【自助餐放蛇起底組】旺角酒店 任食生蠔 3小時！喪啜手掌咁大勁creamy美國生蠔
撰文、攝影：放蛇組
任食生蠔 ：美國蠔creamy到漿住口腔
Buffet可由6點半食到9點半，記者準時抵達，一行到海鮮區已人頭湧湧，但就未見有生蠔。過了一會有大廚把一大盤生蠔拿出來，一放下不到一分鐘便迅即被圍觀的人群夾光，而仍然有一大堆人未能成取蠔，唯有再等多幾轉，頭半小時基本上大家都是主玫生蠔，所以海鮮位置keep住多人，想食的可能就要耐心等啦。好不容易拿到三隻，食落好creamy，由於蠔肉多又飽滿，所以食時會漿滿口腔，好滿足。不過美國蠔的海水味就較微弱，如果你想期待有滿滿鹹鮮的生蠔便會失望了，而且有蠔碎，開得不太好。
一大堆人圍着海鮮區，有人急到直接用手拿生蠔。
其實只要等到半小時後，都沒有人搶着要拿生蠔了，記者和攝影師還可以施施然在生蠔區不停拍照。之後供應生蠔仍然大大隻，size有女士手掌咁大，食了幾隻都是飽滿creamy，質素平穩。
Buffet開始半小時後已經無人想食蠔，可以慢慢食蠔。
基本上每一隻蠔都非常大隻，任你食到飽都得。
睇圖都見到好creamy，有份量！
多角度畀大家望望，蠔肉漲卜卜，好肥仔！
海蝦最好食＋唔凍刺身
另外都有幾款海鮮，有海蝦、青口和白蜆，青口無味，韌到似香口膠；蜆雖然都多肉但鹹鮮味亦欠奉；海蝦則正常，新鮮彈牙。而刺身雖然都是厚切有口感，但刺身都是層層疊在碟上再放在冰盤上，三文魚已經唔凍，開始變室溫質感。
海蝦最正常，夠爽彈;青口和蜆都無鹹鮮味。
無豉油碟，豉油和wasabi都要倒在碟上，行到返位已經半隻碟都有豉油。
卷物都唔OK，飯粒已黏在一塊。
熱盤：日式肥牛一人鍋最安全 其他味道麻麻
食完海鮮和刺身，當然是主攻熱盤，有約十數款：粟米忌廉芝士焗蠔、泡菜餃子、金莎骨、炸魚柳、炒意粉和糯米飯等，更有即切燒牛肉和熱辣辣一人日式肥牛鍋，不過質素麻麻，最安全的是日式肥牛鍋，其他的不是不夠熱，就是太乾。
熱盤有粟米忌廉芝士焗蠔，但焗蠔已是凍的，上面的粟米忌廉芝士已經乾到連成一塊，而蠔殻內是有2-3隻蠔BB，那蠔殻只是用來裝飾嗎？
熱盤試了泡菜餃子、金沙骨和炸魚柳，泡菜餃子的泡菜粉絲餡塞得滿滿，但餃子皮某些部份好乾身。金沙骨和炸魚柳明明都放在熱爐上，但吃時已經唔熱，扣分。
即切燒牛肉，切得大塊但質感又乾又硬。
有即整日式肥牛鍋，一窩都有3-4塊肥牛和大量蔬菜，湯底有甜味，質感再濃稠一點更佳。
還有各款凍肉、涼拌小吃和沙律吧。
一人送一客吉列帆立貝，帆立貝雖大隻但略嫌有點乾，不過是送的都算啦。
甜品多花款 即整火焰班戟
甜品較多即製部份，有即製迷你窩夫、梳乎厘和pancake，8pm更有法式火焰班戟表演，大家圍着大廚望着團火燒呀燒，好熱鬧。另外還有各款蛋糕、麵包、布甸和朱古力噴泉等甜點，可惜大部份味道麻麻，最失望的是梳乎厘，底部還未焗熟，有一大灘水。
8pm會有法式火焰班戟表演，侍應會提早通知大家，可以出去霸個位睇，好懷舊呀~
表演後會即場派班戟，加上橙粒和橙皮，派完就無。
有即製班戟，有香蕉、忌廉、朱古力醬等topping揀。
班戟很鬆軟，配料亦下得重手，看那飽滿漲卜卜的班戟皮就知啦~
有即焗梳乎厘不定期出現，黃色是雲呢嗱味、粉紅色的是士多啤梨味。
可惜舀到底部便發現梳乎厘未焗熟，非常多水，而士多啤梨味亦是很假的香精味，而且未拌勻糖粒。
窩夫若然被夾光後可以叫大廚再整，熱辣辣，topping自己加，記住要加花生椰絲糖粒，好有咬口。
總結：自助餐有生蠔、海鮮、刺身、一大熱盤和甜品，還有火焰表演，選擇都OK。而最回本的生蠔是用美國蠔，超大隻飽滿，creamy到漿滿口腔，很爽口，滿足。但若然你是期待食到充滿鹹鮮味、海水味重的生蠔，便會失望了。其他味道則麻麻，刺身不夠凍、熱盤不夠熱；甜品應濕的又太乾、應乾的又太濕，有待改進。環境坐得舒服，服務OK，85折後$237可以食足3小時……
一句到尾:鍾意食美國蠔的你會好滿意！
德福閣
地址：旺角豉油街118號仕德福酒店閣樓(顯示地圖)
電話：2710 4272 / 2710 4273
國際海鮮美食自助晚餐供應時間：星期一至日6:30pm-9:30pm
收費：成人$278、長者$218、小童$198
用餐時間：3小時
備註：收加一，11月另有85折優惠
香港18區美食有甚麼推介？
新假期編輯已經為你整合了香港18區美食指，其中包括尖沙咀、旺角、銅鑼灣等……即睇更多詳情。
