飲食
飲食

7大飲食常識顛覆認知!飲酒可長命?唔想肥要食多啲牛油?!|食是食非

飲食

廣告

飲食呢項活動,日日都進行緊,但一向以為高卡路里、脂肪嘅食物會致肥,飲酒會對身體唔好!?但係日本節目《中居正広の金曜日のスマイルたちへ》就邀請咗書籍銷量67萬嘅牧田善二醫生,上節目分享正確飲食術!簡直顛覆多年來嘅認知!

撰文:C@Gotrip|圖片:《中居正広の金曜日のスマイルたちへ》|原文刊於:Gotrip

日本醫生 最強正確飲食術

節目組找來非常關注健康同美容嘅100位主婦做問卷調查,將7個飲食新常識按「震驚度」排列順位,睇睇你嘅飲食習慣有冇出錯!

第7位:唔想肥反而要食牛油!

平時買麵包,大部分人都偏向揀白麵包,覺得牛油使用量少唔會肥。但係醫生話,呢個做法係錯嘅!睇番100g牛油嘅營養成分表,脂肪佔81g,但醫生指出,卡路里同肥胖並不掛鈎,糖分(碳水化合物)先至係致肥嘅元兇!

100g牛油中僅含0.2g糖分!
100g牛油中僅含0.2g糖分!

攝取過多糖分,會令血內嘅葡萄糖值上升(血糖值),而為咗減低血糖值,胰臟會分泌出胰島素調節糖的代謝。胰島素會將葡萄糖轉化為能量,而剩餘嘅葡萄糖,則會轉化成脂肪儲存起,多餘嘅糖分先至係致肥嘅原因!100g嘅牛油裡面,糖分只佔0.2g。以核桃嚟做比較嘅話,100g嘅牛油糖分含量,竟然只等於一個核桃!

牛油嘅油脂更可於胃部形成保護膜,抑制糖分吸收!以牛角包同白麵包相比,一個牛角包含有18g牛油,而一片白麵包只有2g牛油。意味住牛角包因為多量牛油形成嘅保護膜作用,更有效抑制糖分嘅吸收。

葡萄糖被油脂包裹,有效減慢糖分吸收,有助減肥。
葡萄糖被油脂包裹,有效減慢糖分吸收,有助減肥。

節目組喺工作人員手臂上裝上檢測血糖值嘅儀器,再分別喺食用牛角包、白麵包後約90分鐘測量血糖值。結果食用牛角包後嘅血糖值為83,而白麵包則係103!醫生話唔係唔食得白麵包,但係喺麵包上搽牛油後再食,會更有效防止肥胖。

第6位:將wasabi溶落豉油係極不正確!

Wasabi嘅辣味係來自稱為「異硫氰酸烯丙酯」嘅成分,而「異硫氰酸烯丙酯」有改善血流狀態嘅效果,令血液流動暢通,每日攝取5g wasabi就可以有效改善血液狀態,令血液流動更暢通。

Wasabi嘅辣味係來自稱為「異硫氰酸烯丙酯」嘅成分。
Wasabi嘅辣味係來自稱為「異硫氰酸烯丙酯」嘅成分。

之但係,由於呢種成分係水溶性,所以一旦溶到豉油就會流失!有見及此,雖然會較為麻煩,但醫生推薦將wasabi放喺刺身上再點豉油,係最好嘅食法!

醫生推薦將wasabi放喺刺身上再點豉油,係最好嘅食法!
醫生推薦將wasabi放喺刺身上再點豉油,係最好嘅食法!

食蕎麥麵時都一樣,比起將wasabi倒到麵汁中溶開,將wasabi放喺麵條上食用係最好!只要唔溶開wasabi,就可以保留呢種營養成分。

第5位:銀杏有效改善老人癡呆!

雖然銀杏嘅味道非常獨特而強烈,但其實係對健康十分好嘅食物!醫生話,銀杏更加有改善老人癡呆嘅功效。不過,銀杏其實帶有毒性,不宜過度食用,成人一日最多食40個,小朋友最多7個。

銀杏帶有毒性,不宜攝取過量!
銀杏帶有毒性,不宜攝取過量!

醫生更講出咗一個超級震驚嘅醫學見解!就係脂肪無論攝取幾多,都唔會致胖!!醫生指,以日本人為例,一日會攝取75g-80g脂肪,但體內其實會將脂肪用到盡!並唔會儲存起變成肥肉!攝取脂肪後,脂肪會轉化成脂肪酸,而脂肪酸會再變成脂蛋白。

呢種脂蛋白會用於製造細胞膜、荷爾蒙同膽汁!都係維持身體正常運作嘅作用。但脂肪並唔會100%用得完,用唔完嘅脂肪原來係會經由排便而排出身體外,並唔會殘留於體內。

呢種脂蛋白會用於製造細胞膜、荷爾蒙同膽汁!
呢種脂蛋白會用於製造細胞膜、荷爾蒙同膽汁!

所以醫生話,日常大家都認為「好肥」嘅蛋黃醬,即使脂肪含量高,但其實唔會致肥!咁肉類嘅肥肉脂肪呢?醫生表示,肉嘅脂肪反而係應該攝取嘅部分!坊間經常聽到「攝取得多脂肪,會提升腦中風、心肌梗塞嘅機率」,醫生就話實際上係調番轉!

肉嘅脂肪反而係應該攝取嘅部分!
肉嘅脂肪反而係應該攝取嘅部分!

根據2013年日本筑波大學嘅研究,花費11年追查8萬人關於飲食生活同病症關係嘅調查,發現攝取得多肉嘅脂肪,其實可以有效減少腦出血、腦梗塞嘅發病率!因此得出,比起完全唔食,多食肉類脂肪,其實更可有助延年益壽嘅結論。

第4位:綠茶帶有高效減肥效果!

