機場
機場

機場新美食廣場8大食肆!再加抵買12蚊店尋寶 【機場食乜好】

飲食

廣告

講起香港國際機場,大家肯定諗起爭議不斷的第三跑道,淨係得負面?NO!最近就有個好消息啦,喺一號客運大樓6樓西大堂 (離港層禁區)就有新美食廣場,叫「食東西」,港式、西餐、韓菜等咩類型嘅餐廳都有啲,大部分都係首次係機場插旗,當中包括有米芝蓮星級食肆,亦都有平民快餐,總之平中貴價錢齊晒,2016年頭起至9月會陸續開業!平時只係捨得食麥記嘅你,終於有得揀啦!等上機嘅都多幾個Hea 點嘛!

1. 來自北海道的出名拉麵 梅光軒

呢間來自北海道旭川嘅日本餐廳出名食拉麵,好似公仔麵個隻,有四十多年歷史架啦,米芝蓮都推介過。喺香港除咗銅鑼灣希慎廣場開第一間店,機場呢間係第二間。佢嘅招牌3種湯底有醬油、味噌同鹽味,價錢$75 起啦。想食拉麵但又食厭咗機場間味千,可以考慮呢間呀。

2.米芝蓮三星名廚Street Food MIC by Alvin Leung

餐廳最大賣點平民價街頭小食!平時MIC Kitchen賣嘅都係唔平得去邊嘅高級菜色,今次由米芝蓮三星名廚梁經倫主理,齋睇牌頭好架勢,到底有咩食呢?負責人暫時只係透露有港人經典小食雞蛋仔賣,點特別法就真係要佢開咗至知啦!

3.School Food

數數下喺機場好似真係冇咩邊間韓國餐廳喎,School Food 應該係第一間啦!就算唔係飛韓國但又突然口痕想食下韓國菜可以諗諗佢!

4. O’Learys Bar & Restaurant

來自瑞典嘅O’Learys Bar & Restaurant食嘅係美國菜,成間餐廳以運動做主題,最大賣點係比人開party、睇下波、飲下酒咁。以後男仔等上機除咗玩手機,仲可以睇埋波,飲返杯relax下,都幾嘆!

5. 鏞記酒家

除咗太興同翠華,港式食肆又多一間啦!前幾年拎到米芝蓮1星嘅鏞記係老外至愛就人人都知,以「金牌燒鵝」聞名於世的,平時行過中環見到佢金碧輝煌的霸氣門面,就知價格都唔會親民得邊。今次係機場開分店,唔洗問應該都係外國遊客幫襯居多啦。

6. 池記

又係米芝蓮推介過嘅!呢間其實就係類似宜家機場有嘅一粥麵咁中式粥麵快餐店,都係食粥粉麵飯,出名雲吞麵,都係啲點心同糖水食嘅。係香港已經有幾間分店啦,旺角food court就有間。

7. 舊街場白咖啡

聽到呢個名,相信大家都唔陌生,因為舊街場白咖啡呢個牌嘅咖啡沖包係惠康、百佳超市都買到,佢本身亦係馬來西亞嘅一間咖啡店,即係話除咗Starbucks同Pacific Coffee,大家想醒醒神又多個選擇啦!

8. Mövenpick

其實機場激少有甜品店,Mövenpick就係少有嘅一間啦,記者就最鍾意食法式焦糖燉蛋味!佢本身一直係機埸都開緊架啦。

9.12蚊店機場尋寶

女仔最中意係12蚊店Living PLAZA by AEON尋寶啦,皆因質素唔錯仲要抵到爛嘅價錢就買到,而且基本上係百有,家品、精品、文具、零食樣樣齊!而係月頭(4/10)係機場都有得尋寶啦,雖然機場分店得4000 多呎,冇旺角、銅鑼灣、屯門個幾間成萬呎嘅咁大,但都可以話五臟俱全嘅!以後旅行帶漏日用品都唔駛煩啦,可以直接係機場買齊。

 

地址:赤鱲角翔天路1號香港國際機場2號客運大樓6P043, 6P045, 6P046舖 (顯示地圖)
營業時間:9:00 – 21:00
電話:3559 1188

延伸閱讀:

規模最大 Wine & Dine 5大注目推介 【中環食乜好】

【18區掃食】大埔人最撐的7大食店

香港18區美食有甚麼推介?

新假期編輯已經為你整合了香港18區美食指,其中包括尖沙咀、旺角、銅鑼灣等……即睇更多詳情。

香港有甚麼週末好去處推介?

香港18區都非常值得花時間好好探索,一家大細去暢玩的親子好去處、拍拖推介32大情侶好去處、落雨必去的室內好去處、慶生推薦20大生日好去處、新手必備19大靚景行山好去處、秋天戶外露營好去處…..