深水埗燒味舖上日本節目！天價四併飯 網民：唔信砌咁靚囉｜飲食熱話

深水埗燒味舖 衝出香港上日本節目

近來日本節目「屋台メシ部」介紹香港美食，來到深水埗介紹地道的特式美食-點心及燒味。從節目的預告片可見，被日本人力推的燒味店是燒味老字號鴻昌燒臘飯店，足足30多年歷史。節目片段中師傅手起刀落，俐落地斬料，節目推介的是叉燒、燒肉、雞髀、鵝髀四併飯，份量十足，賣相非常四正，燒味油光閃閃，令人流曬口水，女主持更夾起雞肉，遞向鏡頭，令人食旨大動。

高登：打死唔信砌咁靚囉

事件亦引來香港連登討論區網友的關注，有網友出帖：「深水埗燒味舖上日本節目」上載多張節目相片，當中亦有四併飯的靚仔相，樓主發言：「打死都唔信會砌咁靚囉」、「假過好假的肥仔」、「笑死，擺碟靚到」、「全部都斬最靚既位同埋咁大份唔係上節目都無可能」甚至有人覺得靚到超現實：「兩舊都無咁靚啦， 深水埗呢間喎， 呢件事點睇都係超現實主義 – surrealism」。有人覺得為了節目效果，砌得靚仔點也無可口非：「上電視就梗係要砌靚啲啦」不過日本人來幫襯時可能會有落差：「之後班架仔遠洋過海黎香港，以為真係有咁大碟」。

就食味來說，網民似乎都覺得節目推介得好，有不少人力撐老字號，燒味有質素，外賣還有湯送，幫手介紹：「呢間深水埗老字號有兩間，呢間以前係轉角位，今年搬咗過隔離，舊舖掛哂琵琶鴨、金華火腿出來，有平價燒味飯賣，上個月食過新舗乳豬飯外賣，送湯，唔錯。」亦有人盛讚叉燒富熏木味：「鴻昌叉燒個人覺得幾好，熏木味幾重，第一次食叫外賣雙併，返到去打開，成個飯盒都係果隻熏木味」。

盛惠＄180！究竟值唔值？

四併飯的價錢亦成為討論重點，網民留言揭露價錢：「依個要180港紙」盛惠$180，立即引來熱議，有人覺得太貴：「去旺角風味園都有咁大碟$50」、「200元夠買半隻雞、半斤叉燒，孖寶，買支酒慢慢歎，真係好少見人食燒味飯食到咁貴」而且覺得用近2百元買燒味不太值得：「香港好小人用成2舊水食個燒味頹飯」、「即係你會唔會比2舊水食個M記餐一樣」亦有人思疑日本人會否以4千日元買一個燒味飯：「呢碟二舊水都無咁多，架仔聽到4千YEN 仲食唔食？」。

不過亦有大班網民覺得值錢合理：「$180，雙脾加叉燒燒肉，差唔多啦」、「個價差唔多食開ssp燒鵝大王都係咁上下價錢」、「幾年前見個深水埗雙脾飯賣$80呢度加埋叉燒同燒肉，計埋通脹$180呢個價差唔多」甚至已經算平：「雙脾飯都200上下，講緊5、6年前」而且價錢視乎水準高低：「港島食樓主果碟兩舊水都唔得..燒味有分整得好同整得西，簡單d你樓下買盒廿蚊燒味飯。同去樓主講果間買一盒試下有冇分別咪知囉」

而且深信日本人願意科水食：「日本食中華料理好貴的係高級野來」更有人上載日本的中華料理Menu，以2千5日元走跳。不過有位朋友講出了重點，覺得價錢其次，食味才最重要：「人哋介紹覺得佢好食，唔係介紹佢平。」