猛料！鹿兒島A4 和牛 $198吃足三部位 【堅尼地城食乜好】
廣告
涼風送爽，最啱食燒肉。行經堅尼地城發現了間新開的日式燒肉店，開業不到兩星期，晚餐時段已見人頭湧湧，即刻跟隊試試佢，等了成個鐘終於有得食，一揭開 menu，嘩！鹿兒島 和牛 拼盤二百元有找，坊間燒肉店都要四百多元，平足一半。
一份有三款A4級 和牛 ，有臉頰肉、胸腹肉及牛肋肉，最愛牛肋肉，嫩滑口感帶豐富油脂，回味無窮。另外A5霜降 和牛 肉眼扒亦一樣抵食，menu 上面寫著「 極之巨大 」，平時坊間吃至少五百元，立即叫一客來驗明真假，果然無呃人！足足有成20cm 長，大過男人手掌。紋理細緻，店員建議放在爐上輕輕燒至稍為變色，血水浮出後再反轉燒一燒，蘸上 Wasabi 即食，享受和牛在你口中融化的滋味。除和牛外，餐廳還有供應西班牙黑毛橡果豚肉及日本黑豚等靚料，更有主食如丼飯及烏冬，價錢親民，食得過！
七輪燒肉
地址：西環堅尼地城科士街40號地舖（顯示地圖）
營業時間：11:30am-3pm、6pm-1am
電話：3706 5506
備註：用餐時間限120分鐘，平均消費$250/位；加一服務費，接受信用卡
香港18區美食有甚麼推介？
新假期編輯已經為你整合了香港18區美食指，其中包括尖沙咀、旺角、銅鑼灣等……即睇更多詳情。
