆講,佢一收到客人Order就會去街市搵靚料,花足心機、時間去煮,食物當然出眾啦,亦都係留住食客嘅秘訣之一,唔怪之得每晚都座無虛席!
一口功夫鮮鮑魚
大大隻鮮鮑魚配上素翅、蟹子同燉蛋,口感豐富,材料十足。我Dining娜出名口大,但都唔可以一啖食晒,因為佢真係好大件,抵食之選!
乾隆八寶佛跳牆
材料超級豐富,由鮮鮑、烏雞、花膠、冬菇、瑤柱、豬肉、杞子等貴價食材燉足幾個鐘,用心製作,連我呢個食神食咗都大叫好.好.味.呀!
和風芥末芝麻醬雞絲菠菜冷麵 (位上)
炎炎夏日,食番個冷麵最好不過,以海南雞絲拌芥末芝麻醬,甜甜哋又辣辣哋,好鬼惹味。
私房燕窩凍雙皮奶
將幼滑雙皮奶用一個個酒是故鄉醇嘅酒埕上枱,極之盞鬼,上面仲有大量燕窩,矜貴得嚟又養顏,胃中有胃嘅我多多都食得落。
最愛小總評:
嗱,唔好話我唔提你哋呀,係我Dining娜先咁有Face可以打尖食咩有咩㗎咋,你班妹豬記得最少提前一日訂位呀,食私房菜要訂位是常識吧?費事到時無得食賴我呀!如果唔知食乜好,可以預訂忠記自設嘅8款套餐。
忠記咖啡屋.私房菜
地址:銅鑼灣渣甸街50號渣甸中心9樓(顯示地圖)
電話:2577 2242
Facebook: 忠記咖啡屋
香港18區美食有甚麼推介?
新假期編輯已經為你整合了香港18區美食指,其中包括尖沙咀、旺角、銅鑼灣等……即睇更多詳情。