荃灣食乜好│ 雞煲火鍋 放題任食回本花膠 ＠Dining娜

荃灣可以話係雞煲同火鍋嘅集中地，各適其適。18樓雞煲火鍋專門店專做 雞煲火鍋 放題，食完雞煲再打邊爐，而火鍋除咗無限供應雪花肥牛、脆鯇片、白鱔片等配料之外，最誇張係竟然有花膠，仲要無限任食，簡直落重本！難怪開業至今只係短短數個月已經喺區內火紅。

店主親自調配四川雞煲醬

先睇18樓嘅招牌雞煲，採用咗傳統四川麻辣做法，特色係既辣且有麻香，甜度較少；雞隻選用爽嫩彈牙嘅三黃雞，啖啖肉。雞煲嘅秘製醬汁由店主親自調配，四川風味濃郁，大家可以自選大、中、小、微或唔辣。由於雞煲每日新鮮製造，雞鮮肉滑，而且能夠吸盡惹味醬汁嘅精華，令人回味，每日賣出150至200煲，厲害！

雞煲火鍋 放題必食配料

食完雞煲，加2吋豬骨湯底就變成火鍋，可以任點任食唔同配料打邊爐。店主透露，呢個豬骨湯底熬足10幾個鐘，味道濃郁鮮香，夠晒味，灼過嘅食物可以唔點豉油就食得！

至於無限任添配料，首推回本度高嘅花膠，開始入秋，多食滋補食物最啱。雪花肥牛、特選黑豚腩片、即日靚海鮮、脆鯇片、白鱔片等配料，都係無限任食。

一班朋友如果有人唔食雞煲，都可以轉一款特色湯底，包括鮮濃番茄湯、粟米蘿蔔豬骨湯、四川麻辣湯、花雕藥膳湯、鹹菜胡椒豬肚湯。

玩味舊屋邨裝修

佔地7,000呎嘅18樓環境寬敞，全店參照70、80年代嘅舊式屋邨為設計藍本，懷舊風味濃厚。全店設有2間VIP房（可以打通），分別以18樓A座、18樓C座為名，後者更係源自經典電台廣播嘅名，玩味十足。

18樓雞煲火鍋專門店

地址：荃灣眾安街55號大鴻輝（荃灣）中心18樓（港鐵荃灣站B1出口）（顯示地圖）
電話：2390 5390
價錢：星期一至四$138 – $158/成人、$88/小童
星期五至日、公眾假期及前夕$148 – $168/成人、$98/小童
備註：收現金及信用卡，設加一