人氣南瓜批鮮奶咖啡回歸！必搶星巴克萬聖節超萌魔法黑貓精品

必試全新Coffruiti系列 果香與茶韻完美結合

想喺秋日搵一抹清新感，全新Coffruiti系列就最啱你。呢個系列將清新果香、清香烏龍茶同星巴克經典特濃咖啡融合，風味配搭耳目一新。芒果熱情果冰茶咖啡帶有明亮嘅熱帶果香同酸甜滋味，飲落每一口都充滿活力；而野莓黑加侖子冰茶咖啡就以馥郁莓果香同細緻酸甜作為主調，淡淡嘅茶韻平衡整體滋味，入口清爽輕盈得嚟又唔張揚，餘韻悠長。兩款都提供凍飲手調版本，為秋日注入活力與驚喜。

經典秋日滋味 人氣南瓜批鮮奶咖啡載譽回歸

講到秋天嘅專屬味道，點少得人氣爆燈嘅南瓜批鮮奶咖啡！呢款季節限定飲品將經典特濃咖啡融合蒸煮牛奶，配上南瓜同經典秋日香料，頂層再蓋上鮮忌廉同灑上四重香料粉，溫暖又富層次感。除咗熱飲同凍飲，仲有冰涼綿滑嘅南瓜批鮮奶咖啡星冰樂，以及不含咖啡嘅南瓜批鮮奶忌廉星冰樂俾你揀。如果鍾意冷萃咖啡嘅醇厚，一定要試埋南瓜批忌廉冷萃咖啡或者氮氣冷萃咖啡，慢速萃取嘅咖啡配上香濃四重香料粉忌廉冷泡沫，帶來豐富而平衡嘅味覺體驗。

萬聖節超萌精品 搞怪喵咪樂團與星夜派對登場

歎完靚咖啡，當然要睇埋萬聖節限定商品！今期星巴克推出咗兩大主題系列，首先有復古卡通風格嘅「詭異喵咪樂團」系列，禮服貓咪同小黑貓化身樂團主角。11款商品之中，24OZ凍杯加入咗夜光細節，頑皮小怪物仲會喺吸管探出頭來；仲有多款不鏽鋼隨行杯、玻璃凍杯同超得意嘅毛絨卡套、毛絨杯套，甚至有星巴克熊化身客席樂手嘅鎖匙扣，掛喺手袋帶出街絕對吸睛。

另一個「星夜派對」系列魔法貓咪、智慧貓頭鷹同埋魔法小熊齊齊現身。7款杯具同生活精品入面，必入手魔法貓咪手機架，壓克力支架設計放喺辦公室用嚟承托電子裝置就最啱；仲有魔法貓咪可收納杯袋，入面收埋咗個摺疊環保袋，買咖啡或者日常外出都勁方便。12OZ嘅咖啡杯仲配有女巫帽造型湯匙或者攪拌棒！