【自助餐放蛇起底組】旺角$158任食芝士x部隊鍋

Q: 香港18區美食有甚麼推介？

新假期編輯已經為你整合了香港18區美食指，其中包括尖沙咀、旺角、銅鑼灣等 ......即睇更多詳情。

Feb 16 2016

如果你鍾意食部隊鍋，又中意食芝士，咁啱晒啦！旺角呢間主打部隊鍋放題的餐廳，最近推出了芝士口味，究竟芝味濃唔濃郁呢？立即去片！

8款自選湯底　配料區選擇豐富

未開始睇menu，就已經有幾兜前菜俾我哋食，有泡菜、芽菜同黃瓜可以任食，仲可以任添。一路食可以一路諗下叫咩湯底，本身就有8款自選湯鍋，有豬骨濃湯、麻辣及藥膳湯底等，不過今次我哋要嚟試佢期間限定嘅芝味部隊鍋，另外肉類就有幾款不同套餐，最平$158可以落到樓，包一款嚴選牛肉及梅豚肉任食，儘管試試佢！

叫咗芝士鍋之後，兩分幾鐘後芝士鍋、一兜芝士碎、各一碟牛、豚肉就已經上枱啦，都好快手，仲拎埋膠袋同橡筋籃過嚟，俾我哋入住電話同綁頭髮，以免打邊爐期間整污糟，非常貼心！

芝士鍋味道其實唔算超濃郁嗰隻，芝士味適中嘅，似韓國芝士湯麵嗰隻味，不過如果你覺得唔夠喉，都可以自己再加芝士碎落去，但加晒之後如果想再添，就要加$5一兜啦！

然後就可以出去拎配料，有魚片串、豬皮、豬大腸、年糕、公仔麵同菜等，行過少少個凍櫃仲有熊仔魚餅、海鮮球、午餐肉、餃子同腸等，幾多選擇喎！另外飲品都喺任飲，有汽水同收埋一邊嘅韓國綠茶。

碎濕濕牛肉好難食　高質部隊鍋配料

任食的牛肉脂肪多，部份更有小黑點，一夾起更加不堪一擊，超易爛，食落口感碎濕濕，似俾人食過咁，我食咗一片就無再掂過佢，好難食。豚肉就正常得多，不過由於昆是薄切，唔好淥咁耐。

一路食部隊鍋，店員都好主動上前加湯，湯底芝士味都會淡咗嫁，要keep住加返芝士碎落去，一兜絕對唔夠加囉，要加$5再要！

甜品有Mousse cake+乳酪

食埋甜品先算完美finish！甜品櫃有mousse cake，四四方方細細件，可以試勻咁多款味，mousse都滑嘅，無顆粒，朱古力味最好食。另外都有乳酪機，得一款原味乳酪，仲有彩針、朱古力醬等可自己DIY。

總結:

雖然對比返同類部隊鍋放題，$158呢個價錢有少少貴，而且芝士要另外加錢都要扣少少分，但嘢食都多選擇，大部分味道都唔錯。而且服務都OK，店員都有禮貌同會主動加湯。另外90分鐘有少少急，不過如果無人喺門口排隊的話，店員都會俾我哋繼續坐嘅。但平日夜晚7點多8點都已經爆場，門口仲有人等位，所以想慢慢食就早啲去啦。

總分:

7.5/10