名廚教路！20分鐘即學 4款必食 澳葡菜 @travel佳

去澳門必食 澳葡菜！所謂「 澳葡菜 」是葡萄牙人從歐洲遠渡非洲、印度到達澳門以後，揉合途經各地的食物、香料、烹調方法而成的跨文化產物，稱得上係fusion菜的始祖。

為了令更多人認識澳葡菜之精髓和內涵，兩位星級廚師－美意中式料理高手伍嘉琦師傅和澳門土生菜專家兼土生葡人Chef Neta聯手教大家自煮4道土生澳葡菜，保證大家好快上手！

這4道超簡易澳葡菜取材自傳統土生葡人美食，惹味十足，開餐啦！

撰文：Travel 佳| 攝影：Tommy、孟、Scott

1. Fusion菜元祖 正宗葡國雞

相信好多人都食過葡國雞，但這道菜並非源自葡萄牙，而係正宗澳門土生葡菜代表之一，用到的材料都是葡萄牙來澳門沿途各地的產物，黃薑粉來自印度，椰漿來自馬來亞，亦選用了用煙熏方法製成的葡國臘腸，所以由材料到調味料都是集各地之大成。

Chef Neta教路要煮到好食又好睇，最重要的竅門就是足料，黃薑粉、椰漿、葡國臘腸、番茄肉、椰絲等缺一不可，咁先煮到椰香味濃郁又帶咖哩色又不辣，而且金黃色帶少少脆口的葡國雞。

提提你，黃薑粉帶苦味，落少少帶出顏色就好足夠！

2. 失傳節日美食 秘傳葡式焗肉餅

葡式焗肉餅，想食，去澳葡菜餐廳都未必食得到，點解會咁？

原來，昔日土生葡人只可以在大時大節配給到由葡萄牙運來的紅波芝士同葡國臘腸，然後製作這道在教堂彌撒後一齊分享的節日美食。因為係限時限量供應，識煮嘅大廚亦寥寥可數，成為了一道秘傳的土生菜美食！

土生葡人名廚Neta話呢道葡式焗肉餅最重要係用少肥多瘦的豬肉，焗之前再鋪滿煙肉片，咁先食到外脆內嫩，保留了肉汁在內的美味焗肉餅！

3. 土生菜升呢 葡汁釀蟹蓋

正統葡汁食起來，椰香味濃之餘，覺得欠了少少味，點算好？琦師傅教路改用咖哩粉代替純黃薑粉調出至強葡汁，用來煮本身亦是土生菜的釀蟹蓋就啱晒啦！

份量十足的三點蟹蟹肉，配上極濃味嘅椰香，加上帶少辛辣的咖哩味，實在好食到停唔到口！琦師傅提提大家拆肉的時候唔好拆得太碎，咁先食到滿足感十足的啖啖蟹肉。

4. 經典大翻新 葡式燒雞釀飯

葡式燒乳豬飯絕對是葡國經典名菜之一，不過要喺屋企整原隻乳豬飯，實在有點mission impossible。

琦師傅發揮創意改良古法，將燒豬變燒雞，保留燒乳豬飯的兩大精髓─脆皮加吸滿雞油的米飯，食落啖啖油香，而且有少許微辣，極之開胃！

要隻雞燒到皮脆肉滑，而且味道十足，首要是揀返隻肥雞，加上醃雞前抹乾淨裡裡外外的水份，令到醃料唔會俾水份沖淡，咁就煮到油香滿滿的脆皮雞飯啦！

為了令更多人認識澳葡菜之精髓和內涵，兩位港澳名廚拍攝星級廚房，透過四道烹飪教學短片，介紹澳葡菜的歷史源流和風味，讓更多人在下廚過程中認識澳門美食的魅力。

想知更多土生澳葡菜的資訊，即上澳門小廚神訓練營網站啦！