銅鑼灣宵夜好食點 3小時高質 串燒放題 @Dining娜

計我Dining娜話齋：「辛苦搵嚟志在食」，收工要食餐好嘅獎勵一吓自己！食咩好？睇睇上面張串燒相，是咪好正先？講真，串燒一直都係唔少港人嘅心水，亦同樣深得我心！邊度食？我介紹得當然係正嘢，仲要係俾你食足3個鐘嘅高質 串燒放題 ，各位姊妹今次一於食豪啲！

3大賣點 冠絕銅鑼灣

喺銅鑼灣旺區開業啱啱1年嘅火山燒，賣點之一係用富士山熔岩冷卻之後嘅石嚟燒，加熱後溫度可高達370度，仲會發出遠紅外線，等食物由內向外熟，好處係唔易燒燶，火力仲會鎖住啲肉汁，啖啖夠晒juicy！另一個賣點係用料上乘又新鮮，唔講唔知，原來老闆同啲海鮮、肉類批發商好鬼熟絡，自然會入到好似加拿大肉蟹、波士頓龍蝦、北海道毛蟹、大連六頭鮑同沙巴虎蝦等等生猛活水產，同埋澳洲和牛呢啲靚貨啦，就連菜蔬都只係會揀日本貨入！賣點之三係優惠一籮籮，6位或以上惠顧同埋預先打電話訂座，生日正日可免費任食3小時同埋享用1份龍蝦，仲要係加拿大波士頓龍蝦，邊度搵？2位或以上惠顧，仲送埋1份海鮮關東煮，啲料多到滿瀉，真材實料ichiban！

增設宵夜 抵食單點

不過講真，而家啲打工仔邊有得咁早收工，OT得嚟都成夜晚10點啦，出得去食都已經係宵夜時間！火山燒每晚11點後，除咗串燒放題外，仲增設宵夜時段嘅a la carte單點，大部份串燒每串都只不過係$18，而且絕不將貨就價！就算已經食飽飯，但想約班老友嚟飲杯啤酒、食串串燒都無問題！計我Dining娜話，火山燒肯定係銅鑼灣區抵食兼識食之選！

價目表串燒放題時段
星期一至四
5pm-8pm $268
8:15pm-11:15pm $298
11pm後入座 $238
星期五、六、日、公眾假期及其前夕
5pm-8pm $298
8:15pm-11:15pm$298
11pm後入座 $238

火山燒
地址：銅鑼灣駱克道459至461號The L. Square 9至10樓（顯示地圖）
電話：2889 7008
營業時間：5pm-2am
備註：設加一，只收現金。