【自助餐放蛇起底組】 $168 火鍋放題 任食貴價封門柳

飲食

廣告

火鍋 放題邊間好?cheap cheap肥牛 火鍋 放題平時就食得多,但有無諗過百幾蚊就可食到一啲都唔cheap,而且牛味極濃的封門柳牛肉?封門柳,不少 火鍋 店也沒供應,有供應的也要百幾蚊一碟,而家$168任食,真係抵到爛!食過包你以後對其他牛肉無晒興趣,想知喺邊可以食到,即睇試食報告!

9款湯底任揀

湯底有9款揀,重口味的可揀麻辣、沙嗲湯,清少少可揀香茜皮蛋又或者飄香棷子湯。一人一鍋,想食邊款自己決定,不用食人口水尾。不過缺點是個爐無得調較大細火,太大火有時更會燒出爐邊,睇住啊!

一次上癮 重牛味封門柳

主角登場!封門柳牛肉究竟喺乜?其實就是牛的橫膈膜下面的一條肌肉,每隻牛只有兩塊,超級矜貴!封門柳塊塊手切,先來第一碟,鮮紅兼有密密麻麻的雪花紋,掂!食落有超級超級超級重牛味,而且無筋,肉質非常嫩滑,完全KO平時食的肥牛、滑牛肉,點算啊?我以後打邊爐食唔返呢款牛點算啊?

食一碟點會夠呢?即刻Encore第二碟,這碟雪花紋更細緻,而且厚身少少,水準keep到,照舊超重牛味,食呢款牛完全不用蘸點任何醬料,因為本身已經超夠味啦!

飲品任飲,自助形式,除汽水及啤酒外,有自家製豆漿和竹蔗茅根水!

除咗封門柳 重有咩好食?

火鍋 配料可以劃紙仔,出面亦有自助區域,自助任取腸仔、芋絲、牛柏葉、蔬菜等大路嘢,精彩的配料就要劃紙仔啦!

必食推介 特色丸類

平時打邊爐食嚟食去都是牛貢芝心蟹籽丸好悶?這裡完全不會令你失望!必食推介台灣鵝肉丸,鵝肉丸喎,超少見囉!小小一粒,但食落都幾夠味,而且非常Q彈,同瀨尿牛丸有得fight!嫌芝士丸太膩?可以試試柚子乳酪丸喎!流心餡食時要睇住燙口,酸酸哋感覺好清新!唔知卡路厘會唔會無芝士丸咁高呢~~~?最後不得不試的是韮菜餃,入面有足料韮菜及豬肉,見唔見到餃皮幾咁薄?諗起都想再食~~

總結:抵!牛魔王必食!

打邊爐無牛不歡的你絕對要過嚟擦一轉,試一試咁高質的封條柳牛肉,$168淨食牛都抵!(而且免加一)包你食過返尋味!而且其他 火鍋 配料都有自家特色,兼且味道不錯,可惜的是限時1小時45分鐘,食得要快少少先夠回本!

總分:8/10

小寶哥一人火鍋

地址: 新蒲崗衍慶街2-32號新蒲崗大厦地下10-12號舖(顯示地圖)
電話: 5321 1862
火鍋 放題供應時間:5:30pm-1am(每節 1小時45分鐘)
收費:7:30pm前結賬及9:30pm後入座每位$168,7:30pm-9:30pm 每位$188

香港18區美食有甚麼推介?

新假期編輯已經為你整合了香港18區美食指,其中包括尖沙咀、旺角、銅鑼灣等……即睇更多詳情。

香港有甚麼週末好去處推介?

香港18區都非常值得花時間好好探索,一家大細去暢玩的親子好去處、拍拖推介32大情侶好去處、落雨必去的室內好去處、慶生推薦20大生日好去處、新手必備19大靚景行山好去處、秋天戶外露營好去處…..