搶先試食血色小鮮肉︳ 萬聖節韓烤 ＠DINING娜
就快到10月尾萬聖節，除咗正日要約埋成班老友，化行嘩鬼妝、換上各式Cosplay變身妖魔鬼怪外，出動前夕梗係要擦番餐應節得嚟又夠特色嘅萬聖節大餐啦！造型夠晒搶眼又夠晒鮮味嘅如果唔係邊有氣力出嚟周圍嚇人㗎！年年都食西餐，今年不如轉轉口味歎下萬聖節韓烤 。
萬聖節韓烤 食落肚血色小鮮肉
早排DINING娜就被邀請參加炑八韓烤，喺荃新天地旗艦店舉行嘅「餓鬼轆轆萬聖宴」活動，率先試食呢個份量十足、造型夠晒搶眼又夠晒鮮味嘅「血色小鮮肉」套餐（HK$618）。平時頂多用眼晴欣賞Oppa，估唔到今次見到一眾赤裸裸嘅小鮮肉，仲要將佢哋烤晒嚟食落肚，搞到我呢位Nuna都有點難為情。
入番正題先！今次一班小鮮肉分別放喺兩層高嘅金屬食物架上，包括有肉質爽厚、味道香醇嘅厚切豬五花腩；油香四溢、肉嫩滑膩嘅豬梅花肉；鮮中帶甜、肉質彈牙嘅梨汁雞肉；肉質爽脆、味道鮮甜嘅韓國大蝦。加上油脂飽滿、牛味濃郁嘅萬聖節牛小排，同埋啖啖肉、牛味極濃嘅厚切上等鹽烤牛舌，絕對係無肉不歡嘅食肉獸至愛！碟上仲伴有少許雜菜和鮮菌，可以稍為平衡一下味蕾。
萬聖節不能沒有了南瓜
套餐裡面嘅詭異南瓜牛肋骨煲，以原個南瓜盅盛載住煮至入味嘅牛肋骨，熱騰騰上枱時嗰種濃烈牛肉香夾雜住南瓜嘅清甜香氣，確實令人食慾大增。食之前記得用鉸剪輕輕剪開南瓜，咁果肉就會好似花瓣咁整齊散開。由於牛肉已燜至非常腍，所以不妨用鉸剪剪成一小粒，做到啖啖肉嘅效果。
牛魔王必點 油花分布均勻
自認係牛魔王，可以叫多份油花均勻、肉質豐盈嘅萬聖節1++韓牛貝身肉（HK$220）嚟歎下！只要稍為烤熟，唔使落任何調味已夠晒滋味！加上韓牛貝身肉跟牛小排，同樣放在以鐵鎖鏈扭成懸空形狀的架子上，造型頗為驚艷！
熱爆惹味 骷髏芝士熔岩飯
假如一大班嘩鬼開餐，或者有大食鬼撐枱腳，嫌未夠喉又想湊下米氣，可以再點多個「骷髏芝士熔岩飯」（HK$186）。韓國炒飯鋪上好似岩漿咁Hot嘅惹味芝士，加上栩栩如生嘅骷髏造型煎雙蛋，簡單睇得、食得，仲影得！又一相機食先，社交媒體呃Like Killer之作！
深水炸物 吐出黑甜年糕粉絲
唔想食飯，但又愛澱粉質同海鮮，可以加碼叫埋呢碟「特大炸魷魚墨汁年糕粉絲（HK$175）。大大件原隻魷魚炸到金黃香脆，再灑上惹味香蒜同調味，令人愈食愈開胃！至於墨汁年糕粉絲，入口有少少鹹香又滲出絲絲甜味，加上口感煙韌嘅年糕，簡直滋味無比。
食到停唔到口，忽然覺得有啲口渴？最啱點埋呢杯異常吸睛嘅菠蘿眼球梳打（HK$32），成個眼球載浮載沉喺冰凍嘅菠蘿海裡面，睇到都毛管戙，但最後都係會忍唔到口，震住邊飲邊Selfie。
同場加映：韓式Pop Cake Workshop
試食萬聖宴當日，仲有一個特別熱身活動，就係韓式Pop Cake Workshop！活動本身係炑八達人（會員）嘅不定期主題聚會，今次就專程遠道由韓國請來4位韓式Pop Cake導師，親身示範點樣製作小蛋糕上面嘅立體花。示範完又會巡視下學員進度，兼親自指點教學，由於成品吸引又好玩，所以現場氣氛都好高漲。做完基本立體花同小盆栽後，仲可以晉級挑戰其他萬聖節立體造型，好似南瓜、巫師帽、斷指、嘩鬼等。當學員享用緊自己嘅傑作時，導師們仲走埋嚟逐一幫學員將作品放入蛋糕盒內，咁細心真係令人忍唔住大叫暖男、暖女！
香港18區美食有甚麼推介？
新假期編輯已經為你整合了香港18區美食指，其中包括尖沙咀、旺角、銅鑼灣等……即睇更多詳情。
