不一樣的順德菜體驗！帝京軒全新「順德．漁鄉風味」糅合巧妙烹調手法＋傳統順德菜式

Apr 30 2023

每逢講起順德菜，相信唔少人第一時間都會諗起煎焗魚嘴、大良炒鮮奶、陳村粉等傳統菜式，唔知大家又有冇諗過原來加入唔同嘅配料，就會有全新風味嘅順德菜呢？今次帝京酒店帝京軒就以順德菜為主題，糅合巧手廚藝及嚴選食材，為大家帶嚟全新「順德．漁鄉風味」餐單與「鳳城．尋鮮譜」套餐，絕對會為大家帶來不同的順德菜體驗！

期間限定帝京軒全新「順德．漁鄉風味」＋「鳳城．尋鮮譜」

今次帝京酒店帝京軒嘅廚師團隊就以順德菜嘅精、巧、鮮為靈感，再嚴選矜貴食材糅合巧手廚藝，去重新創作出一系列令人耳目一新嘅經典順德佳餚，例如陳村粉、大良炒鮮奶、煎焗魚嘴等等，全部都可以喺今次全新餐單到品嚐到，為大家帶嚟不一樣嘅順德菜體驗。全新「順德．漁鄉風味」餐單與「鳳城．尋鮮譜」套餐將會供應至6月30日，啱晒一家人又或者同一大班朋友聚會一齊試！

必食菜式1. 陳皮墨魚餅．手絲雞陳村粉．京蔥爆遼參 (「鳳城．尋鮮譜」限定)

墨魚餅、陳村粉大家可能都經常食，但今次帝京軒大廚們就採用製作順德菜名物—鯪魚球嘅材料及方法去炮製墨魚餅，爽口彈牙之餘亦帶有淡淡陳皮香氣，絕對會令你一試難忘；而陳村粉則配上手撕雞，加埋香濃嘅秘製醬汁，惹味十足；最後就有以新鮮京蔥燜煮日本遼參，蔥香與軟腍入味嘅遼參可以話係最佳配搭！

必食菜式2. 銅盤沙薑豬肚污糟雞

污糟雞係順德著名農家菜之一，傳統手法會以走地雞配大頭菜炮製，但今次大廚就嚴選肉嫩肥美嘅本地農場鮮雞，再與鮮沙薑、紅棗、菇絲、豬肚放於鋪咗新鮮荷葉嘅銅盤上蒸，雞肉不但嫩滑多汁，更帶有荷葉香氣，食落別有一番風味。

必食菜式3. 欖仁銀杏蝦球炒鮮奶

相信大家對大良炒鮮奶並唔陌生，傳統嘅大良炒鮮奶會選用水牛奶，而今次大廚就改用北海道3.6牛奶，並加入鮮銀杏、蜜豆仁及蛋白製成奶漿，令奶香味更加濃郁，同時口感細嫩滑溜。最後更會放上炸欖仁、金華火腿蓉及油泡蝦球，食落帶有嚼勁口感而鹹鮮兼備，盡顯獨特順德風味！

必食菜式4. 瓦罉青胡椒煎焗魚嘴

順德人對於炮製河鮮有一手，即使係簡單一個魚頭亦能煮出一道特色菜式，而煎焗魚嘴就係順德菜常見嘅菜式。大廚先將魚嘴蘸上粉漿並以慢火煎至金黃色，再加入青胡椒碎、花雕、生抽、炸香薑片及乾蔥等炮製出瓦罉青胡椒煎焗魚嘴，更會以原個燒熱嘅瓦煲上菜，灑上花雕酒後香氣四溢，一道菜有齊鹹、辣、鮮，夠晒香口惹味，用嚟送酒一流！