綠茶中嘅苦澀成分,「兒茶素」具有殺菌、燃燒脂肪嘅效果,同時更有降低血糖值嘅效果!根據2012年美國賓夕凡尼亞州立大學嘅研究,利用老鼠測試檢驗血糖值變化。

一隻老鼠投放喺一般粟米粉糧食,另一隻則於粟米粉中加入兒茶素粉末,發現食咗兒茶素粉末嘅老鼠,血糖值有所下降!投放咗畀老鼠嘅兒茶素分量,以給予人類嘅分量換算,相等於1杯半嘅綠茶。醫生表示,邊飲用綠茶,邊攝取碳水化合物,可有效抑制肥胖!

綠茶中嘅苦澀成分,「兒茶素」具有殺菌、燃燒脂肪嘅效果。
綠茶中嘅苦澀成分,「兒茶素」具有殺菌、燃燒脂肪嘅效果。

綠茶主要分為煎茶、番茶、玉露3大類,其中「兒茶素」含有量最高嘅係煎茶。而攝取得最多「兒茶素」分量嘅溫度係70℃。食碳水化合物時怕致肥嘅話,不妨配番杯熱綠茶飲用啦!

煎茶係三種綠茶中,含有最多兒茶素嘅種類。
煎茶係三種綠茶中,含有最多兒茶素嘅種類。

第3位:飯前食乳酪會減弱效果!

醫生指,腸道裡嘅雙尾菌會隨年齡增長而減少,超過50歲後,更會跌至幼年期嘅1/100以下。我哋一般都普遍認為,飯前食乳酪可以提供一個乾淨嘅腸胃環境畀益生菌發揮功效,但醫生就話呢個做法其實係錯嘅!因為乳酪中含有嘅「雙尾菌」益生元素對胃酸好弱!空腹時嘅胃部,因為胃酸強勁,呢個時候即使食乳酪,雙尾菌都幾乎會全被胃酸殺死。

空腹時食乳酪,雙尾菌會幾乎全被胃酸殺死。
空腹時食乳酪,雙尾菌會幾乎全被胃酸殺死。

而飯後嘅胃,因為胃酸處於中和狀態,雙尾菌可以免於死亡,並成功流到腸臟嘅機率較高。不過習慣飯前食乳酪嘅人都唔使灰心!醫生話喺胃中死亡嘅雙尾菌,會轉化成益生菌嘅食糧,有效增加體內持有嘅雙尾菌數量。另外,因為蔬菜屬於鹼性,可有效提高雙尾菌嘅效果!醫生推薦喺食乳酪前,先食蔬菜。

蔬菜屬於鹼性,可有效提高雙尾菌嘅效果!
蔬菜屬於鹼性,可有效提高雙尾菌嘅效果!

第2位:枝豆不能經熱水煮!

枝豆係減肥恩物,有提高脂肪燃燒嘅營養成分!其中一種成分稱為「膽鹼」,可將脂肪及糖分轉化成能量。另一種成分稱為「鳥氨酸」,有效促進脂肪及糖分嘅燃燒,有助減肥!

枝豆有提高脂肪燃燒嘅營養成分!
枝豆有提高脂肪燃燒嘅營養成分!

但係呢兩種成分好容易溶於水中!用水烹煮會導致呢兩種難得嘅營養流失!醫生推薦嘅其中一種食法,係用焗爐烤10分鐘或以上,但要避免生食!另一個推薦嘅食法,係蒸煮約7分鐘。重要嘅嘢要講多次!避免生食!

醫生推薦嘅其中一種食法,係用焗爐烤10分鐘或以上。
醫生推薦嘅其中一種食法,係用焗爐烤10分鐘或以上。

第1位:飲可以延年益壽係真嘅!

研究終於證實,日飲1-2杯酒,其實係長壽嘅秘訣!美國加州大學曾經對1,600個以上高齡者進行調查,調查酒同死亡率嘅關係。研究發現,每晚飲1-2杯酒嘅高齡者,比不沾酒精嘅高齡者,死亡率低18%。

美國嘅研究證實,日飲1~2杯酒有助身體健康!
美國嘅研究證實,日飲1-2杯酒有助身體健康!

唔止美國曾經做過研究,英國都喺今年4月發表咗研究,指每星期攝取100g以下酒精量,可有效減少腦中風、動脈瘤、心臟疾病同死亡風險!100g酒精量即係幾多?以紅酒為例嘅話,相等於一星期5杯以內(1杯175ml)。而以罐裝啤酒為例嘅話,則等於一星期7罐以內(一罐350ml)。只要不過度飲用,酒其實係有助身體健康!

以紅酒為例嘅話,相等於一星期5杯以內(1杯175ml)。
以紅酒為例嘅話,相等於一星期5杯以內(1杯175ml)。

健康飲食 應無壓進行

最後,醫生提點番,唔好追求健康追到有壓力!因為壓力先至係導致病痛嘅最大根源!

醫生提點番,唔好追求健康追到有壓力!因為壓力先至係導致病痛嘅最大根源!
醫生提點番,唔好追求健康追到有壓力!因為壓力先至係導致病痛嘅最大根源!

撰文:C@Gotrip|圖片:《中居正広の金曜日のスマイルたちへ》|原文刊於:Gotrip

 

香港18區美食有甚麼推介?

新假期編輯已經為你整合了香港18區美食指,其中包括尖沙咀、旺角、銅鑼灣等……即睇更多詳情。

香港有甚麼週末好去處推介?

香港18區都非常值得花時間好好探索,一家大細去暢玩的親子好去處、拍拖推介32大情侶好去處、落雨必去的室內好去處、慶生推薦20大生日好去處、新手必備19大靚景行山好去處、秋天戶外露營好去處…..