邪惡!芝士可樂餅 配 13吋高大大支 思樂冰 【尖沙咀】

飲食

夏日炎炎,喺尖沙咀街頭,近排可能會見到唔少人拎住一大支粉紅色同粉藍色嘅野,外型似足一支變身棒,但上面又有支飲管伸出嚟,應該係飲得架喎!究竟係乜東東嚟嘅呢?原來係一支 思樂冰 !到底係乜野味?賣幾多錢?依家話你知!

解渴雙色思樂冰

呢枝南山塔思樂冰,基本上製作原理跟便利店那種分別不大,不過大大支齋睇收視都開心。一落Order,店員就由部冰機擠兩種冰入樽度,粉紅色嘅冰係甜甜地嘅草莓味,而粉藍色嘅冰就係酸酸地嘅檸檬味。呢一刻,大家可能會問係咪一定要咁樣混合?可否上面藍色、下色紅色?又或是只選擇一種味道?呢個問題記者同身邊的食客都有想過,但當你試過落單,大家都不其然接受咗店員的安排。是咁的…

店內不少店員都是操英語或普通話人士,為方便大家落單,店門都放滿食物的餐牌。食客只要「手指指」便完成落單程序,所以當食客一指呢支思樂冰,店員便迅速地幫你將兩種味道混合,分層去飲都得,搖勻先飲亦得,得咗!

 

 

實測高度!

驟眼睇,枝冰高過一枝汽水,但實際高度係幾多?記者即場量度,發現成枝冰有成13吋(33厘米)高!不過$35買一枝冰飲都唔係平,好彩個樽有啲睇頭!樽身用膠造,質地幾硬淨,飲完可以reuse,樽蓋係揭蓋式(千祈唔好貪得意反轉佢,會漏冰架!),飲管有個蓋,唔飲可以蓋住,都幾衛生。

 

熱門韓式小食

有留意食界消息的朋友,都應該知道呢間小店不時成為傳媒中的焦點,因為有太多新奇的食品了。今次除咗冰飲之外,呢度仲有其他韓式小食揀,價錢由十幾蚊至四十幾蚊,種類都有十幾款,多數係煎炸野,依家就試三款大熱小食。

飽肚薯條熱狗

呢隻薯條熱狗,同美式炸熱狗好似,唔同在於外層係一粒粒炸薯粒。食落幾脆口,入面有兩層麵衣,口感似鹹嘅pancake,幾飽肚,原先諗住入面條腸好Juicy,但食落覺得乾咗啲。

芝心釜山可樂餅

呢個釜山可樂餅一共有四種味,包括芝士、魷魚、鮮蝦、蔬菜味,記者就試咗個芝士味。一咬落去,啲芝士「咇」出嚟!外層似麵包質地,質感紮實,胃口細嘅話,食一個都好飽啦!

辣到跳舞燒粟米

粟米上面有芝士粉同辣粉,記者第一啖食就落去,甜甜地,但就好乾。點知第二啖食正辣粉部份,辣到呢……嘴唇都麻埋,唔食得辣,一定要叫店員走辣粉!但燒粟米嚟講,$29都算貴。

大大隻韓國炸魷魚

呢隻炸魷魚,最特別之處,就係一個「大」字啦!店員先將魷魚嘅內臟去除晒,之後沾上炸漿,然後直接放落油鍋炸!炸左三分鐘左右就拎返上嚟,灑上蔬菜味、芝士味或辣味粉,就食得!要整呢隻炸魷魚,所需要嘅材料都係由韓國直送(除咗油之外),韓式風味Keep返晒!

食落外層好鬆脆,一咬落去,啲脆粉飛晒出嚟!食嘅時候都幾狼狽XDDDD,魷魚肉質煙韌,之前賣$108隻,依家賣緊$48,好抵食!

Norayo K-Street

地址:尖沙咀加拿分道45-47號宏生大廈地下D2號舖(顯示地圖
營業時間: 12:00pm-12:00am

伸延閱讀

【巨型 芝士 漢堡包】輕鬆小熊陪我食Lunch @ The Diner

【煮食神器開箱文】自製健康花生醬 的骰 果仁醬機

最新吃喝玩樂資訊