永遠追求新鮮感@Dining娜

(Presented by 英皇娛樂酒店 御廚)

大學同學C年頭開始去咗澳門做嘢，成日叫我過去探佢兼食好嘢，上個星期佢send咗張相俾我，話係佢老友餐廳5月新菜式，叫我過去一齊試試，抵受唔住誘惑嘅我，一到周末就游過大海搵佢。

今次試嘅係澳門英皇娛樂酒店9樓Royal Kitchen嘅buffet，有一道主菜又有得食自助餐。趁未上主菜我就同C一齊試個seafood bar先，有我最鍾意嘅麵包蟹，有好多膏而且啖啖肉，仲有好少見嘅角螺，幾鮮甜而且螺味好重，肉質比花螺更加彈牙，唔錯！

主菜每兩個月轉一次，5月份最新主菜係法式走地春雞釀黑松露菌，C嘅老友仲帶我哋入廚房，跟大廚學番兩手！大廚話走地春雞來自法國農場，細細隻約莫400-500g左右，所以雞肉特別鮮嫩，而且唔會食得太飽，留到肚食其他嘢。首先會用白酒、洋蔥、乾蔥醃10個鐘，釀入黑松露醬、炒洋蔥同西芹之後，再用180度高溫烤焗。我有親眼目擊出爐嗰一刻，超香雞味同松露味！上檯之前仲要用滾油炸番個脆皮出嚟，外脆內嫩，正！

大廚見我哋流晒口水，就整埋個4月主菜魔鬼大蝦配扇貝俾我哋試！先將本地新鮮海蝦煎香，然後搽上秘製葡式魔鬼汁（大廚靜雞雞話我知用咗幾種唔同辣椒、洋蔥、番茄、白蘭地等等煮成），再喺上面鋪少少巴馬臣芝士，等佢慢慢融！而扇貝就配意式雜菜Salsa醬，有清新巴西香草味，所以應該食咗呢個先。

試完兩道主菜，當然仲未滿足。同C兩個掃咗幾輪seafood bar同日本刺身之後，大廚又過嚟同我哋傾下偈，介紹我哋一定要試即烤串燒！熱辣辣牛肉串加沙嗲醬無得頂！壓軸甜品，除咗有酒店水準嘅蛋糕之外，仲有朱古力、士多啤梨、cookie & cream等5款口味Häagen-Dazs雪糕任食！

Dining娜滋味小總評：

對於不時會去澳門玩嘅朋友，御廚真係keep住有驚喜，主菜同海鮮刺身都有新鮮感。不過最驚喜都係張單，自助晚餐星期一至四都係$298，星期五至日及公眾假期都係$348，太抵了吧！

英皇娛樂酒店 御廚

地址：南灣澳門商業大馬路288號英皇娛樂酒店9樓（顯示地圖）
電話：2838 9988
網址：www.grandemperor.com
Facebook：Grand Emperor Hotel 英皇娛樂酒